ЦIуссалакрал райондалийн увкIунни Дагъусттаннал энергетикалул ва тарифирттал министр Марат Шихаьлиев. Ванал кьамул бунни ЦIуссалакрал цIусса миналийсса, электричествалул, газрал дузал баврил масъаларттал хIакъираву бувкIсса агьали.

ЦIуссалакрал райондалул бакIчи МаматIи ХIамзатовлущал ва ванал хъиривчу Амир Султановлущал ванал вичIидирхьунни агьалинал масъаларттах.
ЦIусса миналийн бивзсса ЦIуссалакрал агьали чIярусса шиннардий азурда буллай бур энергетикалул ва инфраструктуралул масъаларттал. Агьалинан баян къабувну, ччя-ччяни лешлай бур чани, токрал ххаллу сантирайн дуцлай, миннуха зий бакъар.

Токрал напряжение лагь-лахъ хъанахъаврил зия дуллай дур инсантурал техника. Агьали рязи бакъа бур токрал ххаллалсса буллай, миннул ялув авцIусса инсан акъашиврия. Мунияту гьаз хъанай бур кIицI лавг­сса масъаларттугу. Социал объектирдал каялувчитурал рязи бакъашивугу мукуннасса дур. Школардай, оьрчIал багъирдаву гъилишиву электричествалийн хъар хъанай дур. Ток бакъасса шартIирдай оьрчIан дукра дангу захIматну бур.

Агьалинал бусласимунихгу вичIи дирхьуну, министрнал кIицI лавгунни вай масъалартту хьхьичI ххуттайн ласунтIишиву, хIадур дантIишиву райондалий энергетикалул сеть къулай дансса комплексная программа.

Шиккува райондалул бакIчинащал ва мунал хъиривчунащал цачIу Марат Шихаьлиевлул кIицI лавгунни тагьар къулай дансса цаппара чаранну.
Ччясса чIумул мутталий токрал ххаллал модернизация дан увкунни. Мукунма цаппара дахханашивуртту дан увкунни «Россети» компаниялул давриву.
– На дакI дарцIуну ура Да­гъусттаннал ХIукуматрал райондалийсса шартIру къулай дан шаймур бантIишиврий, – увкунни министрнал.