ДР-лул строительствалул ва машлул министр Низам Халиловлул февральданул 5-нний хьусса пресс-конференциялий бувсунни республикалий цачIун буван тIий бушиву стройматериаллу ва технологияртту дуккан дайсса предприятияртту. Миннуя буван най бур цасса кластер. Пресс-конференциялий гьуртту хьунни цаппара предприятиярттал ва хъуни ттучаннал каялувчиталгу.

Министрнал тIимунийну, цIанасса ппурттуву республикалий зий дур стройматериаллал, кьаркьсса строительствалул хIалашивурттал (смеси), газоблокирттал конкуренция духIан бюхъайсса производстварду.
Бувсунни кластер буварча, паччахIлугърал чулухасса кумаг ххишала буллан тIий бушиву.
Ванал дакIнин бувтунни хьхьичIва республикалий бувну бивкIшиву промышленностьрал 3 кластер – пюрунтирттал, ­уссал ва ппал зана-кьала даврил. ХIакьинусса кьини кластерданувун цачIун бувну бур 11 предприятие. Мунил лагрулий бартдигьлай бур импортозамещениялул сурсатру (продукция) дуккан дайсса цачIусса 3 проект, миккун дучIан дуллай бур аьмсса лагрулий 3,8 млрд къуруширттал.
Промышленностьрал «Город обувщиков» кластерданувун республикалий цачIун бувну бур усру дайсса 12 предприятие, миннул бартдигьлай бур импортозамещениялул сурсатру дуккан дайсса цачIусса 4 проект. Мивун дучIан дуллай бур 415 млн къуруш инвестициярдал.
Ппалул кластерданувун цачIун бувну бур 8 предприятие. Ппалул кластерданул лагрулий бартдигьлай бур цачIусса 4 проект, мивун дучIан дуллай бур 343, 6 млн къуруш, дузал бувну бур 147 цIусса зузи кIану.
Низам Халиловлул жавабру дуллунни журналистътурал буллусса суаллахьхьунгу. Вай суаллу бия чIявучин базаллувугу, ттучаннайгу дукиялул багьри лахъ шаврил хIакъиравусса. Масалдаран, пресс-конференциялий гьуртту хьусса «Зеленое яблоко» ттучандалул хъунмунил тIимунийну, ттучаннавун дучIайсса дукиялул сурсатрал оптовый багьрал ялун чан-кьансса, сайки 20%, ххи байсса бур. Багьри лахъ шаврил хъунмур савав дур опталул багьри лахъ хъанай бушиву. Базардавугу мукуннассара тагьар дусса дур.

ХIасан Аьдилов