Хъунайннал шяраваллил бакIчи АхIмад ЦIаххаев шяраваллил магьирлугърал къатрал зузалтращал хьунаавкьунни хасъсса аьралий операциялия щаву дирну увкIун, цIана шава хъин хъанахъисса аьраличу Альберт Шяъвановлущал.
АхIмад ЦIаххаевлул барчаллагь увкунни аьраличунахь, талатаврил майданнив ккаккан дуллалисса къучагъшивурттахлу, бувсунни хъин хъанахъиссаксса хIаллай цанмагу, кулпатрангу аьркинсса кумаг бан хIадурну ушиву. КIицI лавгунни хасъсса аьралий операциялий ватандалул мурадру буруччаврил ххуллий талатиминнал кулпатирттал чIарав бацIаву хIакьину паччахIлугъралгу, жяматралгу хьхьичIунсса ххуттай душиву.
Аьраличунал бувсунни цала къуллугърая, аьралий гьалмахтурая, тайннал дуллалисса къучагъшивурттая, бувсунни, ази лагайхту, цIунилгу зана хьун тIий ушиву аьралий гьалмахтурачIан.
Жувагу чIа учинну Альбертлун ччясса мутталий ази лагаву, «Илчилул» редакциялийнгу ванайн оьвчинну, гьарза-гьартану буккултрахь бусан.
Зулайхат Тахакьаева
