Цалва цивппа давурттал дузал буллалими Дагъусттаннай гьарза хъанай бур. 2025-ку шинал январданул 1-нний региондалий ивкIун ур пишакаршиврул доходрая налог дулайсса (НПД) 299481 инсан. Ми хъанай бур хьхьичIмур шиналминнаяр 32481 инсан ххишаласса, ягу 12,2 процентрал чIяву шаву.
2024-ку шинал региондалий хIасул хьуну бур 63 539 цIусса цалва цивппа давурттал дузал бувми, амма миннавату 30 965 инсан лиххан увну ур сияхIрая. Му мукуннугу, инсантал сияхIрайн ласаврил чIалачIи буллай бур халкь налогирттал низамрайн кIункIу хъанай бушиву.
Му бакъассагу, цалва цивппа давурттал дузал бувминнаясса налогру 2024-ку шинал гьарза хьуну дур 25,757 млн къурушрал, мунил, хьхьичIмур шиналссаннух бурувгун, 2024-ку шинал бюджетравун дучIан дурну дур 305,957 млн къуруш, ягу хьхьичIмур шиналнияр 9,2 процент ххину.
Хасъсса налограл низамрачIан халкь кIункIу тIий бур, му дулун бигьану ва къулайну дунутIий. Му инсантурачIа машгьурну душиврул сававртту укунсса дур: налогру дулаву цифралул низамрайн дурцуну душиву. Налогирттал сияхIрайн ласун, хIисав-китав (вести учет) дуллан ва налог дулун бюхълай бур «Мой налог» тIисса мобиль приложениялийхчил ягу ФНС-лул Личный кабинетрайхчил.
Яла чIиримур налогирттал нагрузка. Бувагу 4 процент налограл инсантуращал расчет дуллалийни ва 6 процент – идарарттащал.
Бюрократия дакъашиву. Декларацияртту ва чагъардайсса отчетру дуцIин дуллан къааьркинссар.
