Дагъусттаннал 550 азара пенсионернан страховой пенсия лахъ бунни 7,3 процентрал. Пенсия лахъ бувну махъ хъунив хьуминнал ласайсса страховой пенсиялул дянивсса дуцин лахъ хьуну дур 1,9 азарда къуруширттал, утти му хьуну дур сайки 24,5 азарда къуруш. Мунищала архIал лахъ бувну бур инвалидшиврул ва ппу акъа ливчIминнал (по случаю потери кормильца) пенсиярттугу.

«Пенсияртту лахъ баврил ляличIишиву дур зузиминнал пенсиягу лахъ баву. Миннан пенсия лахъ бувну бур хьхьичIва лахъ бувсса циняв индексациярттугу хIисаврайн ларсун, мивун багьну бур давурттай зузи­сса циняв инсантал»,– увкунни ДР-лул Социал фондрал отделениялул каялувчи МахIаммад Исяевлул.
Хъунив хьуминнал дянивсса пенсиялул дуцин лахъ хьуну дур 1,7 азарда къуруширттал ва цIана дянивсса пенсия хьуну бур 20,9 азарда къуруш.
Агарда миннан даву кьаритан багьарча, миннал ласлан тIий бур ялунгу лахъ був­сса пенсия, уттинин лахъ къабувну бивкIсса индексациярттугу хIисаврайн ларсун.
Жула билаятрай январданий пенсия лахъ бувну бур 38,5 млн инсантуран. Миннавух 31,5 млн инсантурал бур зукъазисса, миннал дянивсса пенсиялул дуцин лахъ хьуну дур 1,9 азарда къуруширттал. Утти миннал дянивсса пенсия хьуну бур 24, 4 азарда къуруш.
Мунищала архIал 7,3 процентрал лахъ бувну бур индивидуал пенсиялул коэффициент ва страховой пенсиялуцIун цIакь дурсса выплаталул дуцин. Ца индивидуал пенсиялул коэффициент лахъ бувну бур 133,05 къуруширттаяту 142,76 къуруширттайн, страховой пенсиялуцIун цIакь дурсса выплаталул дуцин – 8134, 88 къуруширттаяту – 8728,73 къуруширттайн.
ЦIушинал байрандалуцIун бавхIуну, чIявуми пенсионер­турал январданий лахъ бувсса пенсия лавсунни чIун дучIаннинма. ЦIусса шинал байрандалул гьантрал хьхьичI пенсия лавсъссар банкрайхчил пенсия цIушинал каникуллай ласун най бивкIминнал.
Му куццуй, ЦIусса шинал хьхьичIсса гьантрай 2024-ку шинал декабрьданул 29-нний­нин пенсия тIайла бувккун бивкIссар 9,8 млн пенсионернан. ЛивчIминнал пенсия бучIан тIий бур февральданий.
2025-ку шинал почталул отделениярттал лахъ бувсса пенсия биян бантIий бур цала графикрайну.
Социал фондрал региондалул отделениялий бусаврийну, 2024-ку шинал хIасиллайну, инфляция 7,3 процентраяр лахъсса дикIарча, Аьрасатнал ХIукуматрал Социал фондрал страховой пенсия ялунгу лахъ бантIий бур.
ХI. Аьдилов