Дагъусттаннал Росгвардиялул управлениялул вневедомственный къаралданул зузалт ва хасъсса полкрал аьралийтал бивунни Ленинградуллал блокадалуву бивкIсса, МахIачкъалалив ялапар хъанахъисса Марина БессаловачIан.

Ванил ххарину кьамул бунни хъамал. Бувсунни тай шиннардий ва танияр шихунмай цила бакIрачIан бувкIмуния.
Дяъви байбивхьусса чIумал Маринан 4 шин диркIун дур. Ниттищал ва ниттил ниттищал вай ялапар хъанай бивкIун бур Васильевский проспектрай. Буттал фронтрай жан дуллуну дур. 1942-ку шинал Марина буккан бувну бур душманнал вив лавсъсса шагьрулува. Ниттил нину диркIуну дур, нину захIматсса тагьарданий дуну, шагьрулуву лирчIун дур. Махъ, тикку къуртал хьуну дур. Марина цаймигу мюрщи оьрчIащал Майкопрайсса детдомравун бувцуну бувкIун бур. Цаппара хIаллава ва ца кулпатрал бувцуну бур, цала душну хъунма бан. Амма, кулпатрал бакI дургьума аьрайн увцуну, ва цIунилгу интернатрайн багьну бур.
Дяъви къуртал хьуну 9 шин ларгун махъ, Марина зун бивкIун бур Кановка тIисса поселокрайсса Сталиннул цIанийсса колхозраву. 1956-ку шинал ва бувкIун бур МахIачкъалалив ПТУ-вун буххан. Му къуртал бувну махъ, шийхва бавцIуну бур. Зий бивкIун бур МахIачкъалаливсса III-мур Интернационалданул фабрикалий ва «Металлист» заводрай.
Росгвардиялул зузалтрал дунни Марина Владимировнан дакIний личIансса бахшиш, буллунни хасъсса моторизованный полкрал командир Шамил Ахкубековлул чулуха Барчаллагьрал чагъар.
– Ленинградуллал блокада жула билаятрал тарихравусса ца яла аьсивмур, пашманмур лажин хъанахъиссар. Блокадалуву бивкIминнал чувшиврия чивчуну бур балайрду, ларсун дур кинофильмру. Бусалардавун дагьсса Ленинградуллал халкьуннал чувшиву дакIний дикIантIиссар цимирагу никирай, – увкунни полкрал командирнал хъиривчу, подполковник Роберт Аюбовлул.