«Мы гордимся Героями» тIисса цIанилу МахIачкъалалив Шахматирттал къатраву хьунни хасъсса аьралий операциялий чувшиврий жанну дуллусса ва хIакьинугу Украиннал аьрщарай ватандалул мурадру буручлачисса аьралийтурал оьрчIал дянивсса Республикалул шахматирттал турнир.

Ванил мурад бур ватандалул мурадру буруччаврил ххуллий жанну дуллуминнал аьпа ябаву, хасъсса аьралий операциялий талатисса аьралийтурал кулпатирттах къулагъас даву, ялун нанисса ник ватан ххирану тарбия даву ва оьрчIал дянив шахматирттай буккаврил тIуркIу машгьур баву.
Ва даврил сиптачи хьуну бур СВО-лий чувшиврий жан дуллусса капитан Казим Мурадовлул щащар Рада Мурадова.
Турнир сакин дурну дур республикалул бакIчи Сергей Меликовлул кабакьаврийну «Сила матерей» тIисса СВО-лий чувшиврий жанну дуллусса аьралийтурал гъанминнал ккурандалул, «Женщины бизнеса Дагестана», «Матери России» ккураннащал ва «Защитники Отечества» фондращал цачIуну.
Гьуртту хъанахъиминнан тIайлабацIу чIа учин бувкIун бия Дагъусттан Республикалул бакIчинал кумагчи Шамиль Аьли­ев, миллатирттал политикалул ва диннал иширттал министр Энрик Муслимов, «Защитники Отечества» фондрал каялувчи Идрис Кьурбанов.
– Зул оьрмулуву бивкIссар ва буссар зун яргсса эбрат кьариртсса инсантал, ми – зул ппухълур, хасъсса аьралий опрерациялий ватандалул мурадру буруччаврил ххуллий чувшиврий жанну дуллусса ва хIакьинугу тикку бивкIулийн данди бавцIусса. Ватандалул ялун нигьачIаву дир­сса чIумал, жанну хIайп къакуну, душманнайн лажинну бавцIусса зул ппухълу так ца зун бакъа­сса, жун цинявннанмагу эбратну хъанахъиссар. Мунин бувну, зу цайминнаяр цимивагу ша­ттирал хьхьичI буссару, амма аьркинну бур зула гьунарду итххяххан буллан, хьхьичIунмай хъит тIун. Зу цIана буру дуккаву ва спорт цалчинсса ххуттай дикIан аьркинсса оьрмулуву, – увкунни Энрик Муслимовлул, бяст-ччаллий буклакиминнан тIайлабацIу чIа тIий.
– Инсаннал щала оьрму бур шахматирттал улттуйсса тIуркIулуха лавхьхьусса. Гьарца бивзсса ша ягу махъунай ягу хьхьичIунай уллалисса. Зу бивзсса ша хьхьичIунмайсса хьуннав тIий ура, жу, зул ппухълунная кунма, зуятугу пахрулий личIаншиврул, – увкунни Шамил Аьлиевлул.
Турнир дан чIарав бавцIу­миннахь барчаллагь увкунни «Сила матерей» ккурандалул каялувчи, «Ма­тери России» ккурандалул Дагъусттаннайсса отделениялул хъунмур Сефижат МахIаммадрасуловал.
Рада Мурадовал бувсунни турнирданий гьуртту хъанай ушиву цила 3-гу арс.
– Ттул арсвавран хъинну ххирая буттащал шахматирттай буклан. Ттун ччай бия вай цивппа кунмасса оьрчIащал кIул бан, вайннал дянив куннал чIарав кув бацIлансса куццуйсса дусшиву цIакь хьуншиврул, – увкунни ванил.
Турнирданий гьуртту хьунни шагьрурдая бакъасса, районная бувкIсса оьрчIругу – 40-нниха ливчусса гьурттучитал.
Цалчинсса тIуркIу байбивхьунни Идрис Кьурбановлул.
Гьарцагу гьурттучинан бахшишру дуллунни «Трезвая Россия» тIисса Федерал проектрал чулуха. Ххув хьуминнан дуллунни хасъсса бахшишру.
Зулайхат Тахакьаева