СВО-лий жан кьурван дурсса сержант Асхад ХIажиевлул ва хьхьиривун бюкьлакьисса инсантал ххассал буллай жан харж дурсса ванал чIивима уссил Исламлул аьпа уттава буллалисса мероприятие хьунни МахIачкъалаллал 34-мур школалий.

Школалувун бувххун нани­сса къапулучасса чIирай лачIун дунни виртталсса уссурваврал суратру дусса, цивппагу кIицI лавгсса школалий дуклай бивкIссар тIисса чичрулущалсса ула.
Мероприятиялий МахIач­къалаллал администрациялул вакилтуравух гьуртту хьунни Шагьрулул депутатътурал мажлисрал хъунама Марис Илиясов, мэрнал хъиривчу, КIулшиву дулаврил управлениялул хъунмур Эмилия Раджабова. Мармарчарил улттуя пардав дукьангу вайннайнгу, ХIажиевхъал чIивима уссийн, Ххассал бувултрал колледжрал студент Мусайн тапшур бунни.
Школалул директор ХIажи МахIаммадовлул цала ихтилатраву кIицI лавгуна, школалувун увххун нанисса гьарца дуклаки оьрчIан, учительнан, нитти-буттан кIулну бикIантIишиву ва шикку вирттал дуклай бивкI­шиву. Бувсуна вайннахь дарсру дирхьусса учительтуран, 2-гу уссу дуккавривугу, спортравугу итххявхсса, дакIру хъин­сса, хасият ххуйсса оьрчIруну дакIний ливчIшиву. Школалий 10-мур классраву дуклакисса Разуев МахIаммад ва ХIажиева Диана бия митинг дачин дурну. ТОКС-рал члентурал, 9-мур классраву дуклакисса Биларов ХIабиблул ва 10-мур классраву дуклакисса Каримов Раджаблул бувсуна балжину уссурваврал оьрмурдая. Мюрщими классирттал оьрчIал дурккуна назмурду.
– Жува жущава шаймур буллан аьркинссару, укун чувшиврий жанну дуллусса жагьилтурал аьпалул хIурмат буллай. Бу­ттал кIанттул цIанийсса Хъунмасса дяъвилий жанну дуллу­сса ттаттахъал аьпа хIурматрай ябуллалисса кунма, вай жагьилтурал аьпа ябавугу, вайннал цIарду хъамакъаритавугу жулва адаврал буржри, – увкунни Марис Илиясовлул, вирттаврал ниттихь барчаллагь тIий.
Эмилия Раджабовалгу барчаллагь увкунни, цилла дакIниву ци къумашиву ва къюву духьурчагу, мудан шагьрулул мероприятияр­ттай гьурттушинна дуллалисса Саният ХIажиевахь. – Ялун бурган заэвсса, илтIасса, чIивисса хъамитайпалуву цукунсса кьуват буссаривгу, цукун бюхттулсса дакIнил заллу буссаривгу чIалай бур, – увкунни ванил.
Мяйжаннугу, къуркъасса къювулул бас буллай бухьурчагу, Саниятлул, оьвкусса мероприятиярттай гьуртту шаврицIун, ччя-ччяни кумаг бувайссар СВО-лий талатиминнангу, нахIу-кьацIулул кьуцIуртту тIайла буккайссар арснал аьралий гьалмахтурангу.
Ванилгу барчаллагь увкунни школалул директорнахь, учительтурал коллективрахь, МахIачкъалаллал администрациялухь, арсурваврал цIарду хъамакъаритансса даву дуваврихлугу, цила дардирдавун кьувтIуну цуппалу къакьабитан хIарачат буллай бушиврухлугу.
– Ттул арсру дустал чIявусса, халкьуннавун бу­ккан ччисса, хIаласса бикIайва, хIакьину вайннал рухIру рязину духьунссар цив­ппа дунияллия лавгун махъгу укун чивун дуклай дуну тIий. Ттул буссавагу мурад, мяйжаннугу, ттула арсурваврал цIарду хъамакъаритавур. Ттун кIулли Ватандалул мурадру буручлай чIявусса арсурваврал жайннай хIайп къакушиву, мигур дакIний битан аьркинсса циняв. Миннавух — ттулмигу, – увкунни ванил.
Асхадлул ва Исламлул гьалмахтуращал архIал хъамал яла школалул Аьралий савлугърал музейравун бивунни. Ши­кку дуклаки оьрчIал назмурду дурккунни. Саният ХIажиевал музейран пишкаш бунни Асхадлул ва Исламлул суратирттащалсса альбом. Шиккува кIицI лаганна, ва музей историк, «Илчилул» буккултрангу ххуйну кIулсса Галина Къараевал бувсса бушиву. Учительтурал ва гьалмахтурал бувсунни уссурвал цукунсса хасиятирттал заллухъру бивкIссарив, бувсунни миннацIун бавхIусса хъамакъабитансса ишругу.
ДакIнин бутанна, уссурвал ХIажиевхъул Цалчинмур ЦIувкIратусса цIанихсса пагьламан, Москавлив паччахIлугърал циркраву зий ивкIсса ва «Лезгинка» ансамбльданул къавтIала МахIаммадлул (аьпа биву) арсру бушиву, вайннал нину Саниятгу Къабардин-Балкьарнаву оьрму лавгсса лаккучунал душ бушиву.
КутIану уссурваврая бусан, Асхадлул 2018-ку шинал къуртал бувссар ДГПУ-лул художественно-графический факультет. Экзаменну дулунагу къаивтун, армиялийн увцусса ванал, аьралий бурж биттур байхту, дипломгу лавсун, армия цала кIану бур куну, контракт цIакь дурну дур. Спортраву итххявхсса, чурххал оьвхъусса, гьармуниву низам ччисса жагьилнан аьралийчунал пиша ххуй бивзун бур. СВО байбишайхту, ва къуллугъ буллалисса часть Харьковрайн дуртун дур. Червонная Писарка тIисса станицалий ванал аьралий гьалмахтал ххассал буллай жан дуллуну дур. Ислам, 9-мур класс къуртал байхту, дуклан увххун ур Автомобильно-дорожный колледжравун. Ва къуртал бувну ца зурува, 2017-ку шинал августрал 11-нний, гьалмахчунащал хьхьирий игьалаглай унува, щинавун боькьлакьисса 2 инсан ххассал уван ххявхссия, ми ххассал був­ссия, цувама дунияллия лавгссия 20 шинаву.
Шиккува кIицI лаган, ва иширая таний кказитирттай, социал сетирдай балжину чивчуну бухьурчагу, бюкьлакьими ххассал бувминнан дулайсса медальлагу къадуллуну дур Исламлун, ва тIайладакъашиву тIайла дацIан дуван шайссаривгу къакIулли.
ПатIимат Рамазанова