МахIачкъалалив Редукторный поселокрайсса шагьрулул азарханалий «ОьрчIшиву» тIисса Москавливсса реабилитациялул центрданий цIуллушиву цIакь дувансса сертификатру дуллунни къашавайсса оьрчIал нитти-буттахьхьун Дагъусттаннал парламентрал хъунама Заур Аскандаровлул. Ванащал азарханалийн увкIун ия Дагъусттаннал Халкьуннал Мажлисрал комитетрал каялувчи Илияс Мамаевгу.

Азарханалул хъунама хIакин, республикалул парламентрал депутат ХIажимурад Малаевлул бувсунни, ва «Хъиншиврул десант» тIисса акция 2-мур хъанай душиву, нитти-буттащал архIал 200 оьрчIгу, СВО-лул 40 гьурттучигу федерал центрдайн реабилитациялийн нанишиву.
Заур Аскандаровлул кIицI лавгунни, билаятрай яла хьхьичIунми центрду язи бувгьушиву жулва оьрчIру ва СВО-лул гьурттучитал хъин буллан ва гьашинусса шинал ахирданийннин 400 оьрчI федерал центрдайн тIайла буккансса ният душиву. Сертификатру дуллалисса даву къуртал хьуну махъ, хъамаллурал ххал бунни азархана. Малаевлул бувсунни, хьхьичIва республикалул кьатIув бувайсса операциярду утти цува каялувшиву дуллалисса азарханалий тIайлабацIу буну буллай бушиву, къашавайминнан чунчIав занансса чара бакъашиву дакъашиву, медициналул техникагу ххуйсса душиву, бюхъу бусса хIакинталгу бушиву. Бувсунни диабетрал къашавайми хъин буллалисса аппарат зия хьуну бушиву. Парламентрал спикернал махъ буллунни, ва масъалагу ххал бивгьуну, азарханалун аьркинсса кумаг буван.
ПатIимат Рамазанова