Къизлардай хьунни Росгвардиялул МахIачкъалаллал соединениялул ОМОН сакин бувну 32 шин шаврин хас дурсса мероприятияртту.
Батальондалул аьралийтал барча бан бувкIун бия Къизлар шагьрулул бакIчи Александр Шувалов, Къизлардал райондалул хъунаманал хъиривчу Мурад БахIандов, Дагъусттаннал Виваллил иширттал министерствалул вакилтал, къуллугърал ветерантал, Росгвардиялул зузалтрал гъан-маччами, Росгвардиялул профильный классирттаву дуклакими.
Мероприятие дайдишин хьхьичI гьурттучитурал тIутIив дирхьунни къуллугърал бурж бартбигьлай жанну дуллуминнан батальондалул базалий дацIан дурсса гьайкалдануцI, баян бунни минутрайсса пахъ багьаву.
Подразделениялул командир, подполковник Юсуп Назирбеговлул кIицI лавгунни батальон сакин дурния шихунмай аьралийтурал лайкьну бартбигьлай бушиву къуллугърал бурж, ккаккан дуллай бушиву цала чувшиву ва яхI.
– Батальондалул зузалтрал хъуннасса хъар лархъссар Ухссавнил Ккавкказуллал региондалий низам цIакь давриву ва ихтиярду дуруччавриву. 80-нния ливчусса аьралийтал лайкь хьуссар паччахIлугърал ва ведомствалул наградарттан.
Барчаллагь тIий ура лажин кIялану цала буржру бартбигьлагьисса аьралийтурахь, къуллугърал ветерантурахь, къинттуллух цаламур хъар лахълахъисса аьралийтурал кулпатирттахь, – увкунни ванал.
Росгвардиялул Ухссавнил Ккавкказуллал округрал командующийнан кIанайсса генерал-лейтенант Олег Чернойл ва МахIачкъалаллал соединениялул командир генерал-майор Дмитрий Чистяковлул цIания батальондалул зузалт барча бунни соединениялул хIаписар, подполковник Александр Шевчуклул.
Аьралийтал барчагу бувну, миннахь низам ва паракьатшиву дуручлачаврихлу, жагьилсса ник Ватан ххирану тарбия даву мурадрай дуллалисса даврихлу барчаллагь увкунни Александр Шуваловлул. Цала ихтилатраву ванал личIинува кIицI лавгунни аьралий частьрал ветерантал.
– Зу нирхиравун дуртсса аьдатру хIакьину цIусса ник аьралитурал тарбия хьунсса цIакьсса гьануну хъанахъиссар, – увкунни ванал. Батальондалул хьхьичIунсса аьралийтуран дуллунни паччахIлугърал наградартту, грамотартту ва бахшишру.
Мероприятие къуртал хьунни Къизлар шагьрулул Аслийсса культуралул центрданул хIадур дурсса концертрайну.
Андриана Аьбдуллаева
