Январьданул 17-нний Ккуллал райондалийсса Су­хъиящиял шяраву, бусравсса хъамалгу бавтIун, хасъсса аьралий операциялий чувшиврий жан дуллусса Исмаев Х1адис Щаллал арснал аьпа абад буллали­сса мажлис хьунни. ХIадис лявхъусса ва хъуна хьусса шяраву тIиртIунни мармарчарил ула.
Шикку гьуртту хьун бувкIун бия райондалул администрациялул хъунама Шамил Рамазанов, идарарттал каялувчитал, учительтал, ХIадислул кулпат, оьрчIру, мачча-гъанми ва архIал дуклай бивкIми.
Мажлис тIитIлай, ихтилат бунни Шамил Рамазановлул:
– ЧIярусса шиннардий оьба­лартту бухIлай бивкIсса Донбассуллал агьали неонацизмалия мурахас буллай, цалчинсса гьантрая байбивхьуну, СВО-лул иширттаву виричушиву ккаккан дунни цикссагу жула чиваркIуннал. ХIакьинусса кьини жула оьрчIру, цала оьрмурдан хъуннасса нигьачIаву дунугу, махъаллил къавхьуну, аьралий бурж лайкьну биттур буллай бур.
Билаятрай хасъсса аьралий операция баян буллалисса тагьардануву, ХIадислул исват бунни цува хIакьсса патриот ушиву. Къуллугърал бурж бартбигьлай ккаккан дурсса чувшиврухлу ХIадислун аьпалул хьуну махъ дуллуссар Къучагъшиврул орден.
ЦIанасса ппурттуву цикссагу захIматсса кьинирду лахъан багьлай бур СВО-лий гьуртту хъанахъисса жула жагьилтуран ва миннал махъсса нитти-буттан, кулпатирттан. Жула паракьатшиврул цIаний жан дуллусса къучагъ тачIав хъамакъаитантIиссар, – увкуна Шамил Рамазановлул.
Аьпалул мажлисрай гьуртту хьуминнал кIицI лавгунни ХIадис гьарица чулуха эбратрансса, гьалмахтурал дянив хIурмат-кьиматрайсса, уздансса хасият дусса инсан ивкIшиву.
Райондалул бакIчинал барчаллагь увкунни виричунал аьпа абад бан бувкIцириннахь.
Имара Саидова