Хасъсса аьралий операциялий гьуртту хъанахъисса, ЦIуссалакрал райондалийсса ЦIуссалакрал шяравасса АхIмад Садыкьов лайкь хьунни паччах1лугърал 2 наградалун.

Ватандалул мурадру буручлай, дакIнийхтуну аьралий буржру бартбигьлай бур ЦIуссалакрал райондалия мобилизовать бувсса, хушрай ва контрактрай СВО-лий гьуртту хъанахъисса жагьилтал.
АхIмад цалчинсса гьантрая гьуртту хъанай ур СВО-лий.
Аьралий бурж биттур буллай ккаккан дурсса чувшиврухлу ванан дуллуну дур Къучагъшиврул орден.
ЦIусса шинал байрандалул гьантрай Садикьовхъал кулпатрал ялун ххарисса хавар бивунни. АхIмадлун цал архIал паччахIлугърал 2 награда дуллунни. Ванал лайкь дунни 58-мур гвардиялул «Крест штурмовой» тIисса хасъсса лишан ва ХIурматрал грамота.
«Къучагъшиврухлу, кьянкьашиврухлу, виричушиврухлу ва лайкьсса даражалий аьралий бигарду бартбигьаврихлу, вил цIа чирчуну дуссар 58-мур гвардиялул аьмсса аьралуннал Суворовлул Ордендалул армиялул ХIурматрал луттирай. Умуд бур гихунайгу ина Ватандалул мурадру лайкьну буручланссар тIисса», – чивчуну бур луттирай.
ОьрчIан мудангу эбратну хъанахъиссар цала нитти-буттал багьу-бизу. АхIмадлунгу эбратну хьуну ур чIярусса шиннардий Ц1уссалакрал райондалийсса ОМВД-лий бусравну зий ивкIсса, цала ппу Мартин Садикьов. Ва кьянкьа-кьурч1исса хасият дусса, цаярагу, цайминнаягу тIалавшинна дусса, хIурмат-кьиматрайсса зузала ивкIун ур. БувчIлай бур, къучагънал хасиятру АхIмадлун цала буттая ирсирай диршиву.
АхIмадлул тасттикь бунни цува Ватандалул мурадру хьхьичI ххуттай бивхьусса жагьил ушиву. ЦIанасса никирангу эбратну бикIан аьркинссар укунсса къучагътал.
Имара Саидова