Аьрасатнал президент Владимир Путиннул ца ихтилатраву кIицI лавгуна, Ватан ххирашиву Аьрасатнал халкьуннал оьтту-ттурчIавурасса хасият душиву. Хасъсса аьралий операциялий жула ватанлувтуралгу ккаккан буллай бур цивппа буттахъал, ттаттахъал чувшиву ирсирай дирсса хIакьсса патриотътал бушиву. Гьарицамана билаятрал мурадру ва мюхчаншиву дуруччаврил цIаний цала-цала захIматрал бутIа бихьлай ур.

Вай гьантрай хасъсса аьралий операциялул гьурттучи, ЦIуссалакрал райондалийсса ЦIуссалакрал шяравасса СалихIов Заур ТIагьирдул арснан дуллунни паччахIлугърал награда – Суворовлул медаль. Му бакъассагу, Дагъусттаннал хьхьичIунсса ишккаккултрал аьпа абад бавриха ва жагьилтал Ватан ххирану тарбия бавриха зузисса жяматийсса суккушиннарал хIукмулийну, Ватандалул мурадру буручлай ккаккан дурсса чувшиврухлу ва Дагъусттаннал халкьуннал хьхьичIсса лайкьшивурттахлу Заурдун «Дагъусттаннал халкьуннал Виричу» тIисса цIагу, Мусил цIукугу буллунни.
Андриана Аьбдуллаева