Ислам МахIачевлул уттигу бюхттул ва машгьур дунни Дагъусттанналгу, лакралгу, Буршиял щарнилгу цIа, махIаттал-хIайран бунни щалагу дунияллул агьлу. Бразилиянал цIанихсса спортсмен Ренато Мойканощал данди увккуну мукьилчингу UFC-лул чемпионнал мухIлу лайкь дурну, дирхьунни UFC-лул рекорд. Ислам лачIун уккантIишиву баяйхту, Лос-Анджелесрая (Калифорния штатрая) дачин дурсса трансляциялух ссавур дакъа ялугьлай бия щаллагу дунияллул агьлу. Ва кьинисса турнирданул яла сий дума чемпионгу жула Ислам ия.
Ца янил тарг учиннин, 1-мур раундрай, Исламлул цала зумунусса бугъ уллалисса кьяйдалий, ух унни Бразилиянал чемпион Мойкано. Ислам октагондалийн уккайхту, личIиссара шавкь духхай тамашачитуравун. Дунияллул агьулданун ванал уттигу тасттикь бунни цува цалчинсса чемпион ушиву. Ислам МахIачев уккантIишиву баяйхтува, цинявппагу СМИ-рду чичлай бия UFC- лул тарихраву агьамшиву дусса иш хьунтIишиву.
КIулсса куццуй, бакIрай Ислам UFC-лул боец Арман Царукяннущал данди уккан хIадур хъанай уссия. Турнир дайдишин ца-кIива гьантлул хьхьичI Царукяннуйн цIунцIия хьуну тIий, ванахлу Исламлущал ччалли увккун ур Ренато Мойкано.
UFC-лул президент Дана Уайтлул бусаврийн бувну, Царукян ччалли уккаврия махъаллил хьушиву баян байхту, цума ухьурчангу спортсменнащал данди уккан рязину ушиву бувсун бур Исламлул.
Ванал гуж, кьуват ва ххувшаву ласунсса шавкь ялтту дурккун, цукунчIавсса кьаст къадуллунни Ренатон ххув хьунсса.
МахIачевлул ва ппурттувугу ккаккан бунни цува UFC-лул рейтинграл 1-мур ххуттайсса, унгу-унгусса чемпион ушиву.
Ислам хIадур уллай, ванал бивзсса гьарица шаттирал ялув авцIуну ур ванал уссунугу, дуснугу хъанахъисса, дунияллийх машгьур хьусса чемпион ХIабиб НурмахIаммадов.
Чемпионат наниссаксса хIаллай ареналийсса тамашачитуравух ия ХIабиб НурмахIаммадовгу. ЦIанихсса тренер Аьбдулманап НурмахIаммадовлул бивзсса гьану, дирхьусса вихшала цIакь дунни цала захIматрайну гьунар бусса, сивсусса, кьянкьа-кьурчIисса хасият дусса зунтталчунал.
2010-ку шиная шийнай Ислам профессиональныйсса спортрахун машхул хьуну ур. UFC-лул октагондалий Исламлул цимилгу ккаккан бунни цува цIанихсса спортсмен ушиву. Ванащал лачIун бувксса Чарльз Оливейра, Александр Волкановски, Дастин Порье ва цаймигу цIанихсса спортсментал цаннаяр ца машгьурсса ва цIанихсса бур.
МахIачевлул карьералувусса 28 данди уккаврива 27-ла ххув хьуну ур, миннува 13 бугъ увсса кьяйда ишла дурну ххув хьуну ур. ХIакьину Ислам МахIачев UFC-лул спортрал тарихраву яла цIанихма спортсмен хъанай ур.
Американал бизнесмен, UFC-лул президент Дана Уайтлулгу кIицI лавгунни МахIачев дунияллий яла ххуйма боецнан ккаллишиву.
Исламлул Мойканощалсса ччалли уккаврил ххувшаврихлусса гонорар дур 3,6 млн доллар: 1 миллион – иян уккаврихлу, 100 000 – ххув хьуну тIий, 42 азарва спонсортурал чулухасса ва 2,5 млн багьлухсса трансляциярттаясса процент. Армян Царукяннухлу МахIачевлущал данди уккан рязи хьуну тIий, Мойканол гонорар дур 1,5 млн доллар: 500 азарва лачIун уккаврих лу – 32 азарва спонсортурал чулуха, 850 азарва доллар онлайн-трансляциярттаясса процент.
UFC-лул чемпионнал мукьилчинсса титул барча кунни Дагъусттаннал бакIчи Сергей Меликовлул.
Американал ММА-лул ва ХIабиб НурмахIаммадовлул командалул тренер Хавьер Мендес буслай ур Ислам, яла цIакьма, гуж-кьуват бума ва цалчинма спортсмен уну тIий, най унува ххув хьушиву. Британиянал ММА-лул боец Арнольд Аллен соцсетирдаву чичлай ур, Ислам ляличIисса гьунар бусса, ххишала акъа итххявхсса чемпионт ушиву.
– Аьлтта чIалайсса зат бия, Исламлул Мойканощал ччалли уккаврил ахир укунсса дикIантIишиву. МахIачевлул ва данди буккавриву личIину захIмат булланмагу къабагьунни, – буслай ур PFL лигалул боец Андрей Корешков.
– НукIува чIалай бия Исламлул цуя-ца чемпион къаитантIишиву. Трансляция машан ласласийни на хъярч бувссия: «Ислам 1-мур раундрайва ххув хьунтIиссар», – куну. Мукун хьугу хьунни, циняв чемпионтураяр ялтту увккунни, – буслай бур UFC-лул бию Ирина Алексеева.
Имара Саидова
Ппабак1ул лачин
Шайссияв ххув къахьун
ПпабакIул лачин,
Ттаттахъал гьунарду
дакIнин къабичин.
Шайссияв барзунттал
мюрщи щархъавун
ДакIнил тав гъагъайсса
хаварду бичин.
Машаллагь, бювхъунни
ххувшаву ласун,
ЯхIлил цIа цал ттигу
цIурттачIа чичин.
Ссавруннай чирчусса
лакрал сияхIгу
Нур лахълай партIи дан
ттиркьюкьив дичин.
Ччучлай ивкIра нагу
вил хьунийн учIан,
Ххувшаврил ттугълилу
навагу ацIан.
Кьуватсса вил кагу
каниву дургьун,
Вихь барча чин дакIгу
най дия лерххун.
Валлагьий, щак бакъа,
гьаз унна, дустал,
Арилчинмур ссавнийн
Исламлул яхIлил!
ДакIгу дуцIин дунни
пахру-ххаралул,
Цал ттигу жула чув
Лавхъун тIий лахънийн.
ХIадисхъал ХIадис,
ш. Дюкъул
Барча ххувшаву
Мукьилчин ххувшаву барча,
арс Ислам!
Лакрал махлукьатрал цIа
бюхттул дурсса.
Хъамакъаританну
щалла дунъяллун,
Дулттияллил дара ашкара дурсса.
Ттугъ бищун лайкь хьунни
ПпабакIул мицIлий:
Бурши ва СунбатIул —
ПпабакIул чIаххул,
Миннала чIаравсса
маччалт– Ххюлуссун.
Ислам тIисса цIа ттун
хъинну ххирассар –
Душнил арс уссия вара цIа дусса.
Бусурман диндалун
лайкь хьусса цIар му,
Буцири муъминтал цайн
вихну ливчIсса.
ЦIуллу аннав ина, цал
мачча-гъаннан,
Цамур дуаь дакъар
ванияр хъинсса,
Чан къааннав ина
лакрал миллатран,
ЦIа чичин лайкь хьусса
мусил ххуттардий.
Къянналмур шярава –
кIия чемпион,
Ххюлусмату тIурча –
мукьа чемпион,
Ва бакъарив щала
лакрансса пахру,
Эпос чичин лайкьсса
лакрал оьрчIая…
МахIмуд Аьлилов,
ш. СунбатIул
