Шамиллул арс Кьурбанов МахIаммад
Январьданул 4-нний оьрмулул 58 шинаву аьпалухьхьун лавгунни ххаллилсса лаккучу, Хьурттал шяравасса Кьурбанхъал Шамиллул ва Ххадижат-Кубралул арс МахIаммад.
МахIаммад увссар сентябрьданул 1-нний 1967-ку шинал Хьурттал шяраву. Ппу ва нину Анжилив бивзсса чIумал МахIаммад буттал ниттичIа, ХаничачIа, кьаивтун ивкIун ур лакку маз лахьхьиншиврул. Яла, нитти-буттачIан увцуну махъ, дуклай ивкIун ур шагьрулул 30-мур школалий. Мяйва класс бувккуну мукьах, Автодорожный техникумгу къуртал бувну, армиягу лавхъун, зий ивкIун ур Даггражданстрой проектрай. Муния махъ Ккарччив хъин дайсса техникум-училищагу къуртал бувну, зий ивкIун ур «Мечта» тIисса клиникалий биялсса хIаллай.
Цуксса хIайпнугу, жапасса цIуцIаврища ххассал ан къавхьуну, МахIаммад лавгунни аьпалухьхьун. ДакIнийхтунусса пашманшивугу кIидачIлай, жижара буллай буру буттахь Шамиллухь, уссурваврахь Арсеннухь , А-Муталиблухь, душнихь Саидахь ва махъсса цинявппагу мачча-гъаннахь. МахIаммадлул бунагьирттал аьпа баннав, алжаннул ххари аннав, гьав нурданул дуцIиннав, махъминнал оьрмурдай барачат бишиннав.
Хьурттал ва ХьурукIуллал жямат
Сулайманнул душ Мисиду Аьлилова
Вай гьантрай аьпалухьхьун лавгунни уздансса хъамитайпа, хъинсса дакIнил заллу, ххаллилсса педагог, ЧIяйннал шяравасса Аьлилова Мисиду Сулайманнул душ.
Мисиду бувну бур 1953-ку шинал бусравсса педагогтал Сулайман (дяъвилул ветеран) ва ПатIимат Аьбдуллаевхъал кулпатраву.
1970-ку шинал ЧIяйннал школагу къуртал бувну, бувххун бур Дагъусттаннал пединститутрал филологиялул факультетрайн. 1975-ку шинал мугу лавайсса кьиматирттай къуртал бувну, бувкIун бур зун Ккуллал шяравун. КIира шинай Ккуллал школалий зий, Мисидул ккаккан бувну бур цуппа куртIсса кIулшивуртту дусса, оьрчIру ххирасса ва миннащал маз лякъин кIулсса педагог бушиву. Хъуннасса даву дуллай бия ва оьрчIру Ватан ххирану тарбия баву мурадрай. Ккуллал школалул коллективрал ва мудангу хIурматрай дакIнин бутлай бикIайва. Щар хьуну махъ Къизлардайн бивзун, чIярусса шиннардий тийх 7-мур школалий зий буссия.
Къизлардал школалул коллективрангу аьчухсса, хIал бавкьусса Мисиду ччяни бусрав хьуна. Ва ххирая дуклаки оьрчIан, хIурматрай бия миннал нитти-буттачIа.
Мисидул дарсру эбратну ккаккан дуллан бикIайва. Дайва ванил чIярусса классрал кьатIувсса, жяматийсса давурттугу. Школалий дуллалисса чIяруми мероприятиярттал сиптачи ва сакиншинначи бия.
ОьрчIру тарбия баврил ва миннан кIулшивуртту дулаврил ххуллий бивхьусса захIматрахлу ва лайкь хьуну бия «АьФ-лул аьмсса кIулшивуртту дулаврил хIурматлувсса зузала» тIисса бусравсса цIанин, ХIурматрал грамотарттан ва Барчаллагьрал чагъардан.
Мисидул ххуйсса тарбиягу дуллуну, ларайсса кIулшивурттугу ласун унни арс. Ва зий ур Республикалул клиникалул азарханалий хIакин-травматологну.
Мисиду аьпалул шаврил кьурчIишиву кIидачIлай, жижара буллай буру ласнахь Аьлиллухь, арснахь Аьбдуллухь, уссурваврахь АхIмадлухь, АьлихIажинахь, Арсеннухь, ссурваврахь ПатIиматлухь, Гулжагьрахь.
Имандалий лавгун лякъиннав, алжаннул ххари баннав. Махъсса цинявннал оьрмурдай барачат бишиннав.
ЧIяйннал жямат
***
Вилла цIанил кьадругу
Кьабивтун жяматрачIа,
Лавгунна, жул ссу, ина
Ахират чанна дуван.
Вила бусса оьрмулий
ОьрчIру тарбия буллай,
Цикссаннал увкухьунссар
Вихь барчаллагьрал махъру.
Байбивхьуну Ккулату,
Га Къизлардайн бияннин,
Цикссаннахь дирхьухьунссар
Ина чаннасса дарсру.
Буттал къатлул мусил ттарцI,
Гъанминнал чIарах бацIуй,
Бияв ина, Мисидуй,
Мусил тIуллал балгусса.
Ина буккайхту къурув,
Къур чанна лахъайссия,
Инава бивсса кIанттул
Сий ххишала дайссия.
Лякъиннав вин гьартану
Ахиратрал къума гьав,
Шанашу тти абадлий
Алжаннул тавханттуву.
Исмяиллул душ Эльвира Исмяилова
Вай гьантрай захIматсса азардануща ххассал бан къавхьуну, оьрмулул къабувччуну дунияллия лавгунни чIярусса шиннардий муштаритурал ихтиярду дуруччаврил цIаний зий бивкIсса ххаллилсса пишакар Исмяилова Эльвира Исмяиллул душ.
Бувну бур Эльвира 1961-ку шинал июньдалул 21-нний Хасаврай, Гьуйннал шяравасса профессор, академик, шяраваллил хозяйствалул элмурдал доктор Исмяил Сагидовичлул ва Аьрасатнал лайкь хьусса учитель Антонина Яковлевнал кулпатраву. Ставропольлай 14-мур лицей къуртал бувну махъ, Дагъусттаннал университетрал совет машлул факультетрайн бувххун, мугу марцIну ххювардай бувккуну, личIи-личIисса давурттай зий бивкIун бур. Махъсса 25 шинай Эльвира зий буссия Муштаритурал ихтиярду дуруччаврил ялув бацIаву дайсса федерал къуллугърал управлениялий.
Ва бия цила даву ххирасса ва ххуйну кIулсса пишакар. Бусравну бикIайва дустуран ва даврил уртакьтуран. Ххирая чIаххув-чIарахнан, гъан-маччанан.
Эльвира бия дакI хъинсса, хасиятрал бавкьусса, иш багьний цаманал чIарав бацIан, ка-кумаг бан хIадурсса инсан.
Лавгунни аьзизсса душгу, чIалачIин дакъа ххирасса душнил оьрчIру Руслан, Амалия ва Георгийгу кьабивтун.
Эльвира аьпалул шаврил кьурчIишиву кIидачIлай, жижара буллай буру душнихь Софикохь, уссихь Мурадлухь, буттауссихь Сагидлухь ва махъсса циняв гъан-маччанахь.
Имандалий лавгун лякъиннав, рухI алжаннул ххари даннав.
Гьуйннал жямат, Ставропольлайсса дустал, гьалмахтал
