Январьданул 18-нния 19-ннийнсса хьхьунил чIумал США-нал Лос-Анджелес шагьрулий хьунтIий дур турнир «UFC- 311». Ва гьашинусса цалчинмур турнир хъанахъиссар. Ванил яла хъунмур ишну хъанахъиссар куклумур чурххал кIушиврий UFC-рал чемпион жула лаккучу Ислам МахIачев октагондалий Арман Царукяннущал ияву.

Турнир дайдихьлай дур Москавуллал чIумул 2: 00 ссятраву, хъунмур бияву хьунтIий дур кIюрххил 8 ссят ва 30 минутIраву. ТIайланнасса трансляция ххал дуван бюхъантIий бур «Матч ТВ», ва «Матч БОЕЦ» каналлай.
Ислам МахIачевлун чIа тIий буру ххувшаву ва мукьулчингу дуруччин чемпионнал мухIлу.

ХI. Аьдилов