ЦIусса шинал байрандалул гьантрай аьдатравун дагьсса «Елка желаний» тIисса акциялувух гьуртту хьунни «Дагестан» Этномедиахолдинграл» каялувчи Арсен Юсупов. Ванал ва хъуними редактортурал дузрайн буккан бунни МахIачкъалалив ялапар хъанахъисса Уммукусумлул хиял.

ЦIуллушиврул ссуссукьушиву дусса душнин пишкаш бунни искусственный интеллектрал кумаграйну зузисса, цIанасса ппурттуву сийлийсса Яндекс станция «Алиса» ва муницIунсса монитор.
ЧIивисса Уммукусумлун колонка ччай душиву кIул шайхту, ванил хиял бартлаган бавривух гъирарай гьуртту хьунни редактортал. Арсен Юсуповлул душнин ккаккан бунни колонка зузи дувайсса ва видеороликру, мультфильмру ххал дувайсса куц.
– БувчIлай бур цуксса захIматну буссарив мушакъатсса оьрчIру хъуни буллан. Зул дакIру чансса-дунугу ххари даву мурадрайсса хьуннав ва бахшишгу. Уммукусум чIалай бур дакI хъинсса душ бушиву. Зул ужагъран гьарица чулуха даркьусса, барачатсса хьуннав ЦIусса шингу, – увкунни Арсен Юсуповлул.
Имара Саидова