ХIурмат бусса лакрал жямат, «Илчилул» буккулт!

Барча зул ЦIусса шин. Барачатсса, буллугъсса шин хьуннав.Ххаришивурттащал, хъиншивурттащал дуркIун лякъиннав. ТIиртIунийн ка диллай, бивзний ша бакьлай, бувсний махъ бацIлай личIаннав.
Аьдатравун багьсса куццуй, ларгсса шин цукун, ссайну дакIний лирчIссарив буслай бур жула миллатрал бусравсса вакилтал.

Юсуп МахIаммадов, Лакрал райондалул бакIчи:
– ХьхьичIми шиннардий кунна, ларгсса шиналгу мадарасса давуртту дарду райондалул социал иширттал ва экономикалул даража гьаз бан.
Навагу, райондалул жяматгу рязисса ишну хьунни ларгсса шинал Гъумук 120 оьрчIансса ттизаманнул тIалавшиннардаха лавхьхьусса оьрчIал багъ тIитIаву. Ва тIитIлатIисса шадлугърай гьуртту хьун райондалийн бувкIунни бусравсса хъамал: Дагъусттаннал ХIукуматрал председатель Аьбдулмуслим Аьбдулмуслимов, экономикалул министр ХIажи Султанов, кIулшивуртту дулаврил министр ЯхIия Бучаев ва м.ц. ЦIуну тIивтIусса багъравун занай буссар, Гъумучасса бакъассагу, лагма щархъаяссагу оьрчIру. Хасъсса аьралий операциялул гьурттучитурал оьрчIру занай буссар уква. Мюрщи оьрчIал мюхчаншиву дуруччаву мурадрай, багърал чIарав бувссар автобусру ва цаймигу машинартту бацIансса кIану.
Райондалийсса кIулшивуртту дулаврил цинявппагу идарарттал чIарав рирщуну дуссар «Внимание, дети» тIисса ххуллул лишанну.
Щалагу шинал лажиндарай хъуннасса къулагъасрайн лавсун буссияв хасъсса аьралий операциялул гьурттучитурал масъалартту. Райондалий дуллали­сса цинярдагу мероприятиярттайн хасъсса аьралий операциялий жанну дуллуминнал ва тийх гьуртту хъанахъиминнал кулпатирттайн оьвкуну, дакIний личIансса бахшишру дурну, шайсса аякьа дарду. Мукунма райондалул жяматрал цимилвагу гьан бувссар хасъсса аьралий операциялий Ватандалул мурадру буручлачиминнан гуманитар кумаг.
Муса Маннаровлул цIа­нийсса Гъумучиял школалий тIивтIуссар хасъсса аьралий операциялий жанну дуллуминнансса «Аьпа­лул багъ». Шикку хьунни ялун нанисса ник Ватан ххирану тарбия даву мурадрайсса мероприятияртту. СВО-лий жанну дуллуминнал аьпа абад баву мурадрайсса мероприятияртту цаймигу хьунни райондалий. Хъунайннал школалул чIирай лачIарду МахIаммад-Сяид МахIаммадовлул аьпалул ула. Хасъсса аьралий операциялул гьурттучитурал ва ахIвал кIюласса кулпатирттавасса оьрчIру бигьалаган, гъинтнил зурдардий Ккурклив, Щарав ва Гъумук тIитIарду оьрчIансса лагерьду.
Жяматран медициналул кумаг баврил даража гьаз баву мурадрай, ЧIурттащиял ва Ххутрал шяраваллаву тIитIарду ФАПру. Цаппарасса давуртту дарду Гъумуксса азарханалул къатри ва хIакинтал ялапар хъанансса чIявусса квартирарду бусса къатри ччяни къуртал даву мурадрай.
Ларгсса шинал, меценатътурал ка-кумаграцIух, цIу дуккан дарду Читтурдал ва Ккурккуллал шяраваллавусса Культуралул къатри.
Райондалий хъуннасса къулагъас дуссар спортрал даврих.
Ларгсса шинал лавайсса даражалий хьунни Аьрасат­нал Виричу НурмахIаммад ХIа­жимахIаммадовлун хас дурсса Шахматирттай буккаврил республикалул турнир.
Райондалул жагьилтурал дянивсса дусшиву цIакь даву мурадрай, Щардал шяраву дарду футболданий буккаврил райондалул турнир.
Туристътал кIункIу баву ва райондалул жяматрансса хIаллихшинна хIисаврай, Ханнал-БярничIа тIитIарду бигьалагаврил зона.
Гъумуксса Культуралул паркраву бувну буссия ттуплий буккансса мини-поле. Ларгсса шинал меценатътурал кумаграцIух му бакьин барду.
«Мой Дагестан – мои дороги» программалул лагрулий республикалул ва кIанттул бюджетрал арцух бакьин барду циняв школардачIансса ва социал объектирдачIансса ххуллурду. Мукунма асфальт бутIарду Гъумучиял цIусса микрорайондалийсса, цIуну бувсса оьрчIал багърачIансса ва школалучIансса ххуллийх.
Райондалул администрациялул къулагъасрайн лавсъсса агьамсса масъалалун ккалли бан бучIиссар налогру ратIаврийну бюджетрал доход ххишала даврил масъала. Ва чулийннай дурсса даврил хIасиллугу ххуйсса хьунни – 11 зурул дянив 105,3% щаллу дарду план.
ХIакьинусса кьинигу зий буру райондалул шяраваллавун газ буцинсса проект-сметалул документация щаллу буллай.
Шин дакIний лирчIунни мукунна ттула къушлий хьусса ххарисса иширайнугу – арс ташулул шаврийну. Жул ххаришиву кIидачIин, ва кьини жул чIарав бацIан бувкIунни чIявусса дустал, даврил уртакьтал, цинявппагу жул хIурмат буми. Миннахьгу дакIнийхтуну барчаллагь тIий ура.
ЦIусса шин барачатсса, даркьусса хьуннав. ХьхьичIра-хьхьичI чIа тIий ура дакьаву, ду­нияллий паракьатшиву. Ччяни баяннав жунма ххувшаву ларсъсса ххарисса хавар, сагъ-саламатну зана хьуннав цала-цала кулпатирттавун жула къучагътал. Жанну дуллуминнал гъан-маччанахьхьун дулуннав ссавур.
ХIарачат банну, гьарица шинах кунма, цIусса шинавугу экономикалул, социал иширттал ва цаймигу сферардаву ххуйсса ккаккияртту чIалачIи дан.

Шамил Рамазанов, Ккуллал райондалул бакIчи:
– Ларгсса шин, жула республикалунгу, аьмну щала билаятрангу бигьасса къадиркIхьурчагу, Ккуллал райондалун даркьусса дия учин бюхъанссар. ЧIярусса давуртту дан бювхъунни, агьалинал оьрмулул даража гьаз баву, ялапаршиннарал шартIру къулай даву мурадрай.
«Мой Дагестан – мои дороги» программалул лагрулий райондалул центрданий, Ваччиял шяраву, бакьин бувну, асфальт бутIарду Мичуриннул ва Гагариннул цIанийсса кIичIирттавух. Райондалийсса цинярдагу шяраваллаву бакьин барду ххуллурду. «Местные инициативы» программалул лагрулийсса конкурсрай ххув хьуну, СунбатIуллал шярава бувккун нанисса кIанайсса къапу бувну къуртал барду. Хъунмасса хIарачат бувну,шинал ахирданий бакьин буллай байбивхьуру ЧIяйннал шярава СунбатIлив бияннинсса мукьра километралул манзилданийсса ххуллу. Сукку дарду Ваччав стадион бансса давуртту.
«Национальная система пространственных данных» федерал программалуву гьуртту хьуну, 9 шяраваллил дазурду ккаккан дарду ПаччахIлугърал Цасса реестрданий. Хъусращиял ва ЧIяйннал шяраву дурну къуртал дарду кадастралуцIун дархIусса цинярдагу давуртту.
Хъуннасса даву дурссар райондалий хасъсса аьралий операциялуцIун дархIуну. Ватандалул мурадру буручлай жанну дуллусса мукьа къучагънан аьпалул ултти дишарду: Аьрасатнал Виричу Фархад Худайнатовлун ЦIийшиял школалий ва Ваччавсса Вирттаврал аллеялуву, Оьмаев Рашидлун ва Кьурбанов Кьурбаннун — Хъусращиял школалий. Шинал лажиндарай цимилгу гьан барду хьхьичI ххуттай бавцIусса аьралийтуран гуманитар кумаг, мукунма хасъсса аьралий операциялул гьурттучитурал кулпатирттан кумаг буллай, чIарав бацIлай бивкIру.
Культуралул ххуллийгу хьунни ккалли дан бучIисса мероприятияртту. Аьрасатнал шагьрурдаясса ансамбльлугу гьуртту хьуну, лахъа-хъунну хьунни «Наследие» тIисса фольклорданул фестиваль.
ЦIусса шиналгу цаппара дан дакIнийсса давуртту бартдигьин бюхъанссар тIисса умуд бур.
ЧIа тIий ура дунияллий дакьаву, паракьатшиву, куннан кув бувчIаву.
Хасъсса аьралий операциялул ахир хьуну, жула оьрчIру, ххувшавугу ларсун, цала-цала ужагъирттайн кIура бавсса кьини ччяни ккакканнав жунна.

МаматIи ХIамзатов, ЦIу­ссалакрал райондалул бакIчи:
– Ларгсса шин бигьасса да­къая. Ци чулийгу, райондалулгу, ЦIуминалулмургу иш бачин баву, гьарица сфералул даража гьаз баву мурадрай, чIярусса давуртту дан бювхъунни. Райондалул оьрмулуву хъуннасса агьамшиву дусса ва дакIний личIансса иш хьунни 1999-ку шинал райондалийн ххявхсса дунияллул террористътал ххит бувну 25 шин шаву. Тай захIматсса гьантрай, федерал аьрал, райондалул милицанал отделданул зузалт ва ФСБ-лул зузалт, ополчентал ва райондалул жямат цачIун хьуну, дурурччуссар республикалулгу, билаятралгу цашиву, тархъан дурссар район дунияллул террористътурал кьюкьрацIа. Вай иширттан 25 шин хьусса мероприятиярттай гьурттушинна дан райондалийн увкIунни Дагъус­ттаннал бакIчи Сергей Меликов, Аьрасатнал Вирттал ва цаймигу бусравсса хъамал.
Район хьхьичIуннай шаву мурадрай дуллалисса давурттая тIурча, шяраваллаву бакьин бан бювхъунни мадарасса ххуллурду. Байбивхьуру бакьин буллай ЦIуминалийсса ЦIуссаккуллал шяравусса ххуллурду. Мукунма бакьин бан бювхъунни 2 спортзал. «Формирование комфортной городской среды» программалул лагрулий цIу буккан барду Банайюрт шяравусса парк. «Местные инициативы» программалийну ЦIуминалийсса ЦIуссалакрал ва ТIюхчардал шяраву жяматийсса кIанттурду бакьин буллалисса давуртту къуртал шавай дур. ЦIуссачIурттащиял шяраву барду ФАП.
КIицI лагансса агьамсса даву хьунни хасъсса аьралий операциялий жанну дуллусса аьралитуран ва къуллугърал бурж бартбигьлай жанну дуллусса полициялул зузалтран хасъсса «Аьпалул багъ» тIитIаву. Шикку бивхьуну буссар жанну дуллуминнал цIарду чирчусса чартту ва мемориалданул ултти. Бувгьуну буссар 200-нния ливчусса ахъулссаннул ва декоративный мурхьру.
Райондалий 100 процентрал план щаллу дурсса масъалалун ккалли бан бучIиссар инттусса ва ссуттилсса призыврал масъала. ХIакьинусса кьини райондалиясса 400 къучагъ уссар хасъсса аьралий операциялий билаятрал мурадру буручлай.
Ларгсса шинал дурмунил хIасиллу дуллай, учин ччива, райондалул бакIчи хIисаврай, райондалийгу, ЦIуминалийгу инсантурал оьрмулул даража гьаз баву мурадрай зий айивхьура куну. 2025-ку шинал щаллу бан багьлагьисса масъаларттугу чансса бакъар, хIарачат булланна мигу лайкьну бартбигьин.
ЦIусса шинаву чIа учин ччива цинявннан цIакьсса цIуллушиву, ужагъирттай барачат, дуллалимуниву ххуйсса ккаккияртту.

Сапижат Мазаева, Аьрасатнал Виричу НурмахIаммад ХIажимахIаммадовлул нину, МахIачкъалаллал 54-мур школалул директор:
— Жуятура ларгсса шин ттун хьхьичIра-хьхьичI дакIний лирчIунни Аьрасатнал президентнал бувчIавурттайну. Владимир Путиннул вихшаласса инсан хIисаврай, на чIявусса кIанттурдайн лавгра, личIи-личIисса инсантуращал хьунабавкьура, ихтилатру бав. Асар хъанай бия ттула чулухунмайсса хIурматгу. Цинявппагу буслай бия Владимир Путиннухлу чIу булун хIадурну бушиву, мунайн дакъа вихшала дакъашиву. Шин дакIний лирчIунни захIматсса кьинирдай жула халкь цачIун шаврийну. ЦачIун хьунни жула инсантал бувчIавурттал чIумалгу, хасъсса аьралий операциялийминнан гуманитар кумаг бавривугу.
Цинявппагу аьрасатлувтуран агьамсса ишну хьунни чIявусса хьхьичIунсса масъалартту гьаз бувсса президентнал Рисала. Хъуннасса къулагъасрайн лавсунни В. Путиннул дуккаврил сий гьаз даврил, педагогтуран харжру гьаз баврил масъала.
Сси-къащи хьунни, пашмансса асарду ливчIунни Дагъусттаннай хьусса терактирдая. Вайгу, гьай-гьай, республикалийсса тагьар оьлукъин даву мурадрайсса ишру бушиву чIалай бия, амма кьурчIисса иширттал цал ттигу жула халкь хъиннува лагма лаган бунни, цачIун бунни.
ЦIусса шинал чIа тIий бура цинявннан цIуллушиву, талихI-тирхханну.
Дяъвирдал чIурду бухлаганнав, дунияллий дакьаву хьуннав. Цинявппагу жула оьрчIру ххувшаврищал цIуллуну, сагъну зана хьуннав! Аьрасатнал билаятрал гуж-кьудрат ххишала хьуннав, Дагъусттаннай аргъ дизаннав.

Арсен ХIусайнов, техникалул элмурдал доктор, профессор:
– 2024-ку шин ттунгу, ттул кулпатрангу даркьусса, тIай­лабацIусса шин дия. Ттула агьаммур даврий, Москавуллал авиациялул институтраву, штатрайн дагьайсса педагогнал даврицIун хIадур бан бювхъунни леххай аппаратирттал проектирдал ляличIишиврул хIакъиравусса монография. Отраслилул предприятиярттащалсса икьралданийн бувну, щаллу дан бювхъунни элмийсса ахттаршиннарду, мукунна сакин дарду инженер кадрардал пишалул даража гьаз бансса ва цаймигу мюнпатсса давуртту.
Жяматийсса давурттая тIурча, «Дагестан» Москавуллал культуралул центрданул президент хIисаврайгу, дарду личIи-личIисса агьамсса мероприятияртту. Аьдатравун багьсса куццуй, лахъа-хъун барду ветерантал, дишарду тIутIив Москавуллал Новодевичье хIатталлийсса Совет Союзрал кIийла Виричу, летчик-испытатель АхIмад-Хан Султаннул, парашютист Наби Аминтаевлул ва Буттал КIанттул цIанийсса Хъунмасса дяъвилий жанну дуллусса цаймигу дагъусттанлувтурал гьаттардий.
Жагьилтурал медициналул форумгу сакин бувну, лавайсса даражалий кIицI лагарду Медициналул зузалал кьини.
Дишарду тIутIив халкьуннал шаэр Расул ХIамзатовлул гьайкалдануцI ва сакин дарду «КIяла кьурукьру» тIисса музыкалул ва литературалул вечер.
Хъуннасса даву дурссар центрданул коллективрал хасъсса аьралий операциялул гьурттучитурал чIарав бацIаву, ка-кумаг баву мурадрай. Вай давурттал лагрулий хьуссар СВО-лул гьурттучитурал ва жагьилтурал хьунабакьавуртту, хасъсса аьралий операциялийминнан гуманитар кумаг гьан баву, ччя-ччяни биллай бивкIссар аьралий госпитальлай хъин хъанахъисса жула ватанлувтурачIан, гьуртту хьуссар цаймигу чирилул акциярдай.
Ларгсса шинал дан бювхъусса агьамсса давуну хьунни «Дагестанцы-москвичи» тIисса энциклопедиялул журалийсса луттирансса материал салкьи даву. Ва лу 2025-ку шинал итабакьинсса пикри буссар.
Ларгсса шинал ттула кулпатравугу ххарисса ишру хьунни: дунияллийн увккунни цалчин­сса ттул правнук – душнил душнил Алинал унни арс. Душнил оьрчI Кьурбан, медальданий школагу къуртал бувну, увххунни «Высшая школа экономики» университетравун. Щарсса дурцуну, кулпатрал хьунни душнил оьрчI Саэд.
Барча тIий ура ЦIусса шин цинявппагу лакрахь, дагъусттанлувтурахь. ЧIа тIий ура цIуллушиву, талихI-тирхханну, ужагъирттай нахIу-хIалимшиву, дуллалимуниву тIайлабацIу. Яла-яла, чIа тIий ура, ччясса чIумуй дяъвилул ишру ва къалмакъаллугу къуртал хьуну, жула цинявппагу оьрчIру, Ххувшавугу ларсун, цIуллуну, сагъну хасъсса аьралий операциялия зана шаву, дунияллийн паракьатшиву ва дакьаву ликкаву.

Асият Буттаева, философиялул элмурдал доктор:
– Шинну – ми дур чIумул цинцилтту, ца лахIзалий архIал дацIайсса, гамур чIумаллив, лавгмунил ва бучIантIимунил дя ришлай, лагь-лахъ хъанан дикIайсса. Ттул оьрмулувугу лавгмунил цинцилтту кIу хъанай дур. БучIантIимурдив так Заннан кIулли.
2024-ку шин ттун дия цаппарасса затру аьч хьусса ва цаппарасса затирттал заллу хьусса шин. Хьуна чIявусса, хIисав-сан дан багьлагьисса кIанттурду. Аьмнурив, яргсса авадансса шин дия. Хьунни чIявусса дустал, тIааьнсса хьунабакьавуртту.
«Дунияллий яла агьаммур – кулпатри, кулпат бакъахьурча, цичIав дакъашиврун ккаллиссар» тIисса мукъурттил мяъна утти ттун хъиннура дурчIлан ва асар хъанан диркIунни. Ттул кулпатраву бур 3 оьрчI ( 1 арс ва 2 душ), 8 оьрчIал оьрчI. Ттул дунияллул жавгьардуну утти вайри хъанахъисса. Вайри ттул пахру, вайннавура на личIантIисса. Мунияту на хIарачат бан аьркинссар ххуйсса давурттайну, хъинсса тIул-тIабиаьтрайну кьабитан вайннан нава. Занналгу ттуцIунма кабакьинссар тIий бура.
Ттул пиша бур педагогнал. На зий бура Дагъусттаннал гуманитар институтраву. КIицI лаган, ва бур ляличIисса атмосфера дусса, преподавательтурал ва студентътурал дянив хIурматрайсса ва вихшалдарайсса арарду дусса вуз. Шикку дакъассар цукунчIавсса коррупция. Ва вузраву бювхъунни ттуща, элмулул ххуллий педагог хIисаврайгу, лавайсса даражалул пишакар хIисаврайгу, нава ккаккан бан. На дуллалисса жяматийсса давуртту жура-журасса дур: Дагъусттаннал Жяматийсса палаталул комиссиялул эксперт, Дагъусттаннал Юстициялул министерствалучIасса ва Антитеррористический комиссиялучIасса экспертный советирттал член, Халкьуннал Мажлисрал депутат ХIажимурад Маллаевлул кумагчи.
Цайми кунма, нагу дакI цIий бура хасъсса аьралий операциялул иширттай. ЦIусса шинавун ми иширттан ахир хьуну бухханссару жува тIисса умуд буссия. ХIакьину Заннайн дуаьлий бура, цIуллуну, сагъну зана бува арсру ниттихъачIан, буттахъул оьрчIачIан, ласру хъанничIан. ЧIа тIий бура чаннасса ссавгу, бивтсса баргъгу.

Альбина Шутунова, «РМЛИ ДОД»(Республиканский многопрофильный лицей-интернат для одаренных детей) идаралул директор:
– Ларгсса шин бигьасса дия учин къахьунссар.
ЧIявусса сси-къащи хьунсса, инсантурал дакIурдийн щунсса ишру хьунни билаятрайгу, щала дунияллийгу. Умуд бур, цIусса шинаву паракьатшиву хьунссар, жула дакIругу рахIат дукканссар тIисса.
Гьай-гьай, ххарисса, тIааьн­сса ишругу чансса къавхьунни.
Учитель хIисаврай, на хъинну ххари бунна кIулшивуртту дулаврил системалуву хьусса ххуй чулийннайсса дахханашивурттал, хьхьичIва-хьхьичI, совет чIумалсса система цIу дуккан даврил: оьрчIру ватан ххирану тарбия баврих, профориентациялул даврих ххишаласса къулагъас дуллан бикIаврил. Дурккунни цIусса дарсру: захIматрал, мюхчаншиврул ва ватан дуруччаврил.
2024-ку шинал чIявусса дуклаки оьрчIру гьуртту хьунни олимпиадарттай. Ххишала хьунни классрал каялувшиву даврихлусса харж. ХIалли-хIаллих тIий, цIунилгу гьаз хъанан диркIунни педагогнал пишалул сий.
Ялагу кIицI лаган ччива, ларгсса шинал республикалул цинявппагу школардаву жул лицей-интернатрал бия яла чIявуми 11-мур классрал выпускниктал – 192 оьрчI. Миннава 54 оьрчIал къуртал бунни школа мусил медальлай, 28 оьрчIал – арцул медальлай. Вай хъинну ххуйсса ккаккиярттур. Му бакъассагу, билаятрал яла хьхьичIунми вузирдавун бухлахисса выпускниктурал ккал хIисав дурну, жул лицей Аьрасатнал 100 школалул сияхIраву буссар. Ухссавнил Ккавкказуллал федерал округрай тIурча, мукьра шинал лажиндарай жу цалчин буссару. Вай дуклаки оьрчIалгу, педагогтуралгу захIматрал хIасиллур.
ЦIусса шин гьарнал къушлийн барачатращал, ххаришивурттащал, тIайлабацIулущал дурххун лякъиннав. Гьарица инсаннан чIа тIий бура цIуллушиву, талихI-тирхханну.

Жамалуттин Амирханов, хасъсса аьралий операциялул гьурттучи:
– Жуятура ларгсса шин, цинявппагу жула халкьуннан кунна, ттунгу хъунмурчIин хасъсса аьралий опеациялул иширттайну дакIний лирчIунни. Цуксса захIматсса ва нигьачIисса тагьар дунугу, баргълагавал билаятру ва НАТО-лул блок цуксса къарщи бацIарчагу, жула халкьуннал ккаккан дунни цала цашиву, цайминнал жулла ялув духIлахIимур къакьамулшиву ва нацизмалун ххуллу кьукьинтIишиву.
Щалагу дунияллун Аьрасатнал ккаккан бунни цила гуж-кьудрат, исват бунни билаятрал агьаммур ресурс чIявусса миллатирттал ва лич1и-лич1исса диннал инсантурая хьусса Аьрасатнал халкь бушиву. Мунияту ттун хъунмасса пахру бикIай.
МукIруну ура жува ххув хьун­тIишиврийн ва цIусса шин Аьрасатнал тарихраву агьамсса дахханашивуртту дансса шин хьунтIишиврийн.
ЧIа тIий ура цинявннан дакьаву.

Исмяил Исмяилов, «Жемчуг» стоматологиялул клиникалул генеральный директор. Ханты-Мансийский округ, ш. Радужный:
– Жулва оьрмулуву ххаримургу, пашманмургу архIал най бур.
Ларгсса шинал ххуймур, ххаримур хъамабитан бансса хъуннасса кьурчIишиву дивунни жул кулпатрал, щалагу агьлу-авладрал ялун. Оьрмулул къабувччуну, дунияллия лавгунни ттул аьзизсса ссу. Чивчумунин чаран бакъассар учайхха, Аллагьнал чичру духьунссия.
Даврил, бизнесрал чулуха тIурча, шин даркьусса, тIайлабацIусса дия. Ттула командалущал (100-ннийн бивсса инсантал зий буссар жучIа) архIал тIитIарду хъунмасса лабораториялущалсса, цинявппа челюстно-лицевой операцияртту бансса шартIру дусса стоматологиялул 5-чинсса клиника. Жул клиникардай гьарица аьркинсса кумаг кьювкьу багьлий, кувний уквагума байссар хасъсса аьралий операциялул гьурттучитуран, миннал кулпатирттан. Мукунма кьювкьу багьлий кьамул байссар жу пенсионертал, инвалидтал, чернобыльцы, Авгъан дяъвилул ветерантал. Медициналул кумаг баву бакъассагу, жу гьуртту шайссару хасъсса аьралий операциялийн гуманитар кумаг гьан буллалисса акциярдавугу.
Ялагу кIицI лаган ччива, жунмасса кадрарду хIадур бан хIарачат буллай бушиву клиникалул хIакинтал. Северданийн бучIан ччисса чIявусса къабикIай. Мунияту, жучIава зунсса зузалт хIадур буллан багьай. ЧIявусса шихсса ттула гьалмахтурал оьрчIру, ва пиша язи бугьансса пикрилийвагу къабивкIсса, утти ккарччал хIакинтал хъанай буссар. Жу ми, аьркинний спонсоршивугу дурну, стажировкалийнгу жучIанма буцарду.
ЦIусса шинаву цинявннан чIа тIий ура цIуллушиву, ххари-хъиншивуртту. Гьарица оьккимуния Заннал бурувччуну лякъиннав.

Жанна Кьурбанова, Дагъус­ттаннал халкьуннал артистка:
– 2025-ку шин хьунадакьин жува цIуллуну, сагъну бивтукун, ларгмур шин къаххуйсса дия учаву къатIайлахьунссар, ттул пикрилий. Ларгсса шиналгу жула оьрмулуву ца агьамсса кIану бувгьуссар, цила лажин чирчуссар.
2024-ку шин творчествалул чулуха ттунна тIайлабацIусса дия учин бюхъанссар. Ттун дуллунни «Дагъусттаннал халкьуннал артистка» тIисса бусравсса цIа. Мунияр махъ – «За заслуги в культуре и искусстве» медаль, «Патриот Российской Федерации» орден. Нара дуллалимунин лайкьсса кьимат бищаврия тIааьнсса асарду ливчIунни.
ЦIусса шин ларгмурнияр ххуйсса хьуннав. Украиннавусса, Палестиннавусса, Сириянавусса дяъвирдал иширттал ахир хьуннав, дуниял паракьат хьуннав. Хъинмур, ххуймур дакIнийнал мурадру бартлаганнав.

Ххадижат Ц1аххаева, медициналул зузала, шаэр:
– Ларгсса шин бигьасса дакъая. КIива зуруй цал тIисса кунма, занай буссияв хасъсса аьралий операциялий захIматсса щавурду дирну, хъин хъанахъисса аьралитурачIан. Аьркинмур диян даврицIун, миннал дакI данмургу буслай бивкIру. Чувшиврий лахълай бур дурксса кьини жула аьралитал.
Хъуннасса къумашиву дакI­ниву лирчIунни ттула буттал шяравасса, Чакъалиясса, Артур Амиров ххассал ан къавхьуну. Шанма оьрчIгу ятинну кьабивтун, ахиратравун лавгунни. Алжаннул ххари аннав.
ЦIусса шинаву чIа тIий бура цIуллушиву, хаснува жула вирттавран.
Хасъсса аьралий операциягу къуртал хьуну, ххувшавугу ларсун, ххарисса дакIурдищал, цIуллусса чурххардищал цала шаппай зана хьуну ккакканнав.

Милана МахIмудова, А.Тахо-Годил цIанийсса Национал музейрал художник-реставратор ва элмийсса зузала:
— 2024-ку шин ттун даркьусса, творчествалул чулуха авадансса дия. Мастер-классру ккаккан буллай, чIявусса школардайн ва лагерьдайн бивра. Мукунма гьуртту хьура ВДНХ-лий хьусса щалагу Аьрасатнал выставкалий. Ва тIааьнну дакIний личIансса хьунни. Жул стенд хъинну ябацIансса дия, цинявппа тамашачитал жучIан най бия. На жула бархъаллал янналуву Дагъусттанная бусласисса экскурсия бувссия миннан.
Мукунма ларгсса шинал гьуртту хьура пишардал кьинирдан хас дурсса шадлугърал личIи-личIисса мероприятиярттай. Шяраваллил хозяйствалул зузалтрал кьинилун хас дурсса мероприятиялийн увкIун ия Аьра­сатнал шяраваллил хозяйствалул министр Дмитрий Патрушев. Му кьини мероприятиялий гьуртту хъанахъисса ттущагу интервью ларсуна. Цалчинмур каналданий ккаккан дурна.
Мартрай «Крокус Ситилувусса» туристътурал форумрай гьуртту хьуну, 3 гьантлий Да­гъусттан майшан тIий бивкIра. ТIайлассар, тиччасса тIааьнсса асарду лахъи къалавгуна. Форум къуртал хьуну хъирив кьини «Крокус Сити» залдануву оьсса бала хьунни. Та иш хъинну дакIнийн щунни, хъунмасса хIаллай ттуйнма нава къабукIлай бивкIра.
ДакIний личIансса хьунни «Солнечный берег» лагерьданийнсса аьрххи. Белгородрая ливхъун бувкIсса оьрчIан мастер-класс ккаккан бан лавгссияв. Вожатыйтуращал ихтилат буллалиний, тайннал бувсуна оьрчIру Аьрасатнал личIи-личIисса шагьрурдайсса лагерьдайн гьан буллай бивкIшиву, амма нитти-буттан ва цанма оьрчIан, Дагъусттангу, Дагъусттаннал халкьгу ххуй бивзун, шиккун ччан бивкIшиву.
ЦIусса шингу творчествалул чулуха даркьусса, тIайлабацIусса хьуну ччива. Яла-яла, хасъсса аьралий операциялун ахир хьуну ччива.

Зиябуттин ХIажимирзаев, Дагъусттаннал лайкь хьусса строитель:
– Ларгсса шинал ттул оьрмулуву ххуйнугу, къаххуйнугу дакIний личIансса ишру хьунни.
Цуксса хIайпнугу, чIявусса ххаллилсса ттул шяравучутал дунияллия лавгунни. ЛяличIинува кIицI лаган ччива цIанихсса художник Альберт Хаджаев. Ва, ца ГьунчIукьатIрал шяраваллил бакъассагу, щалагу Дагъусттаннал тарихраву цIа кьариртсса инсанни.
Жул шяравасса Жамалуттин Аьлиевлул жан дуллунни хасъсса аьралий операциялий. КIицI лаган, СВО-лий ккаккан дурсса чувшиврухлу Аьрасатнал Виричунал цIа дуллусса Фархад Худайнатовгу гьунчIукьатIрал куяври.
Цинявппагу дунияллия лавгминнал аьпа баннав.
Ттуятува тIурча, ларгсса шин тIайлабацIусса дия. Студентътуращал хьунаакьин ттуйн оьвкуна Дагъусттаннал университетрал Экологиялул институтрал ва Техникалул университетрал. КIирагу хьунабакьаву дакIний личIансса, мюнпатсса хьунни. Студентътал гъирарай вичIи дирхьуну бия бюхттул зунттайн лахъавриясса ттул хавардах, буллай бия суаллу.
Рязину ливчIра нава «Da­gestan Trail – 2024» лечавриву гьуртту шаврий. Лечин аьркинну бия зунттал кIанттурдайх, цимилгу бюхттулсса мицIайн лахъавай, ялавай учIавай. 35 километралул манзилданий ккаккан дурсса чIумуй лечин бювхъуну тIий ттун медаль дуллунни.
Дагъусттаннал литературалул оьрмулуву ккалли бан бучIисса ишну хьунни ттул шяравудуш КьурбанпатIимат Штанчаевал «Оьрмулул лахIзарду» тIисса шеърирдал жуж буккаву. Миллатрал библиотекалуву лавайсса даражалий хьунни луттирал презентация. Мудангу дакIний личIансса шай буттал шяравунсса аьрххи, хаснува ттучIанма хъамал бувкIсса кьинирду. Ларгсса шиналгу мукунсса аьрххирду чансса бакъая. ТтучIан увкIуна 4 шинал хьхьичI Лениннул пикрайн архIал лавхъун ивкIсса француз Пьер. Шяраваллил жяматрал, цачIанма хъамалу оьвтIий, цивппа букIлай, ванан хъунмасса хIурмат бувна. Мукунма тIааьнсса асарду ливчIунни жула ххаллилсса душру, «Дараччи» фондрал вакилтал хъамалу бучIаврия.
Ларгсса шиналсса ххуйсса иширттая тIий, чара бакъа кIицI лаган ччива шяраву уссурвал Штанчаевхъал ва ХIусайновхъал хIарачатрайну хьхьичIавасса мизит цIу буккан баву. Октябрьданий, Дагъусттаннал муфти щайх АхIмад-хIажи Апанни Аьбдуллаевгу, чIявусса бусравсса хъамалгу гьуртту хьуну, шяраву лахъа-хъунну тIивтIунни бакьин бувсса мизит.
Шинал ахирданийгу хьунни ттулва оьрмулуву дакIний личIансса, ххарисса ишру. «Лотос» издательствалий бувккунни «Вертикаль моей жизни» тIисса ттул лу, мунил презентациягу, чIявусса инсанталгу гьурттуну, лавайсса даражалий хьунни Дагъусттаннал Национал библиотекалуву.
Цаппара гьантрава тIурча, ттунма ххирасса, хIурмат бусса инсанталгу лагма лавгун, кIицI лагав ттула оьрмулул 60 шинал юбилей.
ЦIусса шинаву чIа учин ччай ура «Илчи» кказитрал цинявппагу буккултран цIуллу-сагъшиву, талихI, тирхханну. Лакрал миллатрай барачат бишиннав, гьарицагу дуллалисса даврицIун кабакьиннав, дакIнийсса мурадру бартлаганнав.
Та дяъвигу жула ххувшаврийну къуртал хьуну, цинявппагу тикку гьуртту хъанахъисса оьрчIру-душру лажин кIялану, дакIру марцIну, сагъ-саламатну шаппайн зана хьуннав.
ЦIухху-бусу бувссар
Андриана Аьбдуллаевал