Январьданул 7-нний ДР-лул бакIчи Сергей Меликовлул ххачпараснал дин дуллалими барча бунни Рождество Христоволущал.

«Ва чаннасса байрандалул агьалинал дакIру хъинмунийнсса вихшалдарал дуцIин дувай, мюхтажминнан ка-кумаг буллансса гъира цIакь бувай ва жувува циняв цашиврул, цачIу бавкьуну къуццу тIун аьркиншиврул асарду цIакь бувай. Жулва ппухълунная ирсирай дирсса аьдатри, Дагъусттаннай агьали динну ва миллатру личIи къабуллай яхъанан аьркиншиву. КIицI лаганна МахIачкъалаллал епархиялул хъуннасса даву дуллалишиву ва ххуллийгу, аьралитуран ва миннал кулпатирттан ка-кумаг буллайгу.
Цинявннан чIа тIий ура цIакьсса цIуллушиву, паракьатшиву ва узданшиву, хъиндайдихьурттаву – тIайлабацIуртту», – тIий бур барча баврий.
Дагъусттаннал ХIукуматрал хъунама Аьбдулмуслим Аьбдулмуслимовлулгу, ххачпараснал диндалул агьлу барча буллай, кIицI лавгунни, ва байрандалул жува рувхIанийсса гьанурдачIан ва кулпатирттаву кьиматрайсса ирс-ххазиналучIан зана битлатишиву, 100-нниха ливчусса миллатру яхъанахъисса, личIи-личIисса динну, аьдатру, культура дусса республикалий агьалинал цашиву, аслахIшиву дуруччаву – аьмсса мурад бушиву ва цашиву дуруччавриву ххачпарасналгу хъунмасса бутIа бушиву.
Дагъусттаннал Халкьуннал Мажлисрал председатель Заур Аскандаровлулгу, ххачпараснал агьлу барча буллай, лахъсса кьимат бивщунни Оьруснал Килисалул Дагъусттаннай дуллалисса даврин. «Оьруснал Килисалул жяматийсса иширттаву чялишну гьуртту хъанахъаврилгу чIалачIи буллай бур, республикалий рувхIанийсса культура ядаврил ва дакьаву дуруччаврил ххуллий циняв динну, личIи дакъа, ца ххуттай душиву. Рождестволул байрандалул инсантурал дакIру хъиншиврул ва хъинбалардал дуцIин дувай, лагма-ялтту аякьа аьркинсса инсантал бушиву, миннан кумаг буван аьркиншиву дакIнин бутай», – тIий ур ва. Ххачпарас байрандалущал барча дунни республикалий махъ нанисса бусравсса цайми къуллугъчитуралгу.
ПатIимат Рамазанова