«Хияллал елкалия» бучIан бувну, оьрчIал хияллу бартбивгьунни ДР-лул бакIчи Сергей Меликовлул. Ванал цал Москавлив бартбивгьунни Щалагу Аьрасатнал «Хияллал елкалиясса» 6 оьрчIал хияллу. Вайннавух бур Запорожскаллал областьраясса 7 шинавусса Кристина Пучковагу.
Яла Сергей Меликовлул Ма­хIачкъалалив бартбивгьунни 6 оьрчIал мурадругу. Миннавух Дунияллул халкьуннал дянивсса «Филантроп» премиялул лауреат, «Шаг навстречу» ва «Ангел и я» тIисса Дунияллул халкьуннал творчествалул фестивальданий ххув хьумур, «Имена России» тIисса Дунияллул халкьуннал дянивсса фестивальданул 1-мур даражалул лауреат Ирада Хановалссагу. Ванин республикалул бакIчинал дуллунни акустикалул система – музыкалул колонка ва микрофон.
Ххунзахъиял райондалиясса 7 шинавусса Залму Индухован дуллунни смарт-ссят. Ванил ххассал увссар микIиралу ливчIсса оьрчI.
Бахшиш дуллунни микIирала ххассал увсса Пирбудагъ Жамалуттиновлунгу. Ванангу, хасъсса дяъвилул операциялул гьурттучинал арс Касал СалихIовлунгу дуллунни аькьлу бусса колонка «Алиса».
Сергей Меликовлул бартбивгьунни 6 шинавусса ХIамза Аьлиевлул мурадгу. Ванал хиял бия шведская стенка. Му бучIан бантIий бур ваначIан шаппай.
Дузрайн бувккунни Даниял Дандамаевлул мурадгу – ва щяивкIунни цанна дуллусса велосипедрай.

ЦIусса шин дучIан цаппара гьантри ливчIсса кьини, Дагъусттаннал ХIукуматрал председатель Аьбдулмуслим Аьбдулмуслимов гьуртту хьунни «Хияллал елкалий».
Премьер-министрнал ХIукум­атрал къатраву бацIан бувсса елкалия ливккунни оьрчIал мурадирттащалсса 3 шар.
Дарбантлиясса 3 шинаву­сса Мадинал буттал жан дуллуссар хасъсса аьралий операциялий. Душнин ччай бур ссайгъат-сюрприз.
МахIачкъалалиясса 5 шинаву­сса Кавсаратлун ччай бия ичIаллил спортрал комплекс ласун. ЦIанасса ппурттуву душнил кулпат арцул кIюлану бур.
МахIачкъалалиясса 11 шинавусса Вагьаб ур инвалид. ЦIусса шинал ссайгъатну ванан ччай дур ласун эллиптический тренажер.
Аьбдулмуслимовлул бувсунни циняв оьрчIал хияллу барт­бигьинтIишиву.

Акциялу­вух хIала бувххунни ДР-лул бакIчинал Халкьуннал Мажлисравусса ва­кил Нюсрет Оьмаров, вице-премьертал, министртал ва цаймигу органнал каялувчитал.
ХIукуматрал председательнал хъиривчу Руслан Аьлиевлул бартбивгьунни чIавасса Эминнул хиял.
Ванал бунни «Хияллал елка» акциялул лагрулий цан ссайгъат булара тIисса тавакъю. Ва ур ДЦП-лул къашавайсса оьрчI. Республикалул цалчинма вице-премьернал оьрчIан пишкаш дунни ниттищал Грозналлал дельфинарийлийн гьансса путевка. Эмин тикку хъин хъанантIиссар 10 гьантлий.
Руслан Аьлиевлул «Аькьлу бусса колонка» дуллунни мушакъатсса Фатиман.
«Хияллал елка» акциялий оьрчIру ххари бунни мукунма Дагъусттаннал ХIукуматрал председательнал хъиривчутал Манвел Мажонцлул ва Нариман АьбдулмутIалибовлул.
ДР-лул БакIчинал ва ХIу­куматрал Администрациялул жяматийсса проектирдал отделданул каялувчи Шамил Аьлиевлул бартбивгьунни Дианал ва Мурадовхъал шама уссил – МахIаммадзапирдул, Загьирдул ва Тимурдул хияллу: миннан дуллунни мультфильмравасса ссихьу, компьютерданул тIуркIу ва март-ссят.
ХIасан Аьдилов