Билаятрал культуралувусса агьамсса ишну хьунни Аьшттарханнал паччахIлугърал консерваториялул 55 шинал юбилей кIицI лагаву. Вай шиннардил мутталий шичча итабавкьуну бур музыкалул ларайсса кIулшивуртту ларсъсса 5000-нния ливчусса пишакартал. Консерватория къуртал бувсса пишакартал зий бур, Дагъусттаннай, Аьрасатнал регионнай бакъассагу, Англиянаву, Германиянаву, Италиянаву, Американаву, Палангнаву, Израильнаву, Мексиканаву ва цаймигу билаятирттай.
Юбилейрай Дагъусттаннал чулуха гьуртту хьунни машгьурсса пианист, актер, АьФ-лул искусствардал лайкь хьусса ишккакку, Дагъусттаннал халкьуннал артист, профессор, Лакрал райондалул хIурмат бусса гражданин Хан Баширов, «Поющая Чарода» тIисса паччахIлугърал хорданул хъунмур хормейстер Мадина Шагьмурадова, Д.Ш. Аьшуровлул цIанийсса Дарбантуллал музыкалул училищалул преподаватель Залина Шихмурадова ва цаймигу.
Вузрал хьхьичIунсса выпускниктуравасса ур Мирзаханнул арс Хан Баширов. Ванахь дарс дихьлай бивкIун бур Аьрасатнал лаваймур школалул лайкь хьусса зузала, профессор Людмила Круглова. Гьарица чулинай итххявхсса, гьунар бусса музыкант Хан Баширов, Дагъусттаннай акъассагу, машгьурну ур Аьрасатнал шагьрурдайгу.
Консерваториялул хъунмур залдануву хьусса мажлисрай Хан Башировлул барча бунни гьурттучитал ва дуллунни Дагъусттаннал музыкантътурал, Дунияллул халкьуннал музыкалул союзирттал ишккаккултрал чулухасса наградартту.
ЦIанасса ппурттуву Аьшттарханнал консерваториялуву дуклай ур 500 инсан. Миннавух бур Китайнавасса, Израильнавасса, Болгариянавасса, Къазахъисттаннаясса ва цаймигу билаятирттаясса студентътал. Вузраву тIивтIуну бур оьрчIансса музыкалул школа. ХIакьину ва школа къуртал бувсса выпускниктал зий бур Москавуллал паччахIлугърал академиялул Хъунмур театрдануву, Санкт-Петербургуллал Мариинский театрдануву ва Аьрасатнал ва чил билаятирттал театрдал ва балетирттал оркестрдаву.
Консерваториялул выпускница хъанай бур ДР-лул культуралул министр, АьФ-лул культуралул лайкь хьусса зузала Буттаева Зарема Ажуевнагу.
Аьшттарханнал консерватория буссар Мариинский тIисса, хъаннил гимназия бивкIсса, хъинну хьхьичIавасса идаралуву. ХIакьину ва идара бухлай бур XIX-мур аьсрулул архитектуралул тарихрал гьайкаллал сияхIравун. Пишакартурал бусаврийн бувну, шикку бур яла ххуймур акустика дусса заллу. Аьрасатнаву, ва бакъасса, бур цаймигу 11 консерватория. Цавагу консерваториялуву укун лавайсса даражалул акустика дусса заллу бакъар.
Имара Саидова
