ДР-лул Халкьуннал Мажлисрал председатель Заур Аскандаров хьунаавкьунни ДГУ-лул юридий факультетрал студентътуращал ва преподавательтуращал АьФ-лул Конституциялул кьинилул хьхьичIмур кьини.

Хьунабакьаврий мукунма хьуртту гьунни ДР-лул Халкьуннал Мажлисрал председательнал хъиривчу Камил Давдиев, Законодательствалул, законшиврул, паччахIлугърал сакиншиндарал, кIанттул цилакаялувшиврул ва регламентрал комитетрал председатель Артур Исрапилов, Дуккаврил ва элмулул комитетрал председатель Елена Павличенко, ДГУ-лул ректор, депутат Муртазааьли Рабаданов, юридий факультетрал хъунама Шихтимер МахIаммадов.
Заур Аскандаровлул бувсунни 1993-ку шинал декабрьданул 12-нний Аьрасатнал Конституция кьамул бувну бивкIшиву циняв агьалинал чIурду булаврийну, муний ккаккан дурну душиву инсантурал ихтиярду ва буржлувшивуртту ва мукунна властьрал органнал полномочияртту.
«Конституция – му цила зумунусса «ТIуркIулул кьяйдардур», ми биттур дуллан аьркинссар цинявннал – укунасса инсанная тIайла хьуну, президентнайн биянцIа», – увкунни парламентрал спикернал.
Заур Аскандаровлул гьаз бунни билаятрал мюхчаншиврул ва щаллушиврул масъалартту. Ванал тIимунийну, цалий къадарцIусса дунияллул политикалул шартIирдаву Конституциялул бугьлагьисса кIану хъиннува хъун хъанай бур. ДакIнин бивчунни 1999-ку шиналсса ишру, та шинал чIявумиллатру бусса Дагъусттанал кабакьу бувну бивкIссар Аьрасатнал ХIукуматрал председательнал къуллугърай зий ивкIсса Владимир Путиннул хIукмулуцIун ва гьаз хьуну бивкIссар республикалий Конституциялул низам дуруччин.
«ХIакьинусса мюхчаншиву – му Конституциялул гьанур. Му къабивкIссания, къадикIантIиссия хIакьину жула билаятрай хъанахъисса дахханашивуртту», – увкунни парламентрал спикернал.
Мукунма бувсунни цува махъ лахъансса пикрилий ушиву АьФ-лул Федерал СобраниялуцIун АьФ-лул Законодательтурал советрал комиссиялий «О свободе совести и о религиозных объединениях» тIисса Федерал закондалуву дахханашивуртту даврил хIакъираву. Ванал жагьилтурай дюъ дирхьунни ттизаманнул обществалул хьхьичIсса нигьачIавурттал хIакъираву ва дакIнин дуртунни информациялул чулухасса мюхчаншиврул агьамшиву.
Халкьуннал Мажлисрал председательнал бувсунни аьркинну бушиву жагьилтуращалсса даву дачин дуван, кьатIаллил пропагандалийн къаршисса кьянкьасса иммунитет сакин хьуншиврул. Ванал студентътурайн оьвчаву дунни чялишну гьуртту хьун ми давурттавух.
Му давривух хIала буххан­тIиссар Халкьуннал Маж­лисрачIасса жагьилтурал парламентгу. Заур Аскандаровлул Камил Давдиевлуйн тапшур бунни жагьилтуращалсса хьунабакьавуртту дуван экстремизмалийн ва терроризмалийн къарщисса ва мукунма информациялул мюхчаншиврул масъаларттал хIакъираву.

ХI. Аьдилов