Аьрасатнал цачIундур командалуву гьурттуну лачIун буккаврил Европанал чемпионтал хьусса ХIажимурад Рашидов ва Шамил КIудиявмахIаммадов шадлугърал тагьардануву хьунабавкьунни МахIачкъалаллал аэропортрай. Европанал чемпионат хьуссар мартрал 8-11-нний Латвиянал хъуншагьру Ригалий.
ХIасан Аьдилов
ХIажимурад Рашидовлул мусил медаль ларсъссар чурххал 57 килорал кIушиврий лачIун увккун. Ванал тренерну ур цала ппу Гъазихан Рашидов, занай ур лахьлан КIурамахIаммадовлул цIанийсса Каспийскаллал лачIун буккаврил школалийн. Европанал чемпионатрай цалчин гьуртту хьуссар. ХIажимурад лачIун увкссар 5 муттаэнащал ва цинявннаяр ххув хьуссар аьмсса счетрайну 46:2. Ванащал лачIун увксса Украиннал спортсменнал лавсъссар ми 2 баллгу.
Шамил КIудиявмахIаммадов ххув хьуссар 86 килорал кIушиврий лачIун увккун. Ванал тренерну ур МахIачкъалаллал ХIамидовлул цIанийсса спортшколалий зузисса Анвар МахIаммадов. Европанал чемпионатрай Шамил лачIун увккун ур 4 муттаэнащал, миннавату шамуннаяр ххув хьуну ур чIун дукканнина, 32:0 счетрайну. Финалданий жула лачIунукку ххув хьуну ур Азирбижаннахлу уклай ивкIсса Александр Гостиевлуяр.
Жулва чемпионтурахь барча учин аэропортрайн бувкIун бур Республикалул ХIукуматрал Председатель, Дагъусттаннал лачIун буккаврил федерациялул президент Аьбдуссамад ХIамидов, ДР-лул физкультуралул ва спортрал министр МахIаммад МахIаммадов, личIи-личIисса даражарттал депутатътал, муниципал сакиншиннал бакIчитал, спортрал обществалул вакилтал, гъан-маччами, дустал.
Хьунабакьаврий Аьбдуссамад ХIамидовлул увкунни: «Жулва лачIунбуккултрал уттигу цал тасттикь бунни цивппа лавайсса даражалул лачIунбуккулт бушиву, мусил медаллу ласаврийну. Дагъусттан Республикалул каялувчинал цIанияту барча тIий ура ХIажимурадлухь ва Шамиллухь ва миннал наставниктурахь хъунмасса тIайлабацIу. На дакI дарцIуну ура зу ттинияр тихунмайгу жу ххари булланшиврий ххувшавурттайну».
Чемпионтал хьунабавкьунни зюннав-дачIулул къищусса къавтIаврил макьаннал чIурдащал, тиккува къавтIун бивзунни жулва спортсменталгу. Къарабудахккантуллал райондалул Губденнал шяраваллил жяматрал чулухату цала шяравучу ХIажимурад Рашидовлун пишкаш бунни «Тойота Камри».
