Дагъусттаннал тIабиаьтрал луртаннал ва экологиялул министр Ратмир Расуловлул пресс-конференциялий бувсунни ци даражалий буссарив региондалий цIуну буллалисса цIинцIал сортировкалул (цIинцI личIи дайсса) заводру ва ххиличIрурду дуччайсса полигонну. БакIрай Расуловлул бувсунни кьянкьасса коммунал лувличIрурдах хъуннасса къулагъас дуллай бушиву. Муния цимилагу бувсун бур Дагъусттаннал бакIчиналгу.
«Му масъала дузал буван жун кумаг буллай бур федерал центрданулгу. ХIакьину жучIава буллай бур лувличIрурду личIи дайсса мукьва объект. Масалдаран, Хасавюртуллал райондалий бантIий бур шинай 250 азарда тонна зана-кьала дайсса, Дарбантуллал райондалий шинай 200 азарда тонна, Къарабудахкантуллал райондалий шинай 500 азарда тонна зана-кьала дайсса завод. Аьмну миннул зана-кьала дуллантIий бур шинай 950 азарда тонна», – увкунни министрнал. Ванал тIимунийну, хIадурну бур 70 процентрал, бакIуйн буккан тIий бур 2025-ку шинал.
Ратмир Расуловлул бувсунни МахIачкъалаллал кьиблалул чулийсса Черкес-къутан тIисса кIанайсса цIинцIал бакIул хIакъиравугу. Ванал тIимунийну, ва бакIул лувсса аьрщарал лагру дур сайки 20 гектар, вания хъуннасса нигьачIаву дур агьалинал цIуллушиврун. ЦIанасса ппурттуву ва объектрал рекультивация даву мурадрай лахъан бувну бур «Генеральная уборка» федерал проектрайн.
Пресс-конференциялий гьаз бунни республикалул муниципалитетирттай цIинцIал контейнерду диялну душиврул масъалагу. Ратмир Расуловлул бусаврийну, контейнерду дишинсса кIанттурду ккаккан буван аьркинссар кIанттурдайсса властьрал органнал.
Пресс-конференциялий гьаз бунни мукунма цIинцI салкьи даврил ва миннуцIа щинал объектру марцI баврил масъалартту, хаснува туристътал бучIайсса кIанттурдай.
ХIасан Аьдилов
