Ватандалул мурадру буручлай кьянкьану бавцIуну бур Украиннаву аьралий операциялий жула чиварк1. Ваччатусса Маккаев ХIамзат Мусал арсгу гьуртту хьуну ур цал Херсоннал, яла Курскаллалмур областьру неонацистътурая мурахас буллалисса иширттавух.

Ванал кIира шин хьуну дур аьралий операциялий гьуртту хъанай, кIийлла щаву дирну дур. Аьралитуран нигьачIаву шикку дронная дур. ХIамзат къуллугъ буллалисса взвод п1якь учин дурну дур неонацистътурал дрон ишла дурну. Аьралитурая цуя-ца къаливчIун ур, ХIамзат, контузия хьуну, аьралий госпитальданийн агьну ур. Цайна цува учIайхту ва зана хьуну ур аьралий частьравун, зун ивкIун ур санчастьрай. Ванал тавакъюрайн бувну, шяраваллил жяматрал лавсун бур ванан машина. ЦIана ва медициналул зузалтращал щавурду дирсса жула аьралитал ххилай ур, вайннан цащава шайсса кумаг буллай.
ДакIнин бутан, ХIамзатлул буттал буттал ппу, ХIажиев Маккашарип, 1934-ку шиннардий, цува заллусса гьарахъалу дунутIий, кулак хIисаврай, танмихI кьувкьуну, Магаданнайн тIайла увккун ивкIун ур. Хъун дяъви байбишайхту, танмихI 25 шинайн баххана бувну, къучагъну талай ивкIун ур душмантуращал. Та заманнай, тайксса шиннардий цанма циксса ккаккарчагу, дакIнил хъиншивугу, вихшалагу ядурну ва зана хьуну ур ичIунай.

Маккаев ХIамзатлун хас бувну

Ххуйсса мархри бусса
Ахъулссаннул мурхьирай,
Оккисса ахъулсса хьун
Къабюхъайссар цукунчIав.

Зувиллий мукьку шинал
Кьини дурккусса чIумал,
ЯхI буну кьини лавхъссар
БакI хьхьичIун къаруртуну.

Оьккисса наслу бизан
Бюхъайссияв вияту,
БакIран циксса ккавкнугу
ДакI кьянкьану ядурсса.

ИвчIан суд бувсса ина
Зана хьуна махъунай,
Кьуния ххюра шин шайх
Вила кулпатрал ялун.

Оьмур дакIний къабивтун,
Оьрму бувтусса щалва,
Виятур, Маккашарип,
Вил арснал арснал арснаятур
ХIамзатлуятур гъалгъа.

ДакI кьянкьану талайсса,
СВО-райн лавгуну,
Оьрмулия ка ларсун,
Жандалий рахIму бакъа.

Душмантурансса оьван
БивкIулияр ххув хьусса,
Щавурдугу хъин дурну,
ЦIунил талан лавгусса.

ЯхI бусса виричуну
Чувшиву ккаккан дурсса,
Пахру бусса цинявннан,
Маккашарип кунасса.
МахIаммада ХIажиев,
ш.Ваччи