Декабрьданул 9-нний Дагъусттаннал бакIчи гьуртту хьунни Дагъусттаннал паччахIлугърал технический университетрал гьанулийсса лахьхьаврил ва вардиш баврил центр «Технолет» тIитIаврий.

Республикалул каялувчинал барчаллагь кунни беспилотный системартту хIадур дайсса центр баврил сиптачи хьусса Дагъусттаннал парламентрал спикер Заур Аскандаровлухь.
Региондалул бакIчинал тIимунийну, ва центрданул ялун бучIантIимур хъунмасса бур, цанчирча беспилотный комплексру ишла байссар, дяъвилул иширттаву бакъасса, граждан иширттавугу: геосъемкарду давриву, хозяйстварттал объектирдал диагностика давриву ва цаймигу иширттаву.
Сергей Меликовлул ххал бивгьунни «Технолет» центрданул кабинетру.

Ва дузал бувну бур ттизаманнул аьркинлугърал, шиву бур компьютерданул класс ва практикалул кабинет, мукунма лахьлахьими вардиш байсса полигон.
Центрданий инсантал хIадур буллан тIий бур давуртту канилух дурксса, дяъвилул иширттал опыт бусса инструктортурал. Тикку хIадур буллай бур дяъвилул пишакартал ва хасъсса дяъвилул операциялий гьуртту шаврил хIакъиравусса контракт чичин ччисса инсантал.
Цалчинсса группа лахьлай байбивхьунни. Вайннал лахьхьин тIий бур теориялул ва практикалул бутIри, яла аттестация дуван тIий бур полигондалий.
Беспилотный авиационный системарттал оператортал хIадур буллалиссар сайки кIира нюжмардул мутталий.
Заур Аскандаровлул бусаврийну, ялун буккансса аьралитал хIадур буван тIий бур уква. Пландалий бур Ватандалуха къуллугъ буллан ччисса, амма цIуллу-сагъшиврул чулуха диялдакъашивуртту дусса инсантурангу пиша лахьхьин буллан.

ХIадур бувссар
ХI. Аьдиловлул