Ватандалул Вирттаврал кьини Дагъусттаннал бакIчи Сергей Меликовлул аьлтту бунни Дагъусттаннал аьрщарай жан дулун кьисмат хьусса цала арсначIансса чагъар.
Аьрасатнал Виричу, къучагъсса аьраличу Дмитрий Серков краповый беретрал заллу ивкIссар.
«Цума-цагу буттан кунма, ттунгу хъинну бюхлай бур, вихь чIявусса затру учин къавхьунува ливчIун тIий. Къаувкуссия на вихь ина ттула арсну ушиврия пахрулий ура куну. Къаувкуссия на вихь ина мудан гьарзат тIайлану дуллай ияв куну. Ттун хъинну ччива, ца караматшиврийсса иш хьуну, вин нава тIутIимур бавну. На учивияв вихь, жува ххув хьуссару куну, ина къачагътурая буручлай ивкIсса Дагъусттаннай хIакьину нигьачIаву дакъассар, шикку хъуни хъанай, тяхъану хъяй буссар мюрщи оьрчIру куну.
На учивияв, ина Аьрасатнал Виричура, вин дацIан дуллай буссар гьайкаллу, дуклаки оьрчIру ккалай буссар вихасса шеърирду куну. Ина вила зумуну хъянссияв.
Барча вил байран, арс!»
ДакIнин бутан, Дмитрий Серковлул жан дуллуссар 17 шинал хьхьичI. Махъра-махъсса талатавривугу ванал уккан увссар ккуллардал цIарава цала гьалмахчу, ххассал увссар хъунама командир, бат бувссар чIявусса къачагътал.
Андриана Аьбдуллаева
