Декабрьданул 9-нний, Аьрасатнал Вирттаврал кьини, Кремлилул Георгиевский залдануву билаятрал президент Владимир Путиннул Мусил ЦIуку буллунни хъунама лейтенант Михаил Исбакиевлул ниттихьхьун Маринахьхьун ва щащар Анна Митьковахьхьун.

Жу хьхьичIмур номерданий бувсъссия СВО-лийсса Дагъусттаннаясса ацIния шамилчинма Аьрасатнал Виричу МахIаммадлул нину ЧIукнатусса душиву. Оьвкуссия уттигу Абсалуттиннул душ Маринайн барча буван.
«Шанттуршунниха ливчусса, чувшиврул гьунарду ккаккан бувсса вирттал бия ва кьини залдануву, амма Владимир Путиннул наградарттту дуллалисса церемония къуртал хьуну мукьах гьарманах къулагъас дия. Мусил ЦIуртти буллуминначIан гъан хьуну, ттун кIулли зул цукун захIмат-жапасса чIун дуссарив цIанакул, амма байраннугур аьркинсса, Ватандалул цIаний гьунарду ккаккан бувминнан багьайсса кьимат бишлашисса, тIий ия. Президентная цIарду дуллай баярчагу, вакссава укун инсантал цачIанма кIункIу буллалисса къаикIансса ххива, жу, ччянивасса дустурал кунма, аьчухсса ихтилат барду», – увкунни Маринал.
На цIувххуссия МахIаммадлул душ Кремлилувун буцинсса ихтияр къадуллурив куну, ванил бувсунни ца нюжмардийсса цивппа карантиндалий бивкIнавхьур, чIивисса душ къабуцинсса маслихIат хьушиву.
ДакIнин бутанну цал уттигу, 2022-ку шинал октябрьданий лейтенант Исбакиев каялувшиву дуллалисса группа Херсоннал областьрай кьянкьану бавцIуну бивкIшиву, ца кьинилул мутталий кьунниха лирчусса техникагу ххит дурну, кIиттуршунниха ливчусса боевикталгу кьатI бувшиву. Щаву дирну унува, МахIаммадлул цува каялувшиву дуллалисса кьюкьлущал архIал хьхьичI бивхьусса бигар бартбивгьушиву, цалламур жан кьурван дурну. Ванал гьунардания Аьрасатнал президентнан баян бувссия та талатаврил барану ивкIсса МахIаммадлул аьралий гьалмахчунал.
ПатIимат Рамазанова