МахIаммад КьурамахIаммадовлул каялувшиндаралусса «Солидарность и свобода» тIисса жяматийсса советрая жула халкьуннан нукIува кIулссар. Хъиннува ххуйну кIулссар вай хасъсса аьралий операциялий Ватандалул цIаний талатисса аьралитурангу. Циксса тоннарду гуманитар кумаграл диян дурссар вайннал хасъсса операция байбивхьуния шинмай хьхьичI ххуттай бавцIусса аьралитурачIан. Советрал хъунаманал хъиривмур полициялул майор Ума Аскерхановал цIа тIурча, бусалдаравун дагьну дур. Жагьилсса оьрмулувусса, илтIа-кIюласса душнил чувшиврий ччима махIаттал хьунссар.
Вай гьантрай Юсуповлул (нукIувасса Хуршилова) кучалийсса штабрая Ума ирглийсса аьрххилий наниссар тIий, ва тIайла буккан нанисса КIувратусса Багьауттиннул нагу бувцунна цащалва. На ванайн барчаллагьрай бура, вай чумартсса, дугърисса инсантуращал кIул бувну тIий. Аьралитурансса ссайгъатру хIадур буллай щиривкIуну бия организациялул активистал. Шикку бия школардаяссагу, таксса инсантурал цала чулуха бивхьуссагу ссайгъатру.
Ва цIанамур, 28-мур, аьрххилий Ума цинма цуппалу най буну, буруккинттарай бия душру. Кумаг тIайла буккан бувкIун бия советравусса 20-25 инсан. Вай чIявуми чIаравсса къатраву ялапар хъанахъисса личIи-личIисса миллатирттал инсантал бур. Чансса бакъая вайннаву лакгу. КIувратусса Исмяил ва Мисиду Гьаруновхъул, ТIаннул ЦIувкIратусса Садаят МахIаммадова, ЦIуссаккулатусса Ххадижат АхIмадова. Бия ва кьини шиккун бувкIун вайннащал хIала-гьурттусса ЛДПР-данул Дагъусттаннал региондалул отделениялул координаторнал хъиривмур Мадина Ибрагьимовагу.
Штабрал чIарав шиккува бия аьрайнсса къертту щащайсса кIанттурдугу, мунин аьркинсса станокру ва ярагъгу. Ссят хьхьунил 11-12 хьуннин щашлай бур шикку аьрайн гьан дансса къертту.
300 тонна кьайлул – дука-хIачIанмур, даруртту, лаххи-ликкия, виргъанну ва цаймигу аьркин дагьлагьисса затру гьан дурну дур вайннал уттинин жула саллатIнан.
МахIаммад КьурамахIаммадов:
«Солидарность и свобода» организациялул гьану бивзссар 2020-ку шиналва, республикалий ковид сукку хьусса чIумал. Ва халкьуннал ихтиярду ва мурадру буручлансса пикрилий сакин дурсса организацияр.Танийгу, кьини дурксса чIумал, жула халкь цачIун хьуна. Жу азарханардайн, исправительный колониярдайн даруртту биян буллай бивкIру. Хасъсса аьралий операция байбивхьусса чIумал жуйн бувккунни чIявусса аьралитал ва миннал нину-ппу тагьар захIматсса душиву, саллатIначIа дука-хIачIанмур, лахха-ликканмур диялну дакъашиву буслай. Жу байбивхьуру аьралуннан кумаг буллай. ЦIанагу хIарачат барду кумаг хьхьичI ххуттай бавцIуминначIан биян бан. Советраву Ума Аскерханова кунмасса инсан бушиву жун тIайлабацIу хьунни. Ва хьхьичI ххуттайн бияннин бувкIукун, аьралитал махIаттал хъанан бикIай. Ванил чувшивриягу, саллатIнахсса аякьалиягу буслай бусан къахьунссар.
Ума Аскерханова:
Ва ттул 28-чинсса аьрххир хасъсса аьралий операция нанисса кIанттурдайнсса. Вай хIакьину шикку ттул лагма лавгсса инсантал «Солидарность и свобода» организациялул членталли. Вай гьарми, ччарча арцуйну, ччарча цамур куццуй кумаг буллай буссар аьралуннан. Кьини дурксса чIумал жула халкь укун лагма лагаврия дакI ххари хъанай дур. Аьралгу, халкьгу ца хьусса чIумалли ххувшаву ласайсса. Жува чара бакъа ххув хьунтIиссару.
Нигь, гьай-гьай, дикIай, амма хьхьичI ххуттай бавцIусса аьралитуран кумаг бан ччишиврул, му бас дай. Ва цIанасса аьрххилий на навалу най бура, водительвагу уцлай бакъара.
Нигь ттула оьрмулиянияр, кьай диян дан къахьурча ци бави тIисса дикIай. Кумаг аьралитурачIан бивну махъ ттул дакI паракьат шай. Гьай-гьай, хьуссар нигьачIисса тагьарданувун багьсса кIанттурду. Жула организациялул председатель МахIаммадлущал жу мукьийла бита-ххиталувун багьссару. 2022-ку шинал Лисичанский райондалийн гуманитар кумагращал нанисса чIумал ххуллу бявкьуну, душманнал тIиртIусса цIарахьхьун биривссару. Та чIумал сагъну къабукканххивав.
Чумартсса бур жула халкь. ЖучIа буссар чIявусса оьрчIру бусса нинухъру, пенсионертал. Махъра-махъмургу дулун хIадурну бур. Цайми регионнаягума аьрайн гьан дуллалимур жухьхьун дуллай бур. Вагу халкьуннал жул организациялийнсса вихшалар. ХIарачат буллай буру му хIалал дан. Лавсун бувкIмур бюхъавай командиртурахьхьун къадуллуну, саллатIнахьхьун дулару. СаллатI бувччуну, ларххун бикIан аьркинссар. Ккашилсса, аьвкъусса саллатIнаща талан къашайссар. Аьралитал жуяту рязину бур. Цукунсса ссайгъатру лавсун бучIарчагу, иш муниву бакъар, халкьунная нанисса гъилишиврул рахIат буккан бару тIий бур. Аьралитал цивппагу буссар жул группалуву. Миннан чIалачIиссар гьарица жу дуллалимур: сеткарду щашлашиссагу, гуманитар кумаг батIлатIиссагу. Соцсетирдайхчин 1000-ннийн бивсса инсантал жул лагма лавгунни. Аьрасат гуж-кьудрат дусса билаятри, жува тачIавгу бух къавхьуссару, уттигу къахьунтIиссару.
Мисиду Гьарунова, ш. КIувур
Хасъсса аьралий операция байбивхьуния шинмай вай жула къатравасса инсантуращал ва «Солидарность и свобода» организациялуву нагу, ттул лас Исмяилгу буссару аьралитуран кумаг буллай. Жу кIиягу пенсионертал буру. Гьарица кьини бувкIун шиккун жуйнна-жуйнна дагьаймур дуллан бикIару. Вай шиккусса сетирдансса хахру, ми дурухлансса станокру ттул адаминалли бувсса. Цува рязину жувух хIала увххунни Строительствалул ва дизайнрал колледжраву дуклакисса ттула душнил оьрчI Амиргу. Гьарица кьини бувкIун шиккун дукрарду дуллай, сеткарду щашлай буссар хъами. Гьар мудангу арцуйнусса кумаг байссар ттула уссийл Багьауттиннул. КIицI лаган ччива мукунма кумаг бувсса жула шяравасса Ххадижат, Мая, Нурислан, Ххазинат, ттула ссурвал Марзият, Эльмира, уссийл щар Зоя. Гьарицама ур цащава шайсса кумаг буллай. Сахаватлувсса бур жула халкь.
Ххадижат АхIмадова:
На бура ЦIуссаккулатусса, ялапар хъанай бура МахIачкъалалив. Жула аьралитуран ттущава шайсса кумаг баву мурадрай хIала бувхра ва группалувух. Аьркинмур шарда дурурххуну лавсун бучIара. Уттинин 100 кIаралу бурувххуну гьан бав. ЦIанагу ттучIа 135 кIаралу хIадурну буссар. Му бакъассагу, жу цуманачIа ци дурив, мураппа чавай, соленье чавай, лавсун бучIару. 200-ннийн дирсса килорду аьрайн гьавккурттал гьан дурссар. Хъинну бавкьусса ххуйсса коллектив бур. Гьарицама шарда думур шиккун ххилай уссар.
Жу гьарица кьини бучIайссару шиккун къертту щашлан.
Вай щашлансса кIанугу, станокгу жул арамтурал Исмяиллул ва Визирдул цалвар бувсса.
Садаят МахIаммадова:
На уттинин ххюйла-ряххийла лавгра хасъсса аьралий операция нанисса кIанттурдайн. ЦIанагу жу тихунсса кумаг батIлай буру. Бюхъай ва ххуллухь цал уттигу навагу гьан. Ххуйсса кумаг бунни вай гьантрай жун ЧIарттал шяравасса Аьйшат Кунаевал, ссурвал Сабрижамал, Загьидат Аьлиевхъал ва вайннал мачча-гъаннал. Цадакьану бацIаннав. ХIакьинусса кьини жула инсантураву цучIав акъахьунссар аьралунная архну авцIусса.
ХIулимат Лукьманова:
Каспийскалий на бусса къатраву (Назарова, 1) яхъанахъисса инсантал цачIун хьуну, мудан байссар саллатIнан тIайла буккансса аьрайн гьавккури, чак-чак ва цаймигу нахIу-нацIу. Хъунмасса кумаг бай ттучIа дуклакисса оьрчIал нитти-бутталгу. Щаллусса дарваг иникIмалия кIюла гьавккури бувну тIайла буккарду.
Укун зий бур жула халкь, аьралуннан кумаг буллай. Вай къинттуллухсса вирттавран ккалли бан бучIиссар. Халкьуннал кумаг бухьурча, аьралуннал гужгу ххишалассар.
Андриана Аьбдуллаева
