Дагъусттаннал Миллатрал политикалул ва диндалул иширттал министерствалул отделданул зузалт Хасайбат Валиева, Зайдат ХIажикаримова, Мурад Набиев вай гьантрай бивунни ЦIуссалакрал райондалийсса Гьамиящиял шяравусса «Мусил кIула» садикрайн, Палестиннава бувкIсса мюрщи оьрчIачIан.
Вайннащал бия ЦIуссалакрал райондалул КIулшивуртту дулаврил управлениялул зузала Мисиду Шагьмандарова ва «Амин» тIисса граждан общество хьхьичIуннай даврил ДРОО-лул пишакар Муъминат Кьадиева.
«Мусил кIула» тIисса оьрчIал багъ бувну бур «Социально-экономическое развитие РД на 2016-2025 гг» подпрограммалийн бувну. Шиву бур 7 группалунсса кIанттурду.
Хъамаллуран оьрчIал багъраву экскурсия бунни садикрал хъунмур Лаура Кьурбановал ва методист Шавлухъ Рашидовал. Садикрал цалчинмур зивулий бур хъиннува мюрщиминнансса ясли, дукра дукайсса кIану ва медициналул кабинет. КIилчинмур зивулий бур дянивмур оьрмулувусса ва цахъи хъуними оьрчIансса группарду. Шийва бур садикрал хъуниминнал кабинетру ва музыкалул зал. Хъамаллурал ххал бунни оьрчIал тIуркIурду бан личIи бувсса кIанттурду. Шикку, цала-цала ссах гъира бурив, оьрчIаща бюхълай бур балугъ бугьангу, найрдаха зунгу, хIакин ва полициялул зузала хьунгу. ЧIявусса ва жура-журасса бур тIуркIурду бансса кIанттурду, диялсса дур шикку игрушкарттугу.
Садикрайх экскурсия бувну махъ министерствалул вакилтал хьунабавкьунни Палестиннал оьрчIащал, бунни миннащал тIуркIурду. Хъирив хъамал бивунни Палестиннавасса 80-нния ливчусса оьрчIру дуклакисса Гьамиящиял школалийнгу.
