Лакрал райондалул администрациялий, «Единая Россия» партия хIасул хьуну 23 шин шаврин хас дурсса агьали кьамул баврил декадалул лагрулий, ДР-лул Халкьуннал Мажлисрал депутат Марат Илиясовлул кьамул бунни агьали.

Депутатнал цIаний дия ряхра социал инфраструктура хьхьичIуннай даврийн, ххуллурду бакьин баврийн, аьращарал суаллайн ва давурттал щаллу баврийн багьайсса тавакъюрдащалсса.
Гъумучиял шяраватусса 1-мур группалул инвалид Кьурбанов Аьбдуллул тавакъю бия даву лякъин кумаг бува тIисса.
Аьхъаратусса МахIаммадов ХIажикьурбаннул тавакъю бия Хъунайннал шяраваллил советрал аьрщарай ризкьи ябувансса аьрщи дулун кумаг бува тIисса.
ШавкIуллал шяраваллил администрациялул бакIчи Жалаев Камил шикаятрай ия, кIинттул чIумал агьалинал къатри хъунмурчIин ттукIрай гъили буллай бухьувкун, биял хъанай бакъашиврия. Тавакъю буллай ия, цIусса трансформатор бишин кабакьу бува тIий.
Ккурккуллал шяраваллил бакIчи Аьлиев Тамерланнул тавакъю бия шяравунсса ххуллийх асфальт бакьин кумаг бува тIисса.
Хьурттал шяраваллил администрациялул бакIчи Бариев Сурхайл тавакъю бия Гъумучату Хьуривсса ххуллу ва ламу бакьин бан кабакьу бува тIисса.
Гъумук ялапар хъанахъисса Шавлухъов Данияллул тавакъю бия Гъумучиял ялттусса ххуллу бакьин бан кабакьу бува тIисса.
Марат Илиясовлул, гьарца суалданух вичIи дирхьуну, бувсунни гьарца масъала ххалгу бивгьуну, гьарцаннул ялув хIукму кьамул бан тIий бушиву.
«Цавагу суал къулагъас дакъа личIан къааьркинссар», – увкунни Марат Илиясовлул.
Зулайхат Тахакьаева