Вай гьантрай МахIачкъалалив Дагъусттаннал региондалийсса «Справедливая Россия — За Правду» партиялул отделениялий агьали кьамул бунни партиялул Советрал бюрорал председатель, ДР-лул Халкьуннал Мажлисрал председательнал хъиривчу Камил Давдиевлул.

МахIачкъалалив ялапар хъанахъисса Лайла Оьмарова бувкIун бия детсадравун оьрчI кьамул уван кумаг бара тIий. Ванил бувсунни, цил чIумал сияхIрай къабавцIуну тIий, оьрчI кьамул къауллай бушиву. Ва бур мушакъатсса арс цилалу хъуна уллай.
Камил Давдиевлул ва масъала шагьрулул КIул­шивуртту дулаврил управ­ления­лийхчIин дузал бан махъ буллунни.
МахIачкъалалив Петр Цалчинманал цIанийсса 109-мур проспектрай ялапар хъанахъисса агьалинал тIалавшинна дия цала къатрал хьхьичIсса, лащинсса тагьар дусса хIаят къулайсса шартIирдал дузал дан кумаг бара тIисса.
Ва масъалалул хIакъиравугу, депутатнал хIукму бунни, шагьрулул администрациялийн бувккун, хIаятру шартIирдал дузал дуллалисса программалувух хIала буххан.
ДР-лул спортрал вице-президент Кьурбан Аьлиев увкIун ия МахIачкъалалив теннисрал корт дансса аьрщи итадакьинсса масъалалул ялув. Ванал бувчIин бунни вания шагьрулул агьалинан мюнпат бусса объект хьунтIишиву.
Камил Давдиевлул ва масъалагу шагьрулул администрациялийн тапшур бунни.
Партиялул каялувчинал ва кьини цала кьамул бувсса агьалинал масъалартту щаллу бан бакIрайн лавсунни.

Имара Саидова