МахIачкъала шагьрулул Хъун майданнив хьунни Шяраваллил хозяйствалул зузалтрал кьинилун хас бувсса бакIлахъиялул ярмарка. Ваний гьуртту хьунни республикалул кьуния кIира райондалиясса шяраваллил хозяйствалул зузалт.
Ярмаркалий дирхьуну дия цIусса ва кьаркьсса дикI, нагь, нис, ахъулсса, ахънилсса ва халкьуннал канил давуртту.
Ва ххал бан бувкIун бия Дагъусттанннал бакIчи Сергей Меликов, ХIукуматрал хъунама Аьбдулмуслим Аьбдулмуслимов, шяраваллил хозяйствалул министр Мухтарбий Аджеков.
Сергей Меликовлул агропромышленный комплексрал зузалтрахь пишакаршиврул байрангу барча дурну, захIматраву хьхьичIун ливчуминнан дуллунни паччахIлугърал наградартту.
– Дагъусттаннай, щалва билаятрай кунна, аьрщарай захIмат буллалиминнал дянив цIакь хьуну дур хъинсса аьдат, политикалул тагьар цукунсса духьурчагу, цала захIматрал хIасиллу рищайсса.
Ва жапасса захIматрал хIакьсса кьимат кIулссар хIакьину шиккун бавтIсса механизатортуран, ризкьичитуран, хъудугьултран, агрономтуран, фермертуран, шяраваллил хозяйствалия дучIаймуниха зузиминнан, гьарцаннал хьун дурну дур ларайсса ккаккияртту.
Зул захIматран багьа бищун къашайссар. Цанчирча, зул кIунттихьри дусса билаятрал дукиялул мюхчаншиву, – увкунни Республикалул бакIчинал.
Сергей Меликовлул бувсунни республикалул АПК-луву хьусса агьамми хьхьичIуннайшивурттая.
– Гьарца шинах тIитIлай буру цIу-цIусса ризкьилул фермарду, аьнакIал фабрикартту, теплицарду, дугьлай буру азаллийсса гектарду ахъал ва къюмайтIутIул багъирдал, хьхьичIуннай хъанай дур шяраваллил кIанттайсса социал инфраструктура. Жула аьрщарай ххярхсса дукия машгьурну ва тIалавну дур республикалул дакъасса, билаятрал кьатIувгу. Пахрулун лайкьсса бур хъуруннай, мащай, хIухчалтрал къушай зузиминнал захIмат, – увкунни Меликовлул.
Барчаллагь увкунни агропромышленный комплексрал зузалтрахь ва ветерантурахь захIмат ххирашиврухлу, цала даврийн дакI тIайлашиврухлу, ларайсса жаваблувшиндарахлу.
– ДакI дарцIуну ура шяраваллил хозяйствалуву захIмат буллалими ванияр тихунмайгу аьрщарай лябукку буну захIмат буллантIишиврий, цIачIу тIурча, жущава бюхъантIиссар республикалул социал-экономика хьхьичIуннай даврил ххуллий жула хьхьичI бивхьусса мурадру дузрайн буккан буван. Барчаллагь зун шяраваллил хозяйствалул язими аьдатру ягу дурну, гьарза дуллай бушиврухлу. ЧIа тIий ура зун цIу-цIусса тIайлабацIуртту ва буллугъсса бакIлахъия ласлансса цIуллушиву! – увкунни Меликовлул.
Республикалул бакIчинал барчаллагь увкунни шяраваллил хозяйствалул зузалтрахь хасъсса аьралий операциялий талатисса ватанлувтуран буллалисса кумаграхлугу.
– ХIакьинугу зу тIайла бувккунни хасъсса аьралий операция нанисса кIанттай талатисса жула ватанлувтуран, аьралитурал кулпатирттан дукиялийнусса кумаг, – увкунни Меликовлул.
Шиккува кIицI бан, шяраваллил хозяйствалул зузалтрал ярмаркалия хасъсса аьралий операция нанисса кIанттайн тIайла дурккунни зувиллий ххюраксса тонна дукиялул. Гуманитар кумаг тIайла буккавриву гьуртту хьунни республикалул МЧС-рал зузалт.
Ярмаркалул лагрулий чIалачIи связьрай тIивтIунни кIива агропромышленный комплекс: МахIарамкантуллал райондалийсса Джепел шяраву тIивтIунни «Сад» тIисса КФХ-лул ахъ ябайсса кIану ва Дахадаевуллал райондалий Хъярбащиял шяраву – газ буцинсса объект.
КФХ «Сад» хъанахъиссар республикалий ахъул ва ахънилссаннул кластер хIасул буллалисса проектрал ца бутIа. 2018-ку шиная шинмай ваний бувгьуну бур 200 гектарданийсса гьивчул ва хъюртул мурхьру. Проектрайн бувну бан ккаккан бувну бур ацIазарда тонна лагайсса ябайсса кIану. Ххюазарда тонна лагайсса кIану тIурча, зий байбивхьуну бур.
Республикалул бакIчинал бувсунни укунсса кIанттурду цайми районнайгу тIитIин ккаккан бувну бушиву.
Зулайхат Тахакьаева