Декабрьданул 4-нний Сергей Меликов гьуртту хьунни биттуршиндарал властьрал ва кIанттул цилакаялувшиврул органнал каялувчитурансса семинар-совещаниялий.
БатIаврил тема дия: «Основные подходы к формированию бюджетной политики и межбюджетных отношений на очередной финансовый год и плановый период» (Ирглийсса финансирттал шинайнсса ва пландалийсса чIумуйнсса бюджетрал политика ва бюджетирттал дянивсса арарду дузал даврил агьамми ххуллурду).
Ва гьартасса мероприятиялий гьуртту хьунни сайки 300 инсан, миннавух бия республикалул министерстварттал ва идарарттал, шагьрурдал ва районнал вакилтал.
Пленар заседаниялий махъ лахълай, Дагъусттаннал бакIчинал бувсунни бюджетрал план дуван ва бюджетирттал дянивсса арарду бартдигьин аьркинну душиву хъинну хъирив лавну, гьарзат хIисаврайн ларсун.
Региондалул каялувчинал тIимунийну, бюджетрал политика сакин даврил масъалартту ччянияцIава ххал бигьин аьркинну бивкIун бур.
– 2022-2024 шиннардил иширттал чIалачIи буллай бур жула муниципал сакиншиннардаву бюджетрал ва бюджетирттал дянивсса арардал политика сакин даву аьркинсса даражалий дакъашиву. Му исват дуллай бур Счетная палаталул давуртталгу. Диялдакъашивуртту шиная шинайн тикрал хъанай дур ва системалийн кIура даллай дур. Республикалул экономика сакин даврийн агьамсса асар биян баврил проблемарттаву бур налогру датIаврицIун, ва закупкарттацIун бавхIусса масъаларттугу, – кунни Меликовлул.
ДР-лул финансирттал министр Шамил Дабишевлул бувсунни республикалул хьхьичIсса захIматшивурттая ва задачарттая, мукунма бувсунни ми бартбигьинсса ххуллурдая. Ванал тIимунийну, 2025-ку шинал кIанттул бюджетирттавун бучIантIий бур 17,5 млрд къурушрал.
Дабишев лаивзунни властьрал органнал каялувчитурайн, цахьрасса цинярда луртанну ва каширду ишла дурну, гьарзану ласун цалами доходру.
ДР-лул дуккаврил ва элмулул министр ЯхIъя Бучаевлул махъ лавхъунни Дагъусттаннай дуккаврил программартту бартдигьинсса харжлугъирттал хIакъираву.
Республикалул Счетная палаталул председатель Билал ЖахIпаровлул бувсунни, муниципал сакиншиннардаву бюджетру сакин ва биттур буллалийни, системалийнусса диялдакъашивурттал хIакъираву.
БатIаврий ххал бивгьунни цаймигу масъалартту.
ХIадур бувссар
ХI. Аьдиловлул
