Дагъусттаннал бакIчи Сергей Меликовлул ноябрьданул 29-нний «тIайланнасса эфирданий» агьалинал суаллахьхьун жавабру дулаврил хIакъираву цалва пикрирду бувсунни республикалий махъ нанисса инсантурал, къуллугъчитурал, депутатътурал, жяматийсса ишккаккултрал. Цаппаранналсса хьхьичIун ласлай буру.
Аьбдулмуслим Аьбдулмуслимов, республикалул ХIукуматрал хъунама:
– Сергей Меликовлул гьарца «тIайланнасса эфирдания» махъ хIукуматрал хьхьичI бишай микку гьаз бувсса масъалартту. Ванал бувсунни цукунсса бущилий най дуссарив, чун дирну дуссарив республикалул агьамшиву дусса проектру. Вайннувух МахIачкъалаллал коллекторданул, ххиличIрурду ххилаххаврил, ххуллурду ххуй баврил масъалартту. Аьдатрайн бувну, чIявусса суаллу бия ЖКХ-лул масъаларттацIун бавхIусса. Вай циняв масъалартту махъ ппурттуву лябуккулий щаллу буллай буссар. Цакуну циняв бартбигьин къашайссар, ятIапрай, куннил хъирив кув най буссар. Бия шяраваллил хозяйствалул продукциялуцIун бавхIусса суаллугу. ХIакьину жучIава буллай буссар ахънилсса, ахъулсса ядувайсса кIантту, вайннулсса буллалисса предприятиярттугу. ЧIаланну гьаз хьуссар шяраваллил хозяйствалул продукциялия мюнпат ласунсса даву. Гьаз бунни педагогтурал ва медициналул зузалтрал харжру лахъ баврил хIакъиравусса суаллугу, ва даврихагу жу зий буссару, хIукуматрал кашилух бурувгун, чан-чанну тIий гьаз буллантIиссару.
Аьбдуразакь Жамалуттинов, Дагъусттаннал Информациялул ва печатьрал агентствалул каялувчи:
– Шанна ссят ва дачIинний агьалинал суаллахьхьун жавабру дуллай, Сергей Меликовлул бувчIин бунни ялун нанисса шиннардий хъунмур къулагъас дикIантIишиву социал-экономикалул тагьар къулай даврих, агьалинал маэшат гьаз баврих. Хъуннасса къулагъас дия мукунна СВО-лий гьуртту хъанахъиминнал кулпатирттал масъаларттах, вагу агьамсса давур, чиваркI билаятрал мурадру буручлай, дунияллул мюхчаншиву дуручлай бунува, вайннал кулпатру аякьалийн ласаву хьхьичIунну ккаклай ия. Аьмну Сергей Меликовлул ккаккан бунни, цува агьалинал къювусса масъалартту бартбигьинсса ххуллурду, чаранну ккаклай ушиву.
Юсуп МахIаммадов, Лакрал райондалул хъунама:
– ТIайланнасса линия – Дагъусттаннал бакIчинахьхьун суал булунсса сантри, ва ишла дуван республикалул агьали чялиш бувккун бикIай. Сергей Меликовлул балжисса жавабру дуллунни гьарца суалданухьхьун. Укунсса цIухху-бусулийну аьч шай агьалинал цIуцIи кIанттурду, жяматрал оьрмулул шартIру, багьу-бизу, маэшат, социал тагьар къулай дувансса чаранну ччясса мутталий ххал бигьинсса хIалу дагьай. Республикалул хъунаманал агьалинал гьаз бувсса суаллал хъирив буккан, ялув бацIаву дуван тапшур бувай. На дакI дарцIуну ура, гьарцагу масъала бартбигьинсса чаранну лякъинтIишиврий, цавагу къулагъас къадурну къаличIантIишиврий.
Юсуп Умавов, МахIачкълаллал мэр:
– На хьунаавкьура НурбахIандовлул цIанийсса кучалийсса чIявусса квартирарду бусса къатраву яхъанахъиминнащал. Вайннал Сергей Меликовлущалсса «тIайланнасса эфирданий» баян бувна строительствалул кьаралдануцIун къадаркьусса давуртту дуллай бушиву объектрай. Вава иширал хIакъираву агьали хьхьичIвагу аьрзирай бувкссия строительствалул даврил ялувбацIаву дуллалисса управлениялийн, тани объектрал заллу лякъин къавхьуна, застройщик цува тай давурттавух хIала акъашиву исват буллай ия. Ци бухьурчагу, къадагъа дирхьуну, давуртту дацIан дурссия. Яла Ленинский судрал хIукму бувна мансардалул зиву дувансса ихтияр душиву залуннахь, вагу цIуницIа сукку хьуну ия мансарда дуллай. Уттигу къадагъа дирхьуссар, агар заллу гихунайгу зурча, судрахьхьун улунтIиссар. Шиккува кIицI лаганна, Дагъусттаннал бакIчинал «тIайланнасса эфирданийн» бувкIсса гьарца суалданух къулагъас жугу хIура къадантIишиву.
