Ноябрьданул 27-нний Дагъусттаннал бакIчи Сергей Меликов хьунаавкьунни хасъсса аьралий операциялул гьурттучитуран ва миннал кулпатирттан кумаг буллалисса, чIарав бацIлацIисса жяматийсса идарарттал каялувчитуращал.

Дагъусттаннал бакIчина­щалсса хьунабакьаврийн оьвкуну бия аьралий операциялул иширттан чялишну кумаг буллалисса хъаннийн –волонтертурайн ва СВО-лийн арсру тIайла бувксса ниттихъайн.

ХIакьинусса кьини аьралий операциялийн ряха арс тIайла увккун ур Табасараннал райондалийсса Акка тIисса шяравасса Углангерек ХIажиибрагьимовал. МахIарамкантуллал райондалийсса Гапцах тIисса шярава­сса Гава Султановал кулпатрава СВО-лий гьуртту хьун лавгун бур ца душ ва шама арс.

Республикалул бакIчинал бавтIцириннахь барчаллагь увкунни ва лавайсса кьимат бивщунни Ххувшаву гъан даву мурадрай буллалисса захIматрахлу. Хаснува барчаллагь увкунни билаятрай захIматсса тагьар хIасул хьусса ппурттуву хъуннасса хъар лахълахъисса, чIявусса оьрчIру бусса кулпатирттахь ва волонтертурахь.
– Аьралий операциялий арсру гьуртту хъанахъисса нитти­хъул хIакьину цинявннан эбратну бикIан аьркинссар. ЦIанагу вайннал, цала арсурваврал чIарав бацIаву бакъассагу, цивппа кунмасса цаймигу ниттихъал, кулпатирттал дакIру данмур буллай, кьянкьа буллай бур.

ЗахIматсса чIун ялун дирний хъаннин мудангу хъунна­сса хъар лахъан багьай. ЦIанагу жула ниттихъал, душваврал, ужагъругу ябувну, оьрчIаха аякьагу дурну, Ватандалул мурадру буручлачисса арсурваврал дакIру данмургу буллай бур. Аьра­лий операциялул ишру нанисса кIанттайн тIайла дуклай бур посылкартту.
Сергей Меликовлул кIицI лавгунни, хъами-волонтер­талгу хъис личIи бакъашиву аьра­лий операциялул гьурттучитурая.
ХIакьину вай гуманитар кумаг бавривух хIала буххаву ба­къассагу, хьхьичI ххуттай талатисса аьралитурал ва миннал кулпатирттащалсса дахIаву дан кумаг буллай бур. Зу кунма ас-намус бусса, уздансса, аькьил­сса ниттихъул жула аьралитурал махъ буссаксса, ххувшаву ласунсса вихшалагу хъиннура цIакь хъанай дур, – увкунни Республикалул бакIчинал.

Ва кьинисса хьунабакьаврий гьуртту хьунни Аьрасатнал Вирттаврал ниттихъул, миннавух бия, вай гьантрай Аьрасатнал Виричунал цIа дуллусса МахIаммад Исбакиевлул нину, Марина Исбакиевагу.

– ХIакьину шиккун бувкIсса цинявппагу ниттихъул мяйжаннугу лайкьну оьрмурду бичлачисса, цинявннан бусрав­сса, ххаллилсса инсантал бур. Дагъусттаннал хъами мудангу бивкIссар аькьилшиврул ва чумаршиврул лишанну. Зу тарбия бувсса оьрчIая Ватандалул мурадру хьхьичI ххуттай бивхьусса, цинявннан эбратрансса вирттал хьуну бур, – увкунни Сергей Меликовлул.
Региондалул бакIчинал, СВО-лий гьуртту хъанахъисса аьралитурал нитти-буттахъая бакъассагу, бувсунни вайннал ттаттахъаягу.
– ЦIанасса ппурттуву, оьрмулул угьара хьусса, бусравсса инсаннал кулпатрава аьралий операциялул зоналий гьуртту хъанай ур шама арс ва ца арснал арс. Укунсса кулпатру цинявппагу аякьалийн лавсун бикIан аьркинссар, – увкунни Республикалул бакIчинал.
Хьунабакьаврий Сергей Меликовлул хъуннасса къула­гъасрайн ларсунни жяматийсса идарарттал дуллалисса давуртту ва миннун лайкьсса кьимат бищаву.
Аьралитурал чIарав бацIаву мурадрай дуллалисса давур­ттахлу жяматийсса идарар­ттайн барчаллагь баян бунни. Дагъусттаннал бакIчинащалсса хьунабакьаврий гьуртту хьунни Хасавюртуллал райондалиясса урчIва оьрчIал ппу, СВО-лий аьпалул хьусса цала уссилми оьрчIругу тарбия буллалисса ОьмарасхIаб АхIмадов. Ва ччя-ччяни лагайсса ур аьралий операциялийсса аьралитуран гуманитар кумаг биян бан.

– ОьмарасхIаб ур цинявннан пахрулунсса инсан. Ванал аьралитуран кумаг баву бакъассагу, уттигъанну кIул хьуну бур, ва щихьчIавгу къабувсун, цала машиналий лавгун ивкIшиву Къазахъисттаннай щинахьхьун биривсса инсантуран аьркинмур диян дуван. Цала чулухасса кумаггу бувну, щинчIан хIисав къахьунну, махъунай зана хьуну ур. Къазахъисттаннал инсантал бивкIун бур сайки дачIи шинай чумартсса тIул дурсса инсаннах луглай.
ХIакьину на тIалав буллай ура «Все вместе» тIисса фондрал каялучитурая, ва чумартсса инсаннал кулпатран, оьрчIан кIулшиву дулаврил ва медициналул чулухасса кумаг щаллу баву. Ванал исват бунни цува унгу-унгусса патриот, зунтталчу ва хIакьсса дагъусттанлув ушиву. Барчаллагь вин ОьмарасхIаб, – увкунни Сергей Меликовлул.
Республикалул бакIчинал бувсунни ванахава лавхьхьу­сса цамагу патриотная – Шамил Жамалуттиновлуя.

Къизлярдал райондалул депутат Шамил Жамалуттинов­лул, цала сакингу бувну, аьрали­турачIан биян буллай ур гуманитар кумаг.
– Ванал хIачатрайну 200-хъул тонна гуманитар кумаграл диян дурну дур 177-мур полкравун, «Каспий» батальондалувун ва ванил подразделениярттавун. Жула аьралитал ссахчIав мюхтаж хьун къабитаву мурадрай, харж дуллай ур цалла арцу, – бувсунни Республикалул бакIчинал.
Сергей Меликовлул мукунма бувсунни Луганскаллал областьрай цала харжирацIух аьра­литуран дукрарду дуллай ивкIсса ц1игьур ва ишбажаранчи ГъазимахIаммад Гъазима­хIамма­довлуя.

– ГъазимахIаммад цимилагу лавгун ур Луганскаллал ва Запорожскаллал областирдайсса аьра­литуран ва тикку­сса инсантуран дукрарду дуллан. Дукра даву дакъассагу, ванал СВО-лийсса аьралитуран дуки-хIачIиягу диян дурну дур. Цала буллалисса кумаг ва ур щинчIав кIул къахьунну буллай, – увкунни Сергей Меликовлул.
Республикалул бакIчиначIан бувкIсса цинявппагу инсантурал захIматран кьимат бишлай, дуллунни вайннан Дагъусттан Республикалул паччахIлугърал наградартту.
Аьралий операциялул ишир­ттаву чувшивуртту кка­ккан дурсса, ялун нанисса никиран эбратрансса къучагъсса арсру тарбия бувсса Углангерек ХIажиибрагьимован, Марина Исбакиеван, Сабина МахIаммадован ва Халида Меликован дуллунни ДР-лул III-мур даражалул ХIурматрал орденну.
«За вклад в патриотическое воспитание молодежи» тIисса АхIмад-Хан Султаннул цIанийсса медальлу ва ДР-лул ХIурматрал грамотартту дуллунни хасъсса аьра­лий операциялий гьуртту хъанахъисса аьра­литуран кумаг буллалисса ни­ттихъан.
Ахирданий Сергей Меликовлул кIицI лавгунни укунсса хьунабакьавуртту ччя-ччяни дуллан тIий ушиву.

Имара Саидова