Энергетикалул сфералуву Дагъусттаннал чичин най дур цIусса лажин. АрвахIкьини, ноябрьданул 27-нний, ЦIуссалакрал райондалий, цIусса миналий, шадлугърал даражалий бувтIунни мурчай электростанциялул цалчинсса гьану.

Шикку гьуртту хьунни Да­гъусттаннал бакIчи Сергей Меликов, Аьрасатнал экономикалул министрнал хъиривчу Сергей Назаров, «Росатом. Возобновляемая энергия» АО-лул Строительствалул организациялул управлениялул хъунама Олег Булаивский.
Аьдатрайн бувну, мурчай электростанциялул гьану бутI­латIиний чIанулу дирхьунни каний дахIай ссят.
Электростанция бикIан тIий бур 120 мурчал установка дусса. Гьарица установка дикIан тIий дур 2,5 МВт гуж бусса. Электростанция аьмну 300 мегаваттрал гуж бусса бикIантIиссар. Ва буллантIиссар 2 ятапрай. Цаппара установкартту(61) зузи дантIий дур 2025-ку шинал, вайми (59) – 2026-ку шинал. Ва даву дузрайн дуккан дан дучIан дурну дур 150-нния лирчусса строительствалул техника ва 190-нния ливчусса зузалт ва пишакартал. Проект щаллу даврийну 70 инсаннан муданма зун­сса кIанттурду хьун най бур. Му бакъассагу, строительствалул давуртту наниссаксса хIаллай дикIантIий дур 300 инсаннансса даву.
Мурчай электростанция буллалисса кIанттай шиккува зий бур ссятрай 140 кубометр бетондалул дайсса завод.
МуницIун кIункIу бувну бур аьмну 200 кубометр бетондалул ссятрай дайсса 3 завод цаймигу.
Мурчай электростанциялул гьану бутIаврил мажлис тIитIлай, ихтилат бунни Сергей Меликовлул.
– Дагъусттан бур цIудук­лакисса энергетикалул сфера хьхьичIуннай дансса тIабиаьтрал ресурсру ва потенциал бусса субъект. ХIакьину Дагъусттаннал энергетикалул тарихраву цIусса лажин ххи хьунни: цайми регионнащал архIал жула республикагу сукку хьунни цIусса журалул энергия ишла буллан. Гьарица укунсса проектрал, сетьру цIу дуккан даврицIун, жула халкьуннан бигьа-рахIатшивугу дуллалиссар. Республикалий бур бургъил, мурчал ва щинал хъунмасса потенциал. Мунийну ва сфералувусса проектру зузи дансса инвестортал кIункIу бан бюхълай бур. Укунсса объектирдал энергиялул гьава ва лагма-ялттусса кIанттурду чапал буллай бакъар.
2022-ку шинал Дагъусттаннал ХIукуматрал ва «Росатом. Возобновляемая энергия» АО-лул кьутIи дурссия хIала-гьурттуну зун. ХIакьину жува бавтIун буру ЦIуссалакрал мурчай электростанция буллалииса давурттал дайдихьу дан. Ва электростанция хьунтIиссар билаятрай яла хъуниминнувасса ца. Ванийну жула региондалул агьалинан тамансса зузи кIанттурду хьунтIиссар ва республикалул бюджетравун мадарасса налогру дачинтIиссар. Инфраструктуралул цIусса объект тIитIаврицIун, ва хъанахъиссар экологиялул чулуха марцIсса энергия ишла буллансса чараннугу.
Ва даву дузрайн дуккан дан хъун­масса захIмат бивхьу­ссар ХIукуматрал, инвестортурал, подрядчиктурал, кIанттул властьрал. МукIрура ва проект Дагъусттаннан пахрулунсса, щалагу Аьрасатнан эбратрансса хьуншиврий, объект чIярусса шиннардий республикалунгу, билаятрангу хъунмасса мюнпат буну зуншиврий,– увкунни республикалул бакIчинал. Ванал барчаллагь увкунни «Росатом. Возобновляемая энергия» АО-лухь Дагъусттаннал социал-экономикалул даража гьаз баву мурадрай дуллалисса даврих.
– Мурчай энергетикалул сфералуву жула регион хьхьи­чIунсса компаниярда­щал зий душиврул барашинна дуллалиссар региондалул тIабиаьтрал шартIру инсантуран мюнпатну ишла дуллантIишиврул, – увкунни ванал.
– Дагъусттаннай хIакьину лябукку буну дур шяраваллил хозяйство, промышленность, туризм. Анаварсса бущилий хьхьичIунмай нан бюхъантIиссар электроэнергиялул дузалшинна духьурча. Дагъусттаннай электричество цайми кIанттурдайнияр ххишалану ишла дуллай бур. ЦIуссалакрал мурчай электростанциялия хъунма­сса кумаг хьунтIиссар регион хьхьи­чIунмай шаврин.
На барчаллагьрай ура «Росатом.Возобновляемая энергия» компаниялун ва ххаллилсса сипталух. Проект дунияллийн дукканшиврул республикалул чулухасса сиптагу, инвестортурал чулухасса бувчIлачIавугу аьркинссар. Ва ишираву циняв цалийн бувкIунни. Умуд бур, республикалий цаймигу проектру зузи дан хьунссар тIисса. Ши­кку ххуйсса шартIру дур мурчал чулухагу, кIанттул чулухагу. На бараллагьрай ура республикалул хъуниминнайн, Энергетикалул министерствалийн ва даврил чIарав бавцIусса, – увкунни Сергей Назаровлул.
– ХIакьину Аьрасатнал карталий ца ттигу регион ххи хьу­ссар Росатомрал хIарачатрайну цIушинна хьусса. Дагъусттаннай хъунмасса мурчай электростанциялул гьану цIакь бувссар.
Мурчай парк баврийну шиккусса агьалинан ххуй­сса шартIру хъанахъиссар. Бакьин бантIиссар ххуллурду, хьунтIиссар инсантал зун­сса кIанттурду, ишла буллан тIиссар экологиялул чулуха марцIсса энергия, – кIицI лавгунни цала ихтилатраву Олег Булаивскийл.
Ихтилатру къуртал хьуну махъ цинявппа кьатIув був­ккунни мурчай электростанциялул гьану бутIлатIисса кка­ккан.
Андриана Аьбдуллаева