Ттизаманнай мобил телефон дакъа инсаннаща нажагьсса дакъа даву дуван къашай. Ялу-ялун ххишала хъанай дур мобил устройствалул каширду ишла дурну дуллалимур. Хаснура махъа нанимур никирал. Ттигъанну Кlундиннал дянивмур даражалул школалул 11 дуклаки оьрчl гьуртту хьунни «Разработчик мобильных приложений» тlисса пишакаршиврул бюхъу ххал буллалисса давривух.
Ва хьунни Махlачкъалалив Р.Н. Аьшураьлиевлул цlанийсса Технический колледжраву, «Успех каждого ребёнка» тlисса цlанилусса региондалул проект иширайну щаллу даврил лагрулий. Ва дур «Билет в будущее» тlисса 6-10-ми классирттал оьрчlансса ччясса профориентациялул проект. Ва кьини дуклаки оьрчlру бия мобил приложениялул разработчикталну. Укун, оьрчlал ххал бувна ттизаманнай ца яла тlалавмунин ккаллисса пишалуцIун бавхIусса цалва бюхъу-гьунарду. Ва хьуна бучlантlимунийнсса мяйжаннугусса билет.

Бадрижамал Аьлиева