Ноябрьданул 25-нний Москавлив, Мультимедиа Арт Музейраву, композитор, мультиинструменталист, дирижер, Франциянаву яхъанахъисса Камил Чаллаевлул (машгьурсса композитор Ширвани Чаллаевлул арсри) ва композитор, продюсер Николай Голутвиннул «Уджаз» тIисса дуэтрал концерт ккаккан дунни.
КIия машгьурсса музыкантнал программалуву классикалул, фри-джазрал, минимализмалул ва электроникалул такьварду хIала дурххуну дур. Программа дачин дурну бия кIицI лавгсса Арт Музейрал хъунмур, цIанихсса искусствовед, кинорежиссер-документалист, философиялул элмурдал доктор, профессор Ольга Свиблова.
– Камил Чаллаев шяравучу ухьувкун, ванал чIарав бацIан аьркинни тIисса кунма, бувк1ссияв концертрайн, хъинну ххуйсса концерт хьунни, Камиллул бакъассавагу гьунар бакъар, ччимур музыкалул инструментрай макьанну руцайсса пагьмулул заллу ур, на кунма цинявгу рязину бия концертрая. Концерт къуртал хьуну махъ жу Камил Чаллаевлущал цащалвагу ихтилат буварду, бусарду мунал гьунарданий хIайранну бушиву», – увкунни Хъусращиял шяравасса Оьмариева Зираял.
Камил щаллагу дунияллий машгьурсса композитортуращал ва музыкантътуращал уртакьну зузисса, музыкалул терапия машгьур дуллалисса инсан ур. Кулпатращал, хореограф Сабин Жамещал Арманинавун оьвкуну, вай тийх зий бусса бур аутизм ягу ДПЦ дусса оьрчIан музыкалул хъин буллалисса терапия душиву исват буллай. Дунияллул халкьуннал инструментру Камил Чаллаевлул цащала Парижлия лавсун бур. Ванал мушакъатсса инсантуралсса буллалисса Арманинал фондращал арулла шинайсса кьутIи чирчуну дур, цала студиялуву инжитсса оьрчIру музыкалул кумаграцIух хъин буллан.
ПатIимат Рамазанова
