Аьбдуллагьлул душ Жарият Ибрагьимова
Вай гьантрай аьпалухьхьун лавгунни ххаллилсса хъамитайпа, Аьштти-Ккуллал махIлалий бусравсса Ваччиял Шагьмилавхъал Аьбдуллагьлул ва ЧIяйннал Щайххухъал Халуннул душ Ибрагьимова Жарият.
Жарият бувну бур 1945-ку шинал ЧIяйннал шяраву къуллугъчинал кулпатраву. Хъинну ххуйсса кьиматирттай ЧIяйннал дянивмур даражалул школагу къуртал бувну, бувххун бур Дагъусттаннал университетрал строительный факультетрайн. Ва хъанай бия лакку душвавраву му касму хьхьичIра-хьхьичI ларсъсса бусравсса инженер-строитель. Госэкзаменнай комиссиялул вакилну гьурттушинна дуллай ивкIсса «Даггражданпроектрал» директор Штанчаев Закир Шяпиевичлул ванил дипломный даврин хъинну лавайсса кьимат бивщуну, Жарият тIалав бувну бивкIссар цала институтравун, инженер-проектировщикнал жаваблувсса даврийн.
«Даггражданпроектрал» институтраву Жарият буссия проектировщиктурал группалул хъунмурну.
Жариятлул хIурмат цуппа зий бивкIсса институтраву бакъассагу, щала Дагъусттаннал строительствалуву зузиминнал дянив хъунмасса бивкIссар, ванил сурат иститутрал хIурматрал улттуй диркIссар чIярусса шиннардий, ванин дуллуссар «Заслуженный строитель Дагестана» тIисса цIа, ВЦСПС-рал ХIурматрал грамота ва чIярусса бахшишру.
Аьбдуллагьлул ва Халуннул кулпатраву Жарият бивкIссар хъунмур, вайннал нину Халун – «Мать Героиня». Ниттингу ва хьуссар кумагчину гьарца давриву. Щар хьуну махъ ласнащал, РахIинхъал Ибрагьиннущал, цила щала оьрму хас бувссар эбратрайсса тарбиялул бувччусса оьрчIан ва душвавран, ванил хIурмат хъунмасса бия ласнал мачча-гъанначIа.
Жариятлун хъинну ххирасса бия цила мачча-гъанми, буттал ва ниттил ляхъин, ласнал маччами. Ва бия ях1-намус бусса, марц1сса, х1алимсса зунттал хъаннил яла ххуйми хасиятру дусса инсан, чаннасса дакIнил ва марцIсса пикрилул заллу.
Хъуннасса кьурчIишивугу кIидачIлай, дакIнийхтунусса жижара буллай буру ласнахь Ибрагьиннухь, арснахь Арсеннухь, душваврахь Зулпалухь, Анжелахь, уссурваврахь ТIалхIатлухь, Гьадинахь, Аьбдуллагьлухь, ссурваврахь Миясатлухь, Раисатлухь ва махъсса мачча-гъаннахь, цинявннанмагу ххирасса Жарият дунияллия батIул шарийн бувну.
Цин алжаннул къапурду тIивтIуну лякъиннав, гьав нурданул дуцIиннав, махъминнал оьрмурдай барачат бишиннав.
ЧIяйннал ва Ваччиял
жяматирттал цIанияту
Шалласу Шалласуев
Апаннинал арс Ссамадов Шамил
Ноябрь зурул 10-нний 2024-ку шинал, захIматсса азардануща ххассал уван къавхьуну, оьрмулул 69 шинаву аьпалул хьунни Апаннинал арс Ссамадов Шамил.
Шамил увну ур 1955-кусса шинал ЧIяйннал шяраву. Мяйва класс къуртал бувну махъ дуклан увххун ур МахIачкъалаллал ГПТУ-лувун слесарьнал пиша лахьхьин. Муния махъ армиягу лавхъун, зун увххун ур МахIачкъалаллал СМУ-5-райн слесарьну.
Цала даврил даража лахъ хьуншиврул 1987-ку шинал дуклан увххун ур Орджоникидзеллал муххал ххуллул транспортрал техникумравун, лавхьхьуну бур техник-эксплуатационникнал пиша. 1994-ку шиная шинай зий ивкIун ур Домоуправлениялул участокрал мастерну.
Цала бувайсса кушу ванал байва дакIнийхтуну. Мачча-гъаннал ва дустурал дянивгу хIурмат-кьимат лавайсса инсан ия.
Шамиллул, цала кулпат ХIаващал, хъунигу бувну, чивун буккан бувну бур кIия оьрчI ва ца душ.
Цува зузисса, захIмат буллалисса кIанттурдай ванал хIалал дурну дур диялсса хIурматрал грамотартту ва барчаллагьрал чагъарду. Ва ур ЗахIматрал ветерангу.
Шамил аьпалул шаврил кьурчIишиву кIидачлай, жижара буллай буру ванал кулпатрахь ХIавахь, арсурваврахь Казбеклухь ва Аьзизлухь, душнихь Дианахь, уссихь, ссурваврахь ва махъсса цинявппагу мачча-гъаннахь. Алжаннул ххари аннав, рухI бигьаний дишиннав.
ЧIяйннал жямат
Кьурбанисмяиллул душ Давудова ПатIимат
Вай гьантрай жуятува лавгунни, хъинну инсантуращал бавкьусса, иминсса, цинявннан ххирасса, гьарцаннан эбратсса инсан. ЧIивисса чIумалва байбивхьуну, колхозраву бикIу, къушлий бикIу, хъунмасса захIмат бувсса хъамитайпая Даудова ПатIимат (БатIа).
Арулва оьрчI бусса Кьурбанисмяиллул ва ПатIиматлул къушлий хъунма хьусса БатIа, 1949-ку шинал Хъун дяъвилул хIаписар Даудов ХIажинащал ташу бувну, 67 шинай нахIуну, хIалалну яхъанай буссия. Вайннал хъунигу бувну, лайкьсса тарбиягу дуллуну, чивун буккан бувссар ххюва оьрчI.
Цила кулпатраву бикIу, гъан-маччаминнал ва чIахху-чIарахнал дянив бикIу, гьарцаннанма бусравсса, ххирасса инсан буссия БатIа.
ГьунчIукьатIрал жяматрал чулуха БатIа накьлу шаврил кьурчIишивугу кIидачIлай, дакIнийхтунусса жижара буллай буру ванил оьрчIахь, ссурваврахь, гъан-маччаминнахь.
БатIа имандалий лавгун лякъиннав, гьав нурданул дуцIиннав!
ГьунчIукьатIрал ккурандалул председатель
ХIусайнахъал ХIажибутта
МахIаммадлул арс Оьмаров Оьмари
Вай гьантрай, хар-хавар бакъа дунияллия лавгунни Цалчинмур ЦIувкIратусса ххаллилсса зунтталчу, захIматрал ветеран, Ххяллух МахIаммадлул арс Оьмаров Оьмари.
Дяъвилул хъиривсса шиннардийн оьрчIшиву тIайладарцIусса ванан ччянива захIмат буллан багьну бур, хъу-лухччинул давурттугу, ичIаллилссагу дуллай. ХIарачат бусса, дуккавриву итххявхсса ванал 1956-ку шинал ххуйну къуртал бувну бур ЧIяйннал школа, яла аьралий буржгу бартбивгьуну, 1960-ку шинал дуклан увххун ур Москавуллал кооперативный институтравун. Товароведнал касмугу лархьхьуну, Дагъусттаннайн зана хьуну ур. Буйнакскаливсса Кооперативный колледжраву преподавательну зий айивхьуну ур.
Цаппара шиннардива Дагпотребсоюзрайн зун увххуну, личIи-личIисса давурттай зий ивкIун ур. Даву ххуйну кIулсса, низам ххирасса ва ДагКООПторграл директорнал хъиривману ивтун ур. Лайкь хьуну ур медальлан, хIурматрал грамотарттан. Ва архIал зузиминнал, даврил уртакьтурал дянив хIурматрай ивкIун ур.
Учарухха, ххуйсса кулпат нясив шаву адаминал тIайлабацIур куну. Элмурдал академиялуву зузисса ТIажиблул душ Луизащал ванал ххуйсса тарбиягу дуллуну, чивун буккан бувссар арс Эльдар ва душ Эльмира. Ххари хъанай уссия ва душнил оьрчIал хьхьичIуннайшивурттая, хаснува тхеквандолул спортрал мастер, Дунияллул первенствардай хьхьичIунсса кIанттурду бувгьусса АьбдурахIманнуя. Ва ххирассия ЦIувкIуллал жяматран, мачча-гъаннан, гьарнан шайсса кумаг байсса, иширачIа чIарав ацIайсса адамина уссия.
Оьмари дунияллия лагаврил кьурчIишиву кIидачIдай, жижара буллай буру ванал кулпатрахь, арснахь, душнихь, наслулухь, ссурваврахь, цинявппагу гъан-маччацириннахь. Алжаннул ххари аннав, махъминнал оьрмурдай барачат бишиннав!
Цалчинмур ЦIувкIуллал
жямат
