Дагъусттаннал бакIчи Сергей Меликовлул ноябрьданул 25-нний баян бунни Да­гъусттанная ацIния шамилчинма инсан СВО-лийсса Аьра­сатнал Виричунал цIукун лайкь хьушиву, му Виричугу МахIаммадлул арс МахIаммад Исбакиев ушиву. Бу­ттангу, арснангу цара ца цIа дур.
Хъирив кьини Меликов хьунаавкьунни Виричунащал, ниттищал ва ссийщал. Ванал бувсунни республикалул хъуними МахIаммадлул кулпатрал ва ниттил чIарав бацIан хIадурну бушиву. МахIаммадлул ниттилгу барчаллагь кунни республикалул хъунаманахь ва арснал аьралий дустурахь: «ЗахIматсса ппурттуву циняв дустал чIарав бавцIунни, мудан оьвтIий бур, цIухху-бусу буллай бур», – увкунни ванил. ДакIнин бутан, 2022-ку шинал лейтенант Исбакиев каялувшиву дуллалисса группа Херсоннал областьрай кьянкьану бавцIуну бу­ссия, ца кьинилул мутталий кьунниха лирчусса техникагу ххит дурну, кIиттуршунниха ливчусса боевикталгу кьатI бувссия. Щаву дирну унува, МахIаммадлул гьалмахтурангу къалханну авцIуну буручлай, группалул хъунамашивугу дурну, кьянкьану авцIуну уссия. ХьхьичI бивхьусса бигар бартбивгьуссия, цалламур жан кьурван дурну октябрь зурул 22-нний 2022-ку шинал. Ва гьунардания бувсъссия Аьрасатнал президент Владимир Путиннухь, МахIаммадлущал ца полкраву ивкIсса гвардиялул майор Денис Диденкол «Вирттаврал чIун» тIисса проектрал гьурттучитуращалсса хьунабакьаврий. Президентнал махъ буллуна ва иширал хъирив лавну, Виричунан лайкьсса кьимат бищун.
МахIаммадлул нину лакку инсан бусса кIул шайхту, жу ваничIан оьвкуссия, МахIам­мадлул оьрмулия цIухху-бусу буван. Абсалуттиннул душ Марина ЧIукIнатусса лявкъунни. Ванил бувсунни МахIаммадлул ппу Гергебиллал райондалия, Аймаки тIисса шяравасса ушиву. Цувагу аьраличу, полковникнал чиндалуву къуллугъ кьабивтсса. Цуппа мюрщими классир­ттал учительница. МахIаммадма увну ур Якутиянаву, ппу аьраличу ухьувкун тикку къуллугъ буллай ивкIун ур. Тиккува бувну бур МахIаммадлул ссу Земфирагу. Яла вай Москавлив бивзуну бур. – ОьрчIниява спорт ххирасса ия, гимнастикалийн, футболданийн лагайссия, компьютердахун агьну икIайва оьннасса чIун дирияйхту. Нагу айтишник хьуния тIий бикIайссияв, компьютердал ишру ххуйну кIулсса ухьувкун. Ласнал ва арснал махъ ца бувну, Новосибирскалийсса Аьралий институравун документру булайхту, ттул къюкIливух чIила даркьусса кунмасса иш хьуна. КъавичIидирхьуна ва базилуву ттух. Цувама ттуй цIими бусса ия, цува Сириянаву, цаймигу регионнай аьралий командировкалий ушиву кьюлтI буллан икIайва, на хъювсул къабуклан. Зат къабусайва. Ттюнгъану акъа зума къаахъайва, «мамавагу» къаучайва, «мамуля, мамуля» бакъа. ТачIав чIу лахъ бувну бакъара. Ттул урчIакая, хаснува ппу дунияллия лагайхту, ттулгу, душнилгу балаллий икIайва. Амма, цуксса на миннатру булларчагу, армия къакьабивтуна. Спецоперация байбишайхту, бусайххивав ттухь цува аьрайн нанишиву, Чачаннавун талаталт хIадур буллай ура тIий ия. Чувшиврул Ордендалунгу лайкь хьуну ия. Ттун кIула, ттула арс цIаравун ххяххан хIадурсса ушиву, дакIниву мудангу буруккингу бия, къювугу дия. Июньдалийгу хьунабавкьуссияв на Дагъусттаннал бакIчи Сергей Меликовлущал. Ттухь бувсуна Меликовлул, Аьрасатнал президентнал администрация МахIаммадлул гьунарданун лайкьсса кьимат бищун хъирив лаллай бушиву. Цува Владимир Путин му иширал ялув авцIуну ушиву. Вана хIакьинугу оьвкунни ттуйн Республикалул хъунаманачIан. Ци чиви? Ххаришиву дикIанссия, цува сагъну уния. Пахру бикIанссия, цува сагъну унува буллуссания Мусил ЦIуку. Амма, аьраличунал арс ур, аьраличу ур, аьраличунал бурж бартбигьлай жан ххира къадунни. Армия кьабитан къахьунссар, вари ттул оьрму тIун икIайва. Аякьа дусса арсгу, ппугу ия. Москавлив тийхва ташу бувна, Анна тIисса оьрус душ щарну бувцуна. Буссар исвагьисса душ Мишель, ца ва душри буссагу. МахIаммадлун ваниха чIалачIин къадикIайва. Утти вайгу, нагу, ттул душ Заремагу яхI буллантIиссару хIаписарнал, командирнал, разведчикнал нину, ссу, кулпат, душ бухьувкун.
МахIаммадлул аьралий гьалмахтал ххассал буллай жан дуллуну душиву ванал гьалмахтуран бусравнугу, кIулнугу бур, дустурал миллион бур, оьвтIисса оьвтIийнма бур. Дур дуцири наградартту, утти Виричунал цIукугу ххи хьунссар, акъар цува. Жулва билаят буруччин аьралиталгу аьркиннихха тIун икIайва. ЯхI къабувнугу ци банссар, – тIий бур Марина.
ТIайлассар, чувшиву дусса арснал ниттин яхI къабуллай къашай­ссар. МахIаммадлул душ ччаннай бацIан буван аьркиннихха. Ласналгу, арсналгу цара-ца цIа душиврул хIакъиравугу, Маринал бувсунни, ласнал хъуннабаван мукун ччан бивкIшиву, ва цIанил зу буруччинтIиссару тIий. Чувшиву ххину дунияллийн увкма, билаятрахсса ччаву ялтту дурккун цIаравун ххявхма, цIанилгу цукун уруччинссар. Дунияллийн вир­тталну къаляхъайссар. Билаятрах­сса ччаврилли Вирттал бувай­сса. Амма билаятрах ччаву дуну арс тарбия авриву нитти-буттал бияла хъунмассар. Декабрьданул урчIунний Марина Москавлив наниссар, тиха арснал Мусил ЦIукущал бучIайхту, хьунабакьин икьрал дуварду жугу.
ПатIимат Рамазанова
Суратру Виричунал
ниттил архиврава