ЦIуссалакрал райондалийсса ЦIуссаккуллал шяравасса Щайх-ХIасанов ХIусман Кьурбаннул арс хасъсса аьралий операциялий гьуртту хъанай кIирахъул шинну хьунни. Хушрай контрактгу чирчуну, ва лавгун ур чIярусса шиннардий оьбалартту бухIлай бивкIсса Донбассуллал агьали неонацизмалия мурахас буллан. ХIусманнул исват бунни Ватан дуруччаврил цIаний кьамул бувсса хIукмулул хьхьичI цичIар къадацIайшиву.
Увну ур ХIусман 1978-ку шинал сентябрьданул 14-нний Тарумовскаллал райондалийсса Кочубей тIисса поселокрай. Хъуна хьуну ур ЦIуссалакрал райондалийсса ЦIуссаккуллал шяраву. ЦIуссаккуллал школагу къуртал бувну, дуклан увххун ур Буйнакск шагьрулийсса Художествалул школалийн. 1997-ку шинал лавгун ур Архангельскаллал областьрайсса Ракетный аьралуннаву къуллугъ буллан. Аьралуннава зана хьуну махъ, зий ивкIун ур райондалул виваллил иширттал отделданул полициялул зузалану. Мобилизовать хьуннинсса ппурттуву зий ивкIун ур РЖД-лий тепловозрай.
ХIусман цува рязину лавгун ур хасъсса аьралий операциялий гьуртту хьун. ИчIувами къарязину бивкIун бур ванал Ватандалул мурадру буруччаврил цIаний бувсса хIукмулия бусайхту.
– Хасъсса аьралий операциялий гьуртту хъанахъиминнан бакъа къакIулссар, цуксса ххари шайссарив цала ялун цайми аьралитал бучIайхту, – тIий ур яхI лавайсса аьраличу.
Аьралий операциялул иширттаву къучагъшиву ккаккан даврихлу лайкь хьуну ур ХIусман ПаччахIлугърал наградалун – Суворовлул медальданун.
ХIусманнул ниттичIан аьралий командованиялул частьрал командирнал чулуха бувкIссар къучагъсса арс тарбия аврихлу барчаллагь тIисса чагъар. Аьралий операциялий гьуртту хъанахъисса хIаллай, ванал тасттикь бунни цува кьянкьасса низам дусса, тапшур бувсса амру биттур бан хIадурсса, унгу-унгусса хIаписар ушиву.
Вай гьантрай Дагъусттаннал ХIукуматрал ХIусман Щайх-ХIасановлун дуллунни «Дагъусттаннал халкьуннал Виричу» тIисса бюхттулсса цIа ва Мусил ЦIуку.
Барчаллагьри укун къучагъсса арс тарбия увсса нитти-буттан. ХIусман ур жула аьрщарайсса паракьатшиву дуруччаврил цIаний нигь-ццах бакъа талатисса къучагътуравасса, жагьилсса никиран эбратрансса Виричу!
ЧIа учинну ХIусманнун ва жула цинявппагу аьралитуран ххувшавугу ларсун, цIуллуну-сагъну махъунмай зана шаву.
Имара Саидова
