Ноябрьданул 8-нний «Дагестан» МЦК-лий хьунни ветерантуращалсса ва Ватан дуруччултращалсса хьунабакьаву. Шиккун оьвкуну бия Авгъан дяъвилул ветерантурайн, 1999-ку шиналсса дяъвилул иширттал ва хасъсса аьралий операциялул гьурттучитурайн.

Мероприятие тIитIлай, ихтилат бунни «Дагестан» Москавуллал Культуралул центрданул президент Арсен ХIусайновлул. Ванал бувсунни МЦК-лул гьану бивзун цалчинсса гьантрайва шикку Ветерантурал совет сакин бувну бивкIшиву ва укунсса, ветерантуращалсса хьунабакьавуртту аьдатравун дагьну душиву.
– ЧIярусса шиннардил лажиндарай МЦК-лучIасса Ветерантурал советрай каялувшиву дуллай уссия бусалдаравун агьсса атомщик, Лениннул премиялул лауреат, профессор Амир Амаев. Амир Жабраилович дунияллия лавгун махъ ва даврил хъар цайнна лархъун, хIакьинусса кьинигу лавай­сса даражалий дачин дурну ур цалчинмур ранграл капитан, профессор, Авгъан дяъвилул гьурттучи ХIажи Аьлиев. Ветерантурал советрал хъуннасса даву дуллай буссар жагьилтал Ватан ххирану тарбия бан, миннал хъунмур никиращалсса дахIаву цIакь дан, жула билаятрал цIанихсса тарих ябан, – увкунни Арсен Буйдалаевичлул.
ХIажи Аьлиевлул кутIану бувсунни цала оьрмулул ва пишалул ххуллия, Авгъан дяъвилийсса гьурттушиннарая. МахIачкъалалив школагу къуртал бувну, ва увххун ур Бакуйсса Лавайсса даражалул аьралуннал ва хьхьирил училищалувун. Ва къуртал бувну махъ гьузуй ивкIун ур ЛухIи хьхьирил, Балтийский ва Северный флотирдал жамирдай.
– Ттун бахтти хьуссар Амир Амаевлулгу гьурттушинна дурну итабавкьусса «Ленинский комсомолец» тIисса цалчинсса атомный жамилий гьузун, – тIий ур ХIажи Сулайманович.
Махъ руководствалул ванайн тапшур дурну дур политикалул даву. Къуртал бувну бур Москавлив Военно-политическая академия, яла миккува преподавательнугу зун ивкIун ур. Совет аьрал Авгъа­ннал аьрщарайн бувхсса чIумал гьан увну ур Авгъаннал аьралуннал агьаммур политуправлениялучIа советникну зун.
– Авгъаннавун ачин хьхьичI кьини на уссияв хъамалу МолотовлучIа, Сталин увну 100 шин шаву кIицI дуллай. Чил билаятирттал иширттал министрну ивкIсса Вячеслав Михайловичлун ххуйну кIулну бия Авгъанисттан, тихун нанисса ттун мунал мюнпатсса маслихIатру бувна. Бигьану къабикIаншиву, кьянкьа дан аьркиншиву бувсуна. Мяйжаннугу, бигьану бакъая. Зува пикри бара, 29 провинциялия хьусса Авгъанисттан, захIматсса шартIру, чIумуйсса структура, – бувсунни ХIажи Сулаймановичлул тийхсса чIунну дакIнин дичлай.
«Дагестан» МЦК-лул Президиумрал член Абас Аьлишаевлул ихтилат бия 1999-ку шинал ЦIуссалакрал райондалий хьусса дяъвилул ишир­ттая, та чIумал Муслим Даххаев бакIчисса ЦIуссалакрал милицанал зузалтрал ккаккан дурсса чувшиврия.
– Муслим Даххаевлул усттарну бувсса операциялийну ххассал хьуссар чIявусса инсантурал оьрмурду, бувкссар боевиктурал вив лавсъсса кIанттурдая Липецкаллал ОМОН-далул аьралитал, – дак1нин бувтуна ванал.
Цинявннан бюххансса ихтилат бувна Дагъусттаннай хъунма хьусса Елена Викторовнал. Ванил дакIнин увтунни Дагъусттаннай виваллил иширттал министрну ва цаймигу къуллугъирттай ивкIсса цила ппу, виваллил къуллугърал генерал-лейтенант, Буттал КIанттул цIанийсса Хъун дяъвилул ветеран Виктор Свистунов. Бувсунни ванал чивчусса «Сыновья своего времени» тIисса луттирая.
– На ххарира нава Дагъусттаннай, МахIачкъала шагьрулий хъунма хьушиврия. Ттул оьрмулул цавай яла тIааьнми лахIзарду ДагъусттаннацIун бавхIусса бур. Ттун ххуйну дакIний бур жулва кулпат ялапар хъанай бивкIсса Лениннул ц1анийсса кучалийсса навт буккултрал къатта. Жул ялув буссия Мурад Къажлаевлул квартира. Мунияр махъ жу яхъанахъисса хIаятраву дия Расул ХIамзатовлул къатри, арх бакъа, Горькийл цIанийсса кIичIираву яхъанай ия Аьли Аьлиев. Укун цIанихсса инсантал бия жул лагма-ялтту. Цинявннащал хIала-гьурттуну, дусшиву дуну буссияв. Ххуйну дакIний дур Дагъусттаннай аьрщи сукку хьусса чIун. Хьхьувай циняв подъездирттава бувккун, квартирардавун буххан нигьа буслай бавцIуну бивкIсса куц. Му ппурттуву жул квартира Советская кIичIираву бия. Жул подъездраву ялапар хъанай бия Ильяс Умахановлул кулпат. На дакIнийхтуну барчаллагь тIий бура хIакьину ва хьунабакьаврийн ттуйнма оьвкуну тIий, хъиннува ххарину бура ттула ппу дакIнин увтун тIий, – увкунни ванил.
Хасъсса аьралий операциялул гьурттучи майор Шамил ХIажибековлулгу барчаллагь увкунни МЦК-лухь ва Центрданул президент Арсен Буйдалаевичлухь ветерантураха ва аьралитураха дуллалисса къулагъасрахлу.
Андриана Аьбдуллаева