Уттигъанну, Дагъусттаннал бакIчи Сергей Меликовлул тапшур бувну, Вишневскийл цIанийсса аьралий госпитальданийн, шикку реабилитациялийсса СВО-лул гьурттучитал ХIажимурад КазанбиевлучIан ва Азамат МаммаевлучIан бивунни Аьрасатнал ПрезидентначIасса Дагъусттаннал постпредствалул зузалт ва постпредствалучIасса Жяматийсса советрал вакилтал.
Вайннавух ия медициналул элмурдал доктор, Цалчинсса Москавуллал медициналул университетрал челюстно-лицевой хирургиялул кафедралул профессор, жула лаккучу Астемир Шайхаьлиевгу. Вайннал ххал дунни аьралитурал реабилитациялул шартIру, цала чулухагу, республикалул каялувчитурал цIаниягу чIа увкунни цIуллушиву.
ДакIнин бутан, щавурду дирсса ХIажимурад Казанбиевлул 21 гьантта бувну бур блиндажраву я щин, я дуканмур дакъа. Ва сагъну ливчIун ур, амма кIивагу ччаннацIа хьуну ур. Зана хьуну махъ, цанма буцин куну бивкIсса душнищал кулпат бувну бур.
Мукуна хасъсса аьралий операциялий щавурду дирсса Азамат Маммаевлул бувну бур кулпат аьралий госпитальданий хьунабавкьусса, цала дакIнил лавсъсса душнищал. СВО-лул гьурттучитурах мудангу хъуннасса къулагъас дуллалисса Дагъусттаннал бакIчи цувагу хьунаавкьуну ур кIиягу аьраличунащал. Ванал гьурттушинна дуллай ур миннал гьарица иширттаву.
