Гьашину 85 шинал юбилей кIицI ларгунни шаэр, прозаик, драматург, ДР-лул культуралул лайкь хьусса зузала, Дагъус­ттаннал халкьуннал чичу Мирза Щамхалович Давыдовлул. Юбилей цума-цанналгу оьрмулуву дурмунин кьимат бишлашисса, гихуннай дантIимунил пикрирду буллалисса чIун дур. Бусса оьр­мулий миллатрал литература хьхьичIуннай давриха зузисса шаэрная бусанссагу, учинссагу чансса бакъар.
Ва базилухсса «Илчи» кказитрал хъамаличугу Мирза Давыдов ур.

Увну ур шаэр 1939-ку шинал Лакрал райондалия дизан дур­сса Сундарали тIисса шяраву, къалайчинал кулпатраву. Мирзал ппу ва АбутIалиб Гъапуров хъинсса дустал бивкIун бур. Вай цивппагу Кураллаву цачIу къалайчишиву дуллай бивкIун бур.
ЦIуссалакрал райондалийн бизан буллалисса иширттал бардулт хьуну бур вайннал кулпатгу. Бизан буллалисса чIумал, кулпатравусса шанмагу мюрщи­сса оьрчI ниттил аьравалттия къазизиншиврул куннацIун кув бавхIуну бувцуну най бивкIун бур. ЦIусса миналийн бучIаннин, инсантал гьан бувну бивкIун бур цукунсса кIанттурду бурив ххал бан. Мяъсуд тIисса инсан увкIун ур шяравун, валлагь, гьивхьхьул билаят бия, ялтту занан бюхълай бакъая, амма гай гъагъансса чарувагу бакъая тIий. Му хавар баяйхту, Мирзал хъунмур ссил ххуй-ххуйсса чартту бавтIун бувкIун бивкIун бур Новолакрайн гьивхь гъагълан.

– ЧIявусса бакIрачIан бувкI­ссар жула миллатран бизан баву сававну. Бизан буллалийнигу, бувну махъгу, арнил кIанттурдайн вардиш бакъасса инсантал литIлай бия маляриялул, бургъил азарданул. Ххуйну дакIний бур нава чIивисса чIумалсса затру. Къурлатусса кIия адамина бикIайва гьаврду дуклай, гьаврдугу цаннансса къадуккайвача, кIия, шама, мукьа инсан цачIу буччинсса дуккайва. Гьаврду дурккун махъ, къатравух буклай, нурчIив дартIун буччайва. Гьамиящиял чулийнмай нанисса кIанайсса хIатталлив, ца-ца гьаттаву кIи-кIия, шан-шама инсан къаувччусса гьав дакъа­ссар. ЧIявусса агьулдануцIа хьуссару жу шилун бивзун махъгу. Биял­сса захIматгу бивхьуссар жул халкьуннал, – дакIнин бичлай ур Мирза.

Мирзал ппу Азирбижаннаву къалайчишиву дуллай, маэшат буллалисса инсан ивкIун ур. Оьрмулул 11 шин хьуннин вагу буттащал Азирбижаннаву къалайчишиву дуллай ивкIун ур. Му чIумал Мирза марцIну азирбижан мазрай гъалгъатIисса оьрчI ивкIун ур. ХIатта, ванан лакку мазгума хъама бивтун бивкIун бур. Шихунай увкIсса чIумал школалий лакку маз къабувчIлай тIий, «Машадиэбадгу» тIий махъра-махъсса парталий щяивтун ивкIун ур.
– Нава лаккучурахха, циванни нава азирбижан мазрай гъалгъа тIун, ттуйнма «Машадиэбад» тIутIи буллан, тIисса гьавас бувххуна. Яла гъинттул чIумал ссу­ттилнин марцIну лакку маз лавхьхьуссия.

Ца ппурттуву хъунасса аьлимчу Эса Аьбдуллаевлул редакциялийн гьан дурсса макьалалувусса цаппара затирдай аьй-бювкьу дурссия. Аьлим­чунал манеъшиву къадурну, ттун лакку маз хъинну ххуйну кIулну бушиву тасттикь бувна, – буслай ур Мирза. Музыкальный училищалуву дуклакисса чIумал чирчуну дур ванал «Ссайгъат» тIисса ниттин хас дурсса назму. Шикку дуклакисса чIумал кIул хьуну ур (аьпа бивухъул) машгьурсса шаэртуращал Абачара ХIусайнаевлущал ва МахIаммад-Загьид Аминовлущал.
– Абачара ХIусайнаев жул, жагьилсса чичултрал, чIарав хъинну авцIуссар, кумаг бувссар. Ваналли ттун прозалувунсса ххуллугу тIивтIусса тIий, – буслай ур Мирза.
Хъунасса шаэр Расул ХIам­затовлун жагьилнавусса чичаврил гьунар хIисав хьуну, маслихIат ккавккун бур Мирза М. Горькийл цIанийсса литературный институтравун гьан уван.
ЧIирисса чIумул мутталий шаэрнал захIматрал книжкалий диркIун дур 17 зузи кIану баххана бувсса чичрурду. Мирза институтравун кьамул уллай, вузрал ректор Владимир Пименовлул увкуну бур: «Ина гьунар бу­сса оьрчI ура, амма 17 зузи кIану баххана бувну бур, мунил савав ци дурвав тIий ура», – куну. Мирзал жаваб дуллуну дур: «Ттун чичлай айишиннин, зузалтрал оьрму-хIал, цIурювкьусса масъалартту кIул бан ччай бия, мунияту на цинявппа пишардай зун хIарачат буллай уссияв», – куну.
Шаэрнал цалчинсса шеърирдал жуж бувккун бур 1965-ку шинал. ЛичIи-личIи­с­са шиннардий Москавлив, МахIачкъалалив итабавкьуну бур 61 жуж, миннува 10 бур ­оьрус мазрайсса. КIилва итабавкьуну бур «Бутули» тIисса оьрчIансса жуж. Чивчуну бур 77 поэма. ПасихIсса ва усттар­сса шеърирдайну бакъассагу, ванал лакрал миллатрал литература авадан дурссар ххаллилсса драмардайну: «Ккурккуллал Щаза», «КIяла дараччи», «Жарият» ва цайминнуйну. Вай драмарду цимилгу бивхьуссар Лакрал театрданул сахIаналий. Шаэрнал проза ва поэзия бур зунттал хансса аьрщарая нанисса асардал вибувцIусса. Мирза Давыдовлул итабавкьуссар «Лекъащайсса цIуртти» тIисса элмулул ва культуралул ххуллий машгьур хьусса инсантуран хас бувсса луттирдугу.
Шиккува кIицI лаган, цил чIумал Расул ХIамзатовлул «Лак­рал литературалул цIанихсса лирик» куну бивкIссар Мирза Давыдовлуйн. Ванал чIявуми луттирду таржума бувну бур оьруснал, белоруссиянал, азирбижанннал, узбакIнал ва парснал мазурдийн.
ХIакьину шаэр буруккинттарай ур луттирду сийлуву бакъашиврий, буккулт чан ливчIун бувшиврий, кказит-журналлал подписка дуллай бакъашиврий.
– Кказит-журналлу миллатрал ярури, миллатрал къюкIри, багьу-бизури, аваданшивури. На мяш хъанан икIара цала миллатрал маз кIулсса, мунил кьадру бусса инсантурай. Гьарица лаккучура тIисса инсаннан лакку маз кIулну бикIан аьркинссар. Ниттил мазраяр нахIусса, нацIусса, бусрав­сса цичIав дикIан къабюхъайссар. Ябувара ниттил маз, муницIун дархIуну дуссар жула миллатрал культура, багьу-бизу. Жула миллатрал дуссар ххаллилсса, бусравсса буттал буттахъая шихуннай нанисса аьдатру, – тIий лакку маз кIулну бикIан, буруччин аьркиншивриясса оьвчаву дуллай ур шаэр.
Дагъусттаннал Чичултрал союзрал правлениялул председательнал хъиривчуну, Лакрал Чичултрал союзрал секциялул хъунаману зузисса хIаллай ва хIакьинусса кьини Мирза Давыдовлул творчествалухун багьсса цикссагу жагьилтуран поэзиялул дунияллувунсса ххуллу тIивтIуссар.
«Ттул дакIнил гьаржлувусса хъусри тIий», – ххари хъанай ур шаэр лакку мазрай чичлачисса инсантал буккайхту.
Мирза Щамхалович тамансса шиннардий зий уссия Лакрал радиовещаниялул редакторну, «Литературный Дагестан» журналданул редакторну. ХIакьинусса кьинигу даврил опыт бусса шаэрнал каялувшиндаралу итабакьлай бур «ЧIавалачин» тIисса оьрчIансса ххаллилсса журнал.
1983-ку шиная шийнай ва ур СССР-данул Чичултрал союзрал членну.
Лакрал литературалул тарихгу, лавгмунил суратгу, буруккинттугу, оьмур ва хъинмургу аьч буллалисса хъинну авадансса творчество дур шаэрнал.
Ватандалия, мунил цIуцIи кIанттурдая чивчусса шеърирду хъиннува бюххансса, асар хьунсса бур. Миллатрал кьадардануцIун бавхIусса, къумасса дакIнива нанисса бур ванал шеърирду. Ва буруккинттарай ур цимилагу мина даххана дан багьсса цала агьулданий.
– Ттатталмур гьав зунттаву,
Бутталмур Чачаннаву,
Цуму гъурватрай бурвав,
Ттун гьав дувансса кIану? – чичлай ур автор.
Вай ца-кIива ххуттавагума аьч­ну чIалай бур шаэр миллатрал бакIрачIан бувкIмунил, миннан духIан багьсса кьинирдал къювулий ушиву.
ПасихIсса мукъул заллу Мирза Давыдовлул чивчуну бур «Мукьва хIави» тIисса дяъвилул иширттан хас бувсса роман. Романдалуву асар хьунну чивчуну бур буттахъул дяъвилийн лавгун ххажалатрай бивкIсса, цивппагу ЯтIул Аьралуннан кумагран дяъвилийн най бивкIсса мукьа оьрчIая. Ва роман чил миллатирттал мазурдийнгума таржума бувну буссар.

Бара хьуну ур Мирза Щамхалович ЦIуссалакрал дяъвилул иширтталгу. 2000-ку шинал Мирза Давыдовлул итабавкьуну бур «БивкIулийн лажинну» тIисса трилогия. Ва хас бувну бур 1999-ку шинал Дагъусттаннал аьрщарайн къачагътурал кьюкьри ххярхсса дяъвилул иширттан.
Мирза Щамхалович унгу-унугусса патриот ушиву уттигу исват хьунни. Ванал чивчунни «Душман ва дус», «ЧантI уку Украинай» тIисса поэмарду. Вай кIивагу поэма Аь. Тахо-Годийл цIанийсса педагогикалул институтрал оьрус мазрал ва литературал секторданул элмийсса зузала, шаэр Миясат Муслимовал таржума бувну, оьрус мазрайгу бивщуссар.
Хасъсса аьралий операциялул иширттал чIарахгу къаувккунни жула шаэр. ТIайла дакъасса, щялмахъсса идеология АьрасатнацIун дахIлахIисса, Аьра­сат кьювкьу-кьадар буллалисса чIумалгу, шаэрнаща кьянкьану цалва позиция ккаккан бан бювхъунни, ванал итабавкьунни «Рассвет» тIисса хасъсса аьралий операциялий гьуртту хъанахъи­сса аьралитуран хас бувсса ххаллилсса лу.

Аьралитурал дакI даву, аьралий буржру бартбигьлансса гьавас бутаву мурадрай чивчусса луттиран лавайсса кьимат бишлай, Мирза Щамхалович лайкь хьуну ур хасъсса аьралий операциялул гьурттучитурал чIарав бацIлацIисса инсантуран дулайсса «Команда Путина» тIисса паччахIлугърал наградалун.
Ттизаманнул иширттан хас бувсса произведениярттава чIалай бур ва оьрму ккавксса, халкьуннал багьу-бизу кIулсса, куртIсса пикрирду аьч буллалисса шаэр ушиву. ХIасил, творчествалул ххуллий шаэрнал лавхъуну бур яла бюхттулми шачIантту.
ХIакьинугу оьрмулул шиннардих къаурувгун, усттарну хъярчру, яхши-хашру буллай зий, занай, чичлайна ур шаэр.
Мирза Щамхалович цинявппагу цала гьунардацIун цIакьсса тарбиячигу ур. Ванал цала кулпатралщал лайкьсса тарбия дуллуну, чивун буккан бувну бур кIия арс ва кIива душ. Вайннава арс Идрис, бутта куна, шаэршиврул гьунар бусса ур.

Имара Саидова