Николайл душ Оьмарова Валентина
Ноябрь зурул 6-нний дунияллия лавгунни, жул ххаллилсса шяравучунал, аьпа бивул, 1-мур ЦIувкIратусса МахIаммадлул арс Оьмаров Аьбдуллул кулпат Валентина Николаевна.
Цалчинмур ЦIувкIуллал ванийн ттюнгъану учайссия Валя. Аьбдул ва Валя цаннайн ца бакIрайн багьссия Тверскаллал областьрайсса Кашин тIисса шагьрулий, вай кIиягу техникумраву дуклай буссия. Валях эшкьи хьусса Аьбдул ва щарну бувцуну увкIссия Дагъусттаннайн.
Аьбдуллун гацIана къутандалий ххуйсса даву дуллуссия, хъуннасса хозяйствалул хъунаману уссия. Валягу ветеринарну зий буссия. Ва захIмат ххирасса, чIануйн багьсса, низам ххирасса, давриву циятура тIалавшинна хъуннасса буссия. Ванил кьимат лавайну буссия ххуйсса пишакар хIисаврай. Ххирассия Валя ва кIулцириннан дакI-аьмал хъинсса, буса-учинмур кIулсса, инсаннал дакI хьунмур бусан ччисса, маслихIат дакIнийхтуну байсса буну тIий. КIункIу тIун бикIайссия ванил дакIнил чанначIан, гъилишивручIан. Лаккучунан нясив хьувкун, хIарачатрай лакку мазгу лавхьхьуну, лакрал аьдатру, багьу-бизугу лавхьхьуну, щалва агьлулун ххирасса аслисса лаккущар хьуссия. Так кьадарданул ваний рахIму къабувссия, жагьилсса ласнацIагу, ца акъа- акъасса асрнацIагу хьуссия, духIлан багьссия ми къювурдугу, амма дакIнил чаннал паргу лещан къабивтуну, яхI буллай буссия, мачча-гъаннал кьинилучIа, иширттачIа чIарав бацIлай. Ччяни лавгунни дунияллия Валя цуппагу, махIрумну душгу кьабивтун. Ва хъун дакъасса некролограл ххуттардиву дишин ччай буру жу жулва Валя-Валентина Ивановнахсса ччаву. Ина жул дакIурдива къалагайссара, ххирамур!
Цалчинмур
ЦIувкIуллал жямат
МахIаммадаьлил душ МахIаммадова Написат
Жуятува лавгунни МахIаммадова Написат МахIаммадаьлил душ.
Жула хъамакъаитайсса Садикь МахIаммадовлул кулпат, Написат, бусса оьрмулий бивкIссар ганал вихшаласса дуснугу, дакIнивусса гьавасрал щаращинугу. Цуппагу ряхцIалунния лирчусса шиннардил манзилданий зий бивкIссар театрдануву личIи-личIисса давурттай, тамансса шиннардий реквизитрал цехрал хъунмурну.
Ххишала бакъа бусравну оьрму бувтссар Написатлул коллективрал дянив. Ва бия театрданул вирдакI. Ванин ххаллилсса даражалий миллатрал фольклор, багьу-бизу кIулну бушиву, махъ бакъа, бучIи лякъайссия театрданул хъуни-хъунисса проектру хIадур буллалийни.
Хъуннасса кьурчIишиву кIидачIлай, дакIнийхтуну жижара буллай буру Аслан МахIаммадовлухь, Руслан Лариннухь, Зураб МахIаммадовлухь аьзизсса нину ва амудада дунияллия батIул шаврийн бувну.
Цин Алжаннул кьапурду тIивтIуну лякъиннав, махъ ливчIминнал оьрмурдай барачат бишиннав!
Лакрал театрданул коллектив
Вай гьантрай дунияллия лавгунни, лакрал жяматрал дянив бусравсса хъамитайпа
МахIаммадаьлил душ МахIаммадова Написат.
Написат дунияллия лагаврил хъуннасса кьурчIишиву кIидачIлай, жижара буллай буру Аслан МахIаммадовлухь, махъсса гъан-маччанахь.
РухI хъинний дишиннав, алжаннул ххари баннав. Махъ ливчIминнал оьрмурду лахъи баннав.
«Илчилул» редакция
АллалмахIаммадил душ МахIмудова Гьидаят
Вай гьантрай аьпалухьхьун лавгунни ххаллилсса хъамитайпа, Бархъаллал шяравасса АллалмахIаммадил душ Гьидаят МахIмудова.
Гьидаят бувну бур 1930-ку шинал июньдалул 15-нний Бархъаллал шяраву. Къуртал бувну бур Бархъаллал школалий 7 класс. Щар хьуну махъ цилва щалва оьрму хас бувну бур кулпатран, оьрчIан. Ласнащал Аьбдуллущал ванил хъунигу бувну, ххаллилсса тарбиягу дуллуну, цала-цала оьрмулул ххуллийн бивчуну бур ряхва оьрчI – кIия арс ва мукьва душ.
ЧIярусса шиннардий цIимилий бурувгссар ва къашавайсса цила ниттих. Гьидаят бия дахху-ласулухун багьсса, хъинну хIарачат бусса, дан-дитан кIулсса, яхI-къирият дусса хъамитайпа. Давривугу ва бия карчI дакъасса, куклусса, дирисса. Ванил хIурмат хъунмасса бия шяраваллил агьулданучIа.
– Жул зунтту битай барххуй,
Хъархъаллайх лахъай гьинтай, – тIий чивчуну бур душнил цила ниттихасса зумалуву.
Гьидаят аьпалул шаврил кьурчIишиву кIидачIлай, жижара буллай буру арснахь, душваврахь ва махъсса гъан-маччанахь.
РухI хъинний дишиннав, алжаннул ххари баннав.
Бархъаллал жямат
ЦIаххаев Мухтар МаннатIил арснан
хас бувсса чIал хьусса
аьпалул махъру
Бурттуннал оьвхъусса арс,
Жул ГьунчIукьатIрал куяв,
Дугърисса ва чумартсса
БутIа Занная ливксса.
Лаккуйн азарханалийн
Ххаринуявхха лавгсса,
ЦIа дурк хIакиннал кару
Савав хьунсса умудрай.
Мухтар, ххирасса куяв,
Вил пиш тIийннасса симан,
Хъяйнмасса ми вил яру
ДакIурдиву личIанссар.
Буттал улклуй жан дулун,
РухIирал кIункIу уврав?
Зана къаикIаншиву
Вил дакIнил къабувсунав?
ХъатIи тяхъа бувайма,
Мажлисрай цIу бувайма,
Тти шанашу рахIатну
Абадлийсса къатлуву.
Вил ххирасса бажатал,
Хьунаакьин бувкхьунссар,
Исмяилгу, Макьсудгу
Миннащал Демокритгу.
Уссу Захар, Уллубий,
Зинагу, вил ссурвалгу,
Нитти-буттащал архIал
Бигьа лаги алжаннув
ЦIаххаевА Жавагьи
МахIаммадлул
душнин хас бувсса
аьпалул ххару
КIюрх лагай, хьхьу дучIай,
НякI ссав цIурттал оьрчIи дай,
ЦIансса хьхьу чанна дувай
Ссавний цIу зурул ккуртлул.
Гьантта лаглай, барз лаглай
Шингу ккуру ларгунни,
Жул цIа ххуймур, ххирамур
Жавагьий, ина бакъа.
Уздансса къушлил заллуй,
Къизляр шагьру кьабивтун,
Миналия бувккукун,
Вил дакIний ци биявав?
Мажлисру бувай къатри,
Хъамал кьамул бай ужагъ,
Зува бивзун нанийни,
ХIалал бити къаучав?
Каспийск тIимур шагьругу
Зун барачат къавхьунни,
Душру, душваврал оьрчIру
Аьсивну личIан бунни.
Азарханардай цачIу,
Ца числорай, ца ссятрай,
Жан дуллусса ххирамий,
Жул Мухтар ва Жавагьий.
Ахиратралми къатри
ЧIюлу дувара утти,
Зун алжан нясив баннав,
Гьав нурданул дуцIиннав.
Щаллусса шин
ларгунни, ина жун ххал къахъанай
(Вихьуллал шяравасса ХIасаннул душ Чупанова БатIал аьпалун)
БатIай, жул бургъил симан,
Жу чанна бувай чирахъ,
Вав-шав тIий жу кьабивтун,
Лавгунна ина жуя.
Жу вил бакIрачIан бувкIмур,
БухIан къабюхълай буру,
Къавхьунни, ххирасса ссу,
Ина буруччин, ябан.
Таллагьий, дулувияв
Вихлу жу цинявннал жан,
Жул дуаьрду, леххаву
Заннал кьамул къадунни.
Агь, жул цIимилул ссувай,
ЦIуцIима рахIат айсса,
Вилми дардирдан жуща,
Дарув лякъин къавхьунни.
Гьарнан бусравсса вил цIа,
Тти лухIи чарий хьунни,
Куклуну бачай чурхгу,
Мармарчарийн бувккунни.
ЛяличIиссияв ина,
БавцIу кIану ххуй байсса,
Дайсса даву уздансса,
Бивзсса ша эбратрансса.
Вил Заннал кьадарданийн,
ДакIру вих хъанай дакъар,
Гъили бургъил кIанайгу
Бявкъу марч бишлайнма бур.
Шанашу, ххирасса ссу,
Абадлийсса шанаву,
Жущал хьуна бакьиннин,
Нуз къатIитIай къатлуву.
Бакъассар тIий къавихру,
Буссар тIий яхъананну,
Ссувай, вия лавхьхьуну,
ЯхI булланну тти жугу.
Вил бивкIу лялиян бан
къахъанахъисса ссу Асият
Жуятува батIул хьунни, жяматрал дянив бусравсса инсан, ххаллилсса адамина, Хъусращиял шяравасса
Муттиннул арс
Ибрагьим Аьлилов.
Ибрагьим дунияллия лагаврил хъуннасса кьурчIишиву кIидачIлай, жижара буллай буру кулпатрахь, уссихь, ссурваврахь, оьрчIахь ва махъсса гъан-маччанахь.
РухI хъинний дишиннав, алжаннул ххари аннав. Ванан къабуллусса оьрму махъминнан булуннав.
Одноклассниктурал цIания Шихаьли Шихаьлиев
