Ххаллилсса лаккучу, техникалул элмурдал доктор, профессор, академик, «Дагестан» МЦК-лул президент Арсен Буйдалаевич ХIусайновлухь дакIнийхтуну барча тIий буру увсса кьини. ЧIа тIий буру цIуллушиву, гьарица ишираву тIайлабацIу, ххари-хъиншивуртту.
ХIурмат бусса Арсен Буйдалаевич! Элмулулгу, жяматийсса иширтталгу ххуллий ина дурмунин багьа бищун къашайссар.
ЧIярусса шиннардий «Дагестан» МЦК-лий каялувшиву дуллай ина хъунмасса захIмат бивхьуссар билаятрал хъун шагьрулий дагъусттанлувтал, хаснува лак, лагма лаган бан, иш багьний гьарнал чIарав авцIуссара, аьркинсса ка-кумаг бувссар. Ина кунмасса лайкьсса арсру лакрал миллатрал дянив чIяву баннав, ина жун чан къааннав.
«Илчи» кказитрал коллектив
Ноябрьданий 111 шин хьунт1иссия ХьурукIуллал шяравасса АьвдурахIиннул арс ХIажиев Жамал увну. РСФСР-нул, ДАССР-нул лайкь хьусса хIакинни Жамал.
Агьалинал цIуллу-сагъшиву дуруччаврил ххуллий личIи-личIисса жаваблувсса къуллугъирттай зий ванал хъунмасса захIмат бивхьуссар.
Ва ивкIссар Дагъусттаннал ЦIуллу-сагъшиву дуруччаврил министрнал хъиривчуну, РКБ-лул хъунама хIакинну.
ЦIуссалакрал жяматрайх кьини дурксса, цала шяраваллава кьанив бизан бувсса захIматсса шиннардий ва жул халкьуннал чIарав авцIуссар. ЦIуну хьусса райондалул аьрщарайн цалчинсса ша бивзсса хIакинни Жамал.
Ванащал архIал бувкIссар ххюва медсестрагу. ХIасил, эпидгруппа. Хьхьу-кьини дакъа, райондалул ва республикалул хъуниминнайн уклай, жул райондалийн личIисса дуки-хIачIиялул ва дарурттал дузалшинна хьун дурссар, агьали лахъай азардая, ккашия ххассал бувссар.
«Илчи» кказитрай ХьурукIуллал хьхьичIунсса инсантурал суратру дирхьуну дия, ваналмур къаккарккукун жун асар хьунни.
Буттауссу-хIакин
Бухьунссар ХьурукIрав
чIявусса вирттал,
Цаннаяр ца гужсса
зунттал арамтал,
Диндалул хъуними,
хъун къуллугъчитал,
Дуркку халкь, шаэртал,
касмулул зузалт.
ЦIуссалакрал жямат
бизан був чIумал,
Дяъви къуртал хъанай
къизгъинсса чIумал,
Ккашил ва цIуцIаврил
«кьатI» хьусса чIумал,
Жул чIарав авцIуссар
ХьурукIрал Жамал!
Утту ишай чIумал чIун
кьукьин дуллай,
Шярава шяравун
циксса къуццу бав?
Цикссаннал оьрмурду
ина лахъи бав?
БивкIулул кьацIлива
рухI ххассал дував?
Циксса хьхьурду дичав
шану бакъасса?
Циксса шинну дував
ччаннай авцIусса?
Циксса барзру бував
ккаши-мякьнасса?
Къашайнал чIарату
уцан къахъанай.
Ина бувсса захIмат жул
чIарав авцIун,
Алжаннул давлатру
ттуршлий гьаз хьуннав,
Вил уздан тухумгу
тIутIайх бичиннав,
Пахру-ххаралунсса
вил наслу хьуннав.
ЦIуссалакрал жяматрал цIания Мирзоев Зайнулла
Мусил ЦIуку буллунни
ХIажиев Арсен увну ур июньдалул 6-нний 1997-кусса шинал ХIасаннул ва БатIил кулпатраву МахIачкъалалив. Шиккува 37-мур школагу лавайсса кьиматирттай къуртал бувну, 16 шинаву увххуну ур Политехнический институтравун. 17 шинаву лавгун ур Санкт-Питербурграйн, увххуну ур Аьралий академиялувун. 2022-ку шинал ххуйсса кьиматирттай мугу къуртал бувну, аьралий къуллугъ буллай шиккува авцIуну ур. Июльданул 9-нний шавай зана хьуну, кулпатгу бувну, лавгун ур махъунай аьралий къуллугъ буллан. 2022-ку шинал августрал 15-нния шихунай Арсен СВО-лий гьуртту хъанай ур. Лайкь хьуну ур командирнал чулухасса личIи-личIисса грамотарттан ва бахшиширттан.
Вай гьантрай Арсен ХIажиевлун дуллунни «Дагъусттаннал халкьуннал Виричу» тIисса ц1агу, Мусил ЦIукугу. Аьралий бигарду къучагъну бартбигьлагьаврихлу ва взводрал командирнугу ивтуну ур.
Ттаттахъаву бивкIсса
яхI ва къирият
Ина ккаккан бунни
ккулиоьрчI, Арсен.
ЗахIматсса пишагу
канил бувгьуну
Ватандалул цIаний
цIакьну авцIуну.
Утти ва тарихгу
ххуттавун багьссар
Мусил ЦIуку хIалал
ина бувуссар.
Виричура тIисса
цIа бюхттул дурну
Вила яхI-къирият
чIалачIи бувссар.
Гьарзассар лакраву
кьянкьасса вирттал
Цивппа бавцIу кIану
сийлий ябайсса,
Инагу ми цIардан
хьуссара тти лайкь
Жул пахруй, жул авур,
жул зунттал жайран.
Бахттун Гъазиева
