Ноябрьданул 8-нний МахIачкъалалив, «Россия – моя история» тарихрал паркраву, тIиртIунни хасъсса аьралий операциялий Аьрасатнал аьралитурал душманнаща зевххусса ярагъуннил ва техникалул выставка. Ва сакин дурну дия Аьрасатнал Обороналул министерствалул Кьиблалул аьралий округрал сипталий.
Экспозициялий бия НАТО-лул хIукуматирттал ярагъ, Американал «Брэдли», немецнал «Marder», британнал БТР «Spartan», Швециянавасса ва Канаданавасса бронемашинартту, США-нал ва Турциянал техника, Украиннал танк «Булат» ва цаймигу, аьмну 18 журалул аьралий техника, битай ярагъ ва леххай аппаратру къахIисавну.
Выставка тIитIлай, ихтилат бувна Дагъусттаннал ХIукуматрал председатель Аьбдулмуслим Аьбдулмуслимовлул. Премьернал бувсунни занази экспозиция Аьрасатнал Кьиблалул шагьрурдай ккаккиялун дихьлай цаппара барзру хьушиву. Уттинин выставка хьуну дур Ростов- на-Дону, Волгоград, Владиккавкказ, Ставрополь, Краснодар, Майкоп ва Магас шагьрурдай.
– Душманнаща зерххусса техникалул Аьрасатнал аьралуннал тIайлабацIулул, жула саллатIнал дяъвилул майданнив ккаккан дуллалисса чувшиврул ва усттаршиврул барашинна дуллалиссар. Укунсса машинартту ппив буллай, вайннуяр ялтту буклай буссар кьянкьасса жула талаталт. Буттал кКIанттул цIанийсса Хъунмасса дяъвилул чIумал кунна, ччучлай дуссар душманнал техника. Жула аьралитурал зерххусса душманнал техника ккаклакиний пахру багьлай бур Аьрасатнахлу, аьралитурахлу, ххишала хъанай бур жува чара бакъа ххув хьунтIишиврийнсса умуд.
На барчаллагьрай ура аьралитурал кулпатирттайн. Жу уттиния тихунмайгу кумаг буллантIиссару аьралитуран, аякьа дуллантIиссару миннал кулпатирттаха, хьхьичI ххуттай бавцIуминнан жува чIарав бушиву кIулну бикIан. Жула аьралитал цала буттахъул, ттаттахъул кунма кьянкьану бавцIуну буссар душманнал хьхьичI, жува чара бакъа ххув хьунтIиссару, – увкунни премьернал.
Хъирив ихтилат бунни Кьиблалул аьралий округрал аьралуннал хъунаманан кIанайсса генерал-лейтенант Владимир Кочетковлул.
Ванал барча бунни выставкалул хъамал ва гьурттучитал Кьиблалул аьралий округрал аьралуннал командующий, генерал-полковник Геннадий Анашкиннул цIания.
– ХIакьину шикку жунма чIалай бур хасъсса аьралий операциялий жула ярагъуннил гужирдал дуллалимур. КIицI лаган ччива, Аьрасатнал аьралуннал цал ттигу исват бувссар Баргълагавал билаятирттал ярагъ ва техника дух дан къашайшивриясса бусаларду нахIакьдансса бушиву, – увкунни В. Кочетковлул.
Мукунма ихтилатру бунни Дагъусттаннал Ветерантурал советрал председатель МахIарам Алиджановлул, хасъсса аьралий операциялул гьурттучи, «Память гор» тIисса Дагъусттаннал жяматийсса организациялул каялувчи МахIач Шамиловлул. Выставкалул экспонатирттая балжину буслай бия экскурсоводтал.
Мероприятиялул лагрулий Кьиблалул аьралий округрал балайлул ва къавтIаврил ансамбльданул ккаккан дунни концертрал программа.
Лажин хIадур дурссар
Андриана Аьбдуллаева
