Дагъусттаннай цаппара барзру хьунни «99-й» тIисса художественный фильм ласлай. Вай гьантрай хьунни аьралий драмалул съемкарду нанисса кIанттурдайнсса пресс-тур. Ва сакин дурну дия «Медиа юниверсал ивент» АНО-рал Дагъусттаннал бакIчинал ва ХIукуматрал администрациялущал цачIу.

Аьралий драма хас бувну бур 25 шинал хьхьичI, 1999-ку шинал сентябрьданий Ц1уссалакрал райондалий хьусса ишир­ттан. Шиву буслай бур жула аьрщарайн ххявхсса къачагътурайн данди бавцIуну Дагъусттаннал милицанал зузалтрал ва Липецкаллал ОМОН-далул аьра­литурал ЦIуссалакрал шяраву къачагътурайн данди бавцIуну ккаккан дурсса чувшиврия. Ва бур личIи-личIисса миллатирттал, диннал инсантурал кьини дурксса чIумал цала Ватандалул, тархъаншиврул цIаний цачIун шавриясса, ца шавриясса бусала. Хаснува тай гьантрайри Дагъусттаннал зунттаву цаппара инсантал цачIун хьуну, щалагу билаятран баруну хьусса, минналли Аьрасатнал ттизаманнул тарихраву чувшиврул лажин чирчусса.
Проектраву гьурттушинна дуллай бур кIива кинопроизводитель: CHEGERY COMPANY ва «Серебро» тIисса компания. Киносуратрал генеральный продюсертал бур Ибрагьим МахIаммадов, Бинке Анисимов, Евгений Мишиев, Алексей Никифоров ва Денис Гостев. Режиссер – Леонид Пляскин. Актертураву бур Аьрасатнал кинорал чанна цIуртти Сергей Марин, Ирина Пегова, Павел Чинарев, Сергей Яценюк, Вадим Цалатти ва цаймигу.
Шанма зуруй нанисса съемкардай гьарица кьини зий бия 200-нния ливчусса инсантал, массовка, актертал ва каскадерталгу хIисавну.
Продюсер Бинке Анисимов барчаллагьрай ур Аьрасатнал президент Владимир Путиннуйн проект хъин чулий ккавксса ва мунин кабакьу бувсса, мукуна Дагъусттаннал бакIчи Сергей Меликовлуйн, Аьрасатнал Культуралул министерствалийн ва Кинорал фондрайн ва даву дузрайн дуккан дан кумаг бувсса. Кино ласлай бур ЦIуссалакрал райондалий. Съемочная группалун аьркинсса кумаг буллай бур райондалул агьалигу. Съемкарду нанисса кIанттурдайн увкIунни Дагъусттаннал ХIукуматрал председательнал хъиривчу Муслим Телякавов. 1999-ку шинал обороналул кьюкьлуву ва цувагу гьуртту хьуссар тай иширттаву.
Муслим Телякавовлул кIицI лавгунни тай дяъвилул ишру ттизаманнул обществалун аьч бавриву цуксса агьамшиву дуссарив, дакIнин бувтунни та захIматсса ппурттуву билаят халкьуннал цашиврул ххассал бувшиву.
– Буттал КIанттул цIанийсса Хъунмасса дяъви къуртал хьуну махъ жува цIунилгу ккаккан дурссар аьралунналгу, ихтияр дуруччай органнал ва укунмасса инсантуралгу цашиву, ва хьуссар жула ххувшаврил сававгу. Вай иширттая махъ Аьрасат цIубуклай байбивхьуссар. ХIакьину дунияллул даражалий Аьрасат ца яла хьхьичIунмур билаят хъанай бур, – увкунни ванал. Съемкардал лагрулий хьунни актер Вадим Цалаттил ва ванал персонажрал прототип, та ч1умал ЦIуссалакрал райондалул полициялул хъунаману ивк1сса Муслим Даххаевлул, Дагъусттаннал УФСБ-лул зузалал роль дугьлагьисса Арсланбек Мурзаевлул ва геройнал прототип, ЦIуссалакрал райондалул бакIчи МаматIи ХIамзатовлул хьунабакьавуртту.
Актертал Наби АхIмадов ва Арслан Муразабеков цала асардая буслай, кIицI лаглай бур аьралий сценардал захIматшиву ва Дагъусттаннал тIабиаьтрал ххуйшиву.
Мероприятиялул лагрулий кинораву ца агьамсса роль дугьлагьисса актрисан, Ирина Пегован (ванил персонажрал прототип бур Чувшиврул ордендалул заллу Полина Халилова), дуллунни «Аьрасатнал халкьуннал артистка» тIисса бусравсса цIа ва хъамакъабитулунсса сувенир.
«Ччай бур цал ттигу Да­гъус­ттаннайн кIура баен, зул кIи, гъи, инт ккаккан. Дагъусттан бур гуж-кьудратрал кIану», – бувсунни цила асардая актрисал.
«99-й» фильмрал премьера дикIантIий дур 2025-ку шинал октябрьданий.
Шиккува бусан, кинорал цаппара бутIри лавсъссар Гъуниннал шяраву. Му ппурттуву, миннахь барчаллагьгу учин, цалами пикрирдугу бусан, цаппара бувчIинбавуртту ва маслихIатругу бан съемочная группалущал хьунабакьин лавгссия лакрал патриотътурал группа: тарихчи-краевед Рамазан ХIасанов, тай дяъвилул иширттаву связь руцан къаритлай нигьачIисса шартIирдай хъуннасса даву дурсса Полина Халилова, тарихчи Басира Щамхалова, Чапаевкаллал школалул директор Камил Аьлиев.
Ва хьунабакьаву савав хьуну, мяйжаннугу, цаппара агьам­сса дахханашивуртту хьуссар сценарийлуву. Киноран дурагу кIира ссят итадаркьуну душиврийн бувну, гьар цимурца жунма ччимур ккаккан бан къахьурчагу, хьунабакьаву мюнпатсса хьуссар.
– Ва кино ласлай байбивхьу­сса чIумалва съемочная группа ттуйн бувккуна. Тания шихунай на миннащал хIалану ура. Та чIумалгу, утти махъ хьунабавкьусса чIумалгу на цаппара маслихIатру бувссия. БувчIин бувссия тай иширттаву ополчентурал лархъсса хъар ккаккан дурну ччишиву. КIицI лавгссия Амучи Амуттиновлул каялувшиннаралусса штабрал дурсса хъуннасса даву. Бурганну увкунни. КIира ссят дия тайннан киноран итадаркьуну Тайннал агьаммур мурад бия кьини дурксса чIумал Аьрасатнал аьралиталгу, Дагъусттаннал милицанал зузалтгу ца хьуну бивкIшиву ккаккан баву.
Дагъусттаннай зий буссаксса на уттигу миннал ялув ацIаву данна, – тIий ур Муслим Да­ххаев.