Жулва хъуншагьрулул каялувчитурал хъуннасса къулагъасралун лавсун буссар чIярузивурду дусса къатрал лагма-ялттусса аьрщирдай цукунсса-дунугу строительстварду дан къабитлатаврил ва ми кIанттурду къааьркинсса объектирдая марцI баврил масъала.

Ва иширайн бувну, уттигъанну, Муса Мусаевлул амрулийну, мэрнал хъиривчу Камил Изиев жилищный контрольданул муниципал Управлениялул хъунама Пазлуттин Увайсовлущалсса комиссиялувух ивунни цаппара мукунсса кIанттурдайн. МахIачкъалалив къатри дурну, халкь миву ялапар хъанай, 30-40 шинай хIаятру лази-лакьи къадурну, ми дакьин къадурсса кIанттурду чансса бакъар. Ва бакъасса, лап лащинсса тагьардануву дур къатрал магъив, лувчIинну, хIаятирттавусса беседкарду, оьрчIал ттуплий бу­ккансса, тIуркIурду бансса майданну. Шагьрулул администрациялийн нех дирхьуну нанисса вай ишир­ттал хIакъиравусса халкьуннаясса аьрзригу чан хъанай бакъар, чIяву хьурча бакъа.
Шиккува кIицI лаган, вай давуртту дуван жаваблувссар жулва къатрал ТСЖ-рду ва домоуправленияртту.
Камил Изиев ивунни укунсса цаппара кIанттурдайн ва хьунаавкьунни вайннал ТСЖ-рдал ва домоуправлениярттал зузалтращал. БакIчинал хъиривчунал хъунна­сса аьй-бювкьу дурунни цала даврил бакI-магъ дан къабюхъла­хъисса вай идарарттал каялувчитурай. Масалдаран, Камил Изиев ивсса Исмяиловлул цIанийсса (Энгельслул) кIичIиравусса цаппара хIаятру, къатрал тагьар, чапалсса подъездру, цIансса ва ччюрклил бувцIусса лувчIинну ккавккун, учинсса, бусансса бакъа ливчIунни. Вайннул жаваблувсса домоуправлениярттал каялувчитурай хъуннасса дюъ дирхьунни ччя­сса мутталий вай кIанттурду низамрайн буцин. Ивунни мукуна лази-ларкьусса ва марцIсса И. Шамиллул цIанийсса кIичIиравусса цаппара хIаятирттавун ва мивусса къатрал подъездирттавунгу. Шиччаллил жаваблувшиву дусса дур «Управляющая компания -10» ООО-рай.
Укунссара лази-ларкьусса хIаятру ва домофонну дусса подъездру Камил Изиев гьурттусса коми­ссиялул ххал бувунни А.Султаннул цIанийсса кIичIиравусса № 10 къатравугу. Шиккусса халкьуннал бусаврийну, вайннал ТСЖ-лул хъуннасса аякьа дувайсса дур къатрайн дагьайсса территориялух.
Жилищный контрольданул муниципал управлениялул хъунаманал бусаврийну, МахIачкъалалив бусса бур 82 ТСЖ ва 43 управляющий компания. Шагьрулул 50-ксса къатлул дакъасса дур вайннул жаваблувсса идара. Мунияту заллу-зал акъа тIий укунсса къатрал лагма-ялтту ччюрк дирчуну, хIаятирттаву ччи-ччиний гаражру бивхьуну, подъездру чапалну, тталлай чанирду левщун бикIайсса бур. Ва ма­съалалул хIакъираву шагьрулул бакI дургьуми пикри буллай бур, цукун ци бувну, ци чаранну кьамул бувну хъинссарив ккаклай.